NASA 逐工一幅天文圖 APOD Taigi

獵戶座 peh 起來 ê 時陣，tī kha-mé-lah 內底看起來會是按怎？逐年這个時陣，咱會當 tī 日落了後 ê 東南方看著這个 有名 ê 星座。獵戶座上好認--ê，就是伊皮帶頂懸彼 3 粒星。Tī 地球 大部份所在看著 ê 這 3 粒星，總是 ùi 側面 peh 起來。這張夜空暗暝 ê 相片，有包括獵戶座 tī 內底，伊就 ùi 波蘭 kah 捷克共和國 交界 ê Śnieżka 山 後壁 peh 起來。這張長時間感光 ê 相片內底 有足濟暗暗 ê 天體，包括 獵戶座 kah 火焰 星雲，這 2 个攏去予 Barnard 環 包 tī 內底。這張 闊幅 kha-mé-lah 組合影像 閣有翕著夜空中 幾若个標誌性 ê 天體，包括影像頂懸 ê 藍色 昴宿星團 kah 獵戶座倒爿 ê 紅色 玫瑰星雲。視野內底 有名 ê 恆星 有，南河三、參宿四、參宿七 kah 畢宿五。Tī 未來幾若個月內，獵戶座 會 tī 日落 了後出現 tī 天頂愈來愈懸 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240131/
影像：Marcin Ślipko
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap240131.html

這張速翕是 4 月 8 號 tī 地球北美洲 Quebec 省 Magog 湖天頂翕著 ê 月娘烏影。Tùi tī 湖邊 逐日食 ê 人來講，這場日全食是 tī 好天 ê 時陣，忽然間出現 ê 短短 ê 暗暝，是一个予人讚嘆 ê 壯麗景色。是講這个 Magog 湖，是這擺 tī 美洲發生日全食 ê 過程中，月球烏影經過上落尾 ê 所在。這條 2024 年 日全食 ê 狹狹全食帶，是 ùi 墨西哥 ê 太平洋海岸 向東北爿 迵過美國 kah 加拿大。毋過日偏食差不多 tī 規个美洲大陸攏看會著。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240409/
影像：Stan Honda
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240409.html

這規片發光氣體塗粉雲，對 地球 ê 天文學家來講，看起來敢若是一隻鳥仔，所以伊才會提著這个外號，海鷗星雲。這隻 宇宙鳥仔 ê 肖像 包括了銀河盤，闊度有 2.5 度，就 tī 天狼星 方向附近。天狼星 是 大犬座（大隻狗星座）ê alpha 星。是講，這區 嘛有其他目錄 ê 天體，像有名 ê NGC 2327，伊是一个實密、厚塗粉 ê 發射星雲 kah 反射星雲，內底有一粒大質量恆星，這部份就是 海鷗 ê 頭。這規片海鷗星雲去予編做 Sh2-296 抑是 IC 2177，應該是連紲 ê 超新星爆炸 產生幾若重 大型外殼結構 ê 一部份。Tī 中央正爿下跤 彼个顯目 ê 藍色光弧，是 ùi 大犬座 FN 星 噴出來 ê 弓形衝擊波。這个複雜 ê 氣體塗粉雲主要是成份是發紅光 ê 水素原子。伊 kah 大犬座 ê OB1 星協 tī 天頂佔 200 光年闊，就 tī 離咱 3800 光年遠 ê 海鷗星雲 遐。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240313/
影像：Gianni Lacroce
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240313.html

地平線頂懸彼个是啥物？這團看起來敢若怪怪 ê 厝邊星系，實際上是一台普通火箭咧噴煙，只是講伊有無四常 ê 後壁光。雖罔講 SpaceX 獵鷹 9 號 火箭是 ùi 美國 加州 ê Vandenberg 太空軍事基地 發射--ê，毋過會當看著 火箭咧燒 推進燃料 ê 範圍，是包括閣較闊 ê 所在。像這張相片就是 tī 冰島 Akureyri 鎮 翕--ê。這台 大台太空船是 1 禮拜前發射--ê，這个 壯觀 ê 景色隨去予 智慧形手機仔 翕了 10 秒，就消失去矣。就親像是 夜光雲 仝款，這个煙會遮爾光，是因為 晨昏光效應 造成--ê。就是講，若是有一个有夠懸 ê 物件去予黃昏 ê 太陽照著，就算是地面觀測者 tī 暗暝嘛看會著。這个煙會成做 捲螺仔形，是因為獵鷹號 火箭愛調整方向，向無仝方向送衛星出去。這張特別 ê 相片內底，閣有恆星 kah 暗暗 ê 青色 極光 kah 紅色極光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240312/
影像：Seung Hye Yang
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240312.html

啥物物件 tī 暗暝會發光？這幅 夜景相片內底，有四常 ê 光 kah 無四常 ê 光。四常 ê 光應該就是 月光，是咱熟似 ê 天體。因為觀測者是 tī 地球赤道 附近，所以月娘是 直直沉落去。月娘沉落去了後，地球大氣 內底 ê 空氣 kah 煙霧質 會散射藍光，予 反射日光 ê 衛星 tī 地平線附近看起來較紅。無四常 ê 光 應該就是 浮游生物 發--出 ê 生物光，是咱較無熟似 ê 物件。這寡 微生物 會發出藍光，應該是欲 嚇驚 捕食者。像這个例，生物光主要是 綴 海湧咧泅 ê 浮游生物，tī 海岸去予拍散去，才會發光--ê。這張相片是舊年 tī Maldives ê Soneva Fushi 島 翕--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240311/
影像：Petr Horálek / Institute of Physics in Opava
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240311.html

這是啥物天體？這是一个正常星系，毋過是坦倒 ê 側向星系。足濟盤仔型星系實際上 kah 相片 內底 ê NGC 5866 紡錘星系 平薄，毋過 ùi 咱 ê 方向來看，in 毋是坦倒--ê。其實咱閣較熟似 ê 側向星系，應該是咱 ê 銀河系。紡錘星系 ê 另外一个編號是 M102，伊有足濟足複雜 ê 塗粉帶，tī 相片內底是較暗較烏 ê 部份。星系盤內底較光 ê 恆星，予星系看起來變做是藍色--ê。咱會當 tī 哈伯 影像內底 看著有少年 恆星 ê 藍色星系盤，伊延伸 ê 範圍比這个 足薄 ê 星系盤 ê 塗粉 閣較闊。有證據講這个 紡錘 星系 tī 過去幾若十億年 ê 時間內，捌 kā 幾若个較細 ê 星系食食去。包括 幾若條較暗 ê 恆星流，離星系盤較遠 ê 烏暗塗粉，kah 踅 tī 週邊、毋過無出現 tī 相片內底 ê 星系群。一般講來，足濟 盤仔型星系會變薄，因為 形成盤仔 ê 氣體 tī 踅重力中心 ê 時陣會相挵。紡錘星系 就 tī 天龍座 方向 5000 萬 光年 遠 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240306/
影像來源：NASA, ESA, Hubble
資料處理：Ehsan Ebrahimian
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240306.html

為著欲看著日全食，你敢願意行到世界 ê 盡頭？你若是願意，到時若是有人 比你閣較早到，你敢會感覺意外？2003 年有一个特別 ê 日全食，tī 這張相片內底，日頭、月娘、南極州、kah 2 个 攝影師，攏排做一逝。就算這擺 ê 日食發生 tī 這个偏僻 ê 所在，猶是有一陣 日食愛好者，逐到世界 ê 盡頭，就是為著欲 體驗 日頭暫時消失 tī 月娘後壁 ê 超現實感受。這張相片 是 4 張無仝款 ê 數位影像 合成--ê，主要是欲模擬人類 目睭看著 ê 日食景色。翕相 ê 時陣，月娘 kah 日頭 做伙出現 tī 南極一个山陵 ê 天頂。忽然間，天色變暗去，壯觀 ê 日冕 就出現 tī 月娘 ê 邊緣。意外 ê 是，閣有 翕著 另外一位攝影師咧整理 kha-mé-lah 內底 ê 影像。倒爿是伊 貯器材 ê kha-báng kah 一隻 通 摺--起來 ê 椅仔。欲 看著 日食，較簡單 ê 方式就是 4 禮拜後 ê 4 月 8 號，日食會經過美洲一條長長狹狹 ê 路線。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240310/
影像：Fred Bruenjes (moonglow.net)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240310.html

３ 月 ３ 號透早 ê 這團氣體塗粉雲，予太空海岸 ê 觀星者看甲目睭褫金金，毋過這毋是 James Webb 太空望遠鏡 最近看著 ê 遙遠星雲。這張長焦鏡頭速翕是 獵鷹 9 號火箭 發射了後 幾若分鐘翕--ê。這是 SpaceX 公司 欲飛去國際太空站 ê 載人 8 號 任務。影像翕著第一級 kah 第二級火箭分離了後 ê 雲煙 kah 廢氣，變做是 浮 tī 烏暗夜空 ê 墨跡圖。這个美麗 ê 地球星雲 內底，倚中央下底附近 ê 光點，是 載 4 个 人去太空 ê 載人龍 奮進號太空船 ê 第二級火箭。清楚 ê 剪影內底，是 獵鷹 9 號 ê 1 號助推器，伊這馬當咧調整方向，通轉來地球 tī 美國 Canaveral 角 ê 登陸區。這台會當重複使用 ê 助推器是頭一擺完成伊 ê 助推任務。毋過 載人龍奮進號 太空艙進前就已經載人 ùi 低地球軌道 轉來 地球 4 擺矣。其實 奮進號 這个名是重複使用--ê，像進前退伍 ê 奮進號太空梭 kah 阿波羅 15 號 ê 指揮艙 嘛是。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240307/
影像：Michael Seeley
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240307.html

Tùi 北半球 ê 觀星者來講，春天愈倚，彗星 12P，嘛叫做 Pons-Brooks 彗星，就會愈來愈光。目前咱會當用細台望遠鏡 kah 雙筒千里鏡 看著 這粒 哈雷型彗星。Tī 未來幾若禮拜，伊 ê 光度會光甲咱會當直接用目睭看著。這張 取景袂䆀 ê 夜空相片，是 3 月 5 號深夜 tī Slovakia 共和國 Revuca 鎮 翕--ê。雖罔講天頂有薄薄 ê 霧，毋過咱抑是會當看著這粒彗星 青色 ê 彗鬚 kah 伊長長 ê 彗尾，出現 tī 地平線附近。仙女座星系 M31，kah 光爍爍 ê 黃色恆星 奎宿九，嘛叫做 仙女座 beta，就出現 tī 這粒彗星 ê 頂懸。仙女座星系 kah 咱銀河 ê 距離差不多是 250 萬光年。Pons-Brooks 彗星是一个週期性彗星，伊會行到內太陽系，離咱袂超過 14 光分遠 ê 所在。這粒彗星 ê 近日點會發生 tī 4 月 21，而且 tī 4 月 8 號 日全食 ê 時陣，嘛會當 tī 天頂看著伊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240309/
影像：Petr Horálek / Institute of Physics in Opava
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240309.html

蜘蛛星雲，嘛叫做 劍魚座 30，是一个直徑超過 1000 光年闊 ê 大型恆星形成區，就 chhāi tī 咱附近 ê 衛星星系 大麥哲倫星雲 內底。伊是本星系群內底上大上活潑 ê 恆星形成區，離咱差不多有 18 萬光年遠。這幅 美麗 ê 圖 是大型 ê 太空望遠鏡 kah 地面望遠鏡 ê 合成影像，這隻宇宙蜘蛛就佔滿規个視野。Tī 蜘蛛星雲 NGC 2070 內底，有強烈 ê 輻射、恆星風、kah ùi 中央大質量少年星團 R136 來 ê 超新星震波。R136 毋但 激發星雲發光，嘛 kā 星雲雕出蜘蛛形 ê 雲絲。蜘蛛星雲周邊 是其他恆星形成區，內底有少年星團、雲絲、kah 歕出來 ê 氣泡形結構。實際上，這幅圖內底閣有 近代揣著 ê、離咱上近 ê 超新星 SN 1987A，就 tī 正爿下跤遐。這个豐富 ê 視野就 tī 南天 ê 劍魚座方向 2 度闊 ê 天區，按呢差不多是 4 粒月娘 tī 天頂 ê 大細。毋過蜘蛛星雲若是離咱閣較倚咧，比論講 1500 光年遠，差不多就是咱銀河內底 ê 恆星形成區 獵戶座星雲 ê 距離，按呢這个星雲就會佔天頂一半 ê 範圍矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240308/
影像處理：Robert Gendler, Roberto Colombari；
影像資料：Hubble Tarantula Treasury, European Southern Observatory, James Webb Space Telescope, Amateur Sources
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240308.html

日頭若是消失去，你會有啥物感覺？2017 年 tī 美國各地 有足濟日食觀測者，看著日頭暫時消失 tī 月娘後壁 ê 時陣，tùi in 家己 ê 反應感覺掣一趒，因為 in tùi 這个景色感覺著 ê 是敬畏。可能本底 in 是想講，天色變暗只是一个短短 ê 時間爾爾，毋過出現 ê 景色煞 予人 無法度放袂記。這寡景色包括一目𥍉就變做暗暝 ê 天色、月盤邊緣媠甲予人袂喘氣 ê Baily 珠、粉紅仔色 ê 日珥、kah tī 規个天頂湠--開 ê 日冕。這寡細節，攏 tī 這个 2017 年 ê 日全食 3 分鐘即時影片 內底 出現。這支影片 是 tī 美國 Oregon 州 溫泉鎮 翕--ê，是用 Jun Ho Oh 特別設計 ê 設備，tī 日全食過程中，觀察日頭邊緣 ê 細節。影片欲煞 ê 時陣，日頭 會 ùi 月娘 後壁 ê 另外一爿出現、離開。後閣月 ê 4 月 18，tī 北美洲 狹狹 ê 日食帶內，會閣看著 另外一个日全食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240303/
影像：Jun Ho Oh (KAIST, HuboLab)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240303.html

Tī 這張直覺機器公司 Nova-C 月球登陸器 ê 闊幅速翕內底，液氧甲烷火箭 iăn-jín 咧噴火，Odysseus 號 登陸器 ê 停車跤才拄磕著月球表面。Tī 2 月 22 登陸月球 ê 影像內底，看會著歹去 ê 停車跤，所以登陸器才會停趨趨。Odysseus 號輕輕仔停 tī 月球表面，予這个電話亭大細 ê 登陸器通運作，收集太陽能，kā 影像 kah 資料送轉來地球。伊實際上 ê 登陸地點 是 tī 月球 ê 南極區，是 NASA ê 月球探勘號軌道衛星翕著--ê。登陸器中央控制枋頂懸 ê 美國國旗是 NASA 寄付--ê，這是過去捌參加 1970 年 阿波羅計畫 ê 物件。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240302/
影像：Intuitive Machines
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240302.html

太陽附近是發生啥物代誌？為著欲揣出這个答案，NASA 發射 Parker 機器人太陽探測器 (PSP) ，飛到比進前閣較倚太陽 ê 所在 做調查。PSP ê 循環 軌道，予伊每幾若個月就會接近太陽 一擺。這个縮時攝影影片 是舊年 PSP 第 16 擺倚近太陽 ê 時陣翕--的。這是 PSP 飛到水星軌道內底，用目尾 ùi 太陽閘仔後壁 看出去 ê 景色。PSP ê 闊幅相機 (WISPR) 翕了超過 11 工 ê 影像，毋過 tī 遮 去予數位技術 壓縮做 1 分鐘 ê 影片。綴 PSP 踅太陽行，咱會當 tī 影片內底看著咧跳舞 ê 日冕 kah 日冕物質噴射。背景閣有 飛過 ê 恆星、行星、kah 銀河系 ê 中央盤。PSP 發現講，太陽的厝邊區 實在是有夠複雜--ê，甚至 太陽磁場 會 tī 足短 ê 時間內底 翻倒反。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240219/
影片來源：NASA, JHUAPL, Naval Research Lab, Parker Solar Probe
資料處理：Avi Solomon; h/t: Richard Petarius III
音樂：Beethoven’s Symphony No. 7, Second Movement
音樂來源：Wikimedia Commons
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240219.html

這支 leh 翕地球平靜暗暝 ê 影片，是 2017 年 國際太空站 翕 ê 縮時攝影影片。愛看這款低地球軌道景色 ê 人，會當趁這个機會享受一下仔 地球大氣頂懸 厚 tut-tut ê 青色極光 kah 紅色極光。這个夜景是 ùi 北美州 ê 西北爿 翕到 東南爿，一直翕到 墨西哥灣 kah Florida 海岸。第二段影片是 leh 追蹤 歐洲城市 ê 燈火，飛過地中海，kah 北非洲 光爍爍 ê 尼羅河。Tiàm 太空站頂懸看，下底有 kah 西北雨做伙出現 ê 雷公爍爁。Tī 遠方，迵過地球表面薄薄 ê 大氣氣輝，閣會當看著天星 tùi 彎彎 ê 地平線下底 peh 起來。是講，你嘛會使隨時 tī 厝 lih 追蹤 地球這馬發生 ê 自然現象。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230617/
影片：NASA, Gateway to Astronaut Photography, ISS Expedition 53
音樂：The Low Seas (The 126ers)
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230617.html

這是一幅畫？抑是一張相片？這幅用宇宙畫筆畫 ê 天體抽象畫，畫 ê 是 厚塗粉 ê 星雲 NGC 2170，嘛叫做 天使星雲，伊就 tī 影像中央倚面頂遐 咧爍。咱看會著 NGC 2170 是因為伊反射附近 ê 高溫恆星 ê 光。伊 ê 附近閣有 藍色 反射 星雲、紅色 發射 星雲、烏暗 吸收星雲、kah 彩色 ê 背景星。就親像 抽象畫家 定定用日常生活做主題仝款，氣體雲、塗粉雲、高溫恆星嘛是 獨角獸座 (麒麟座) 這个 大質量 ê 恆星形成分子雲內底 定定出現 ê 元素。這个大型 分子雲 Mon R2 離咱是足近--ê，照估計 才 2400 光年 左右爾爾。照這个距離來算，這張 畫布 可能會超過 60 光年闊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240305/
影像：David Moulton
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240305.html

這片土地天頂是發生啥物代誌？相片內底 ê 光 毋是 極光，是 光柱，是一款較倚地表 ê 現象。運氣袂䆀 ê 人，會當 tī 地球 足濟所在看著 光柱，就是 ùi 日頭 延伸出--來 ê 光。這是 頂層大氣 ê 薄板 冰晶 反射日光造成 ê 現象。這款 冰晶 會 tī 落到地表進前，就蒸發了了。毋過氣溫若是低到結凍 ê 溫度，薄板 冰晶 可能會 tī 低層大氣形成，變做 雪，沓沓仔、輕輕仔 落落來。咱就 kā 這叫做 冰晶霧。這个時陣，這款冰晶可能會反射地面 ê 燈火，就親像是 太陽 ê 光柱。這幅影像是頂個月 tī 中國 內蒙古 ê Wulan Butong 草埔區 翕--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240304/
影像：N. D. Liao
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240304.html

這張 tī 地球澳洲 New South Wales 省翕 ê 影像內底，有 澳洲聯邦科學工業研究組織 CSIRO ê Parkes 無線電波望遠鏡，當咧指向月圓相 ê 月娘。這个直徑 64 公尺長 ê 望遠鏡就浸 tī 月色內底，伊這馬當咧接受 ùi Odysseus 號 送轉來 ê 微弱 無線電波信號。Odysseus 號是一台 2 月 22 tī 月球南極北爿 300 公里遠 ê 所在 登陸 ê 機器人登陸器。Odysseus 號 ê 登陸，予咱想起 1972 年 美國頭一擺登陸月球 ê 阿波羅 17 號任務。因為 Odysseus 號 tī 月球表面歪一爿，所以伊 ê 高接收天線煞無法度指向地球。毋過因為 Parkes 望遠鏡有夠大，閣有通改變方向 ê 接收盤，所以伊 ê 敏感度就有夠，通接收 tī 月球表面 ê 機器人登陸器 ê 實驗結果。是講 Parkes 無線電波望遠鏡 ê 接收盤 tī 1969 年阿波羅 11 號任務期間，捌變做足出名--ê。這是因為彼陣伊就有才調接收 月球 ê 電視信號，予 tī 地球 ê 人看著太空人頭一擺 tī 月球頂懸咧散步。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240301/
影像：John Sarkissian (ATNF Parkes Radio Observatory)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240301.html

凱撒大帝 tī 西元前 46 年 ê 時陣重新修定曆法。根據 Alexandria 城 ê 天文學家 Sosigenes ê 建議，新 ê 曆法包括 4 年出現一改 ê 潤日，因為地球一冬是比 365 工閣較長淡薄仔。用現代 ê 術語來講，地球踅太陽一輾需要 ê 時間是 365.24219 个平均太陽日。所以，曆日 一冬若是干焦 365 工，按呢 4 冬落來就會差一工。時到北半球就會發生 7 月出現 tī 寒天 ê 代誌。是講這个 7 月就是用 凱撒大帝 號名 ê 月份。若是每四冬加一个潤年，這款影響就會較少。1582 年 ê 時陣，天主教教宗 Pope Gregory 十三世 kā 改做尾數 00 年 ê 時陣莫潤，等到 尾數 400 ê 時陣才閣潤。這款 Gregorian 曆法 就是這馬咱咧用 ê 新曆。是講，地球月球系統 ê 潮汐摩擦力 會 kā 地球 ê 自轉速度變較慢，按呢就會予地球一工變較長，逐世紀會增加 1.4 毫秒。抑就是講，閣過 400 萬年以後，像今年這款潤年就變做無必要矣。這个羅馬龍銀 denarius ê 倒爿是 凱撒大帝 ê 頭像，正爿是 羅馬愛神 維娜斯。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240229/
影像：Classical Numismatic Group, Inc., Wikimedia
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240229.html

這个超新星震波 用一點鐘 超過 50 萬公里 ê 速度，迵過星際空間。Tī 這幅 有清楚細節 ê 彩色組合影像 中央，向頂懸徙動 ê 彼个薄薄光光、相纏做伙 ê 雲絲，實際上是 ùi 側邊看著 ê 發光氣體 ê 長波紋。1840 年代 John Herschel 爵士 發現伊，所以這个看起來狹狹 ê 星雲，嘛叫做 Herschel ê 光束。這个星雲 去予編做 NGC 2736，伊尖尖 ê 外形，予伊提著鉛筆星雲 ê 現代名。鉛筆星雲 差不多 tī 800 光年遠 ê 所在。伊差不多有 5 光年長，是 船帆座超新星殘骸 足細 ê 一部份。這个 足大 ê 船帆座殘骸 ê 直徑差不多有 100 光年長，是人類 tī 1 萬 1000 年前看著 ê 恆星 爆炸 湠出去 ê 殘骸雲。爆炸 震波 就成做這个 鉛筆星雲。上開始 ê 時陣，伊 ê 速度是一點鐘 幾若百萬公里。毋過等伊 kā 四箍圍仔 ê 星際物質掃予清氣了後，伊 ê 速度就變較慢矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240223/
影像：Helge Buesing
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240223.html

暗暝 ê 時陣，天空是按怎變暗去--ê？Tī 無仝階段，會有無仝款 ê 特殊色水 ùi 地平線湠出來。這張影像 ùi 倒爿 到 正爿，是日頭落山了後，tùi 愈來愈暗 ê 黃昏天色 連紲 翕 20 張，才 kā in ê 長條影像接起來 ê 組合影像。相片是頂個月 tī 意大利 Sicily 島 ê Syracuse 市 翕--ê，翕相 ê 方向是 日頭 ê 相對面。相片上倒爿是日落進前 ê 天空。正爿彼寡 顯目 ê 光帶，包括 金星帶、藍帶、地平帶、kah 紅帶。地球烏影 peh 起來 了後，光帶 ê 色，就會因為日光直接反射、多次反射、kah 屈折，產生無仝色。日光直接反射，是反射 地球大氣 內底 ê 空氣 kah 煙霧質。多次反射，有當時仔會 tī 產生 紅化現象 ê 日落 彼陣出現。實際上，這寡光帶可能會湠--開，變甲足歹認--ê，而且 in ê 色嘛會受著 日落附近 ê 色 ê 影響，煞改變。落尾，日頭 完全沉落去 地平線下底，天色嘛變暗去。毋過莫絕望，這規个過程會 tī 透早 日頭 peh 起來 ê 時陣，顛倒反 閣出現一擺。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240228/
影像：Dario Giannobile
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240228.html

星系相挵 ê 時陣，會生出偌濟恆星？哈伯太空望遠鏡 最近拄發表 ê 這幅影像 內底 ê 星系 AM1054-325 kā 咱講，是有幾若百萬粒。AM1054-325 kah 伊 ê 厝邊星系 互踅，是袂 kā 恆星 毀滅去，顛倒是 in 之間 ê 重力 kah 運動 會引起恆星誕生。Uì 黃色 AM1054-325 伸出來 ê 氣體殘骸，是受著其他星系 ê 重力相搝 ê 結果。Tī 遮會 tī 短時間內，發生足濟恆星形成活動。新誕生 ê 恆星，閣會激發 邊仔 ê 水素氣體，發出粉紅色 ê 光。發出 明亮藍光 ê 嬰仔恆星，定定會倚做一團，形成一个有幾若千 到 幾若百萬粒 成員星 ê 實密星團。AM1054-325 有百外粒這款明亮反藍、像光點 ê 星團，有一寡看起來敢若是真珠袚鍊。分析 紫外光波段 ê 資料發現，大部分這款恆星 ê 年歲是比 1000 萬年閣較少年，會使講 in 是 紅嬰仔時期 ê 恆星。足濟這款恆星托兒所 有可能會發展做 球形星團，內底較少年 ê 一陣恆星，甚至有可能 會脫離，形成一个較細 ê 星系。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240220/
影像來源：NASA, ESA, STScI
資料處理：J. English (U. Manitoba)
科學：M. Rodruck (Penn State U. & Randolph-Macon C.) et al.
文稿：Jayanne English (U. Manitoba).
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240220.html

你敢捌這个星座？就算伊是天頂 上好認 ê 星群之一，這个 是比 你所看著 ê 獵戶座閣較完整。這張是用數位 kha-mé-lah 對 獵戶座 長時間感光了後 閣 處理過 ê 影像。這張影像倒爿頂懸上光彼粒，是低溫紅色 ê 紅巨星 參宿四。獵戶座 內底有足濟高溫藍色恆星，包括正爿下底 ê 超巨星 參宿七、kah 伊平光 ê 參宿四、閣有正爿頂懸 ê 參宿五。獵戶座皮帶 頂懸彼三粒星，離咱 差不多 有 1500 光年 遠。In 是 ùi 獵戶座內底 ê 研究足濟 ê 星際雲 內底 生出來--ê。獵戶座皮帶下底有一片霧霧 ê 光斑，你可能知影，伊就是 獵戶座星雲，是恆星 ê 托兒所。上落尾是 目睭 勉強看會著，毋過真引人注意 ê Barnard 環。這是一个 踅 tī 獵戶座皮帶四箍圍仔 ê 大型氣體發射星雲，是 100 年前獵戶座先鋒攝影師 E. E. Barnard 發現--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240116/
影像：Michele Guzzini
音樂：P!SCO - 鼎鼎
聲優：草莓大福
翻譯：An-Li Tsai (NSYSU)
原文：https://apod.nasa.gov/apod/ap240116.html

Tī 超新星殘骸 Simeis 147 複雜交纏 ê 雲絲內底，是真簡單就會揣無路。這个有交纏雲絲 ê 星雲，嘛去予編做 Sharpless 2-240，伊閣有一个偏名叫做 意大利麵星雲。伊 就 tī 金牛座 kah 御夫座 ê 交界。複雜 ê 氣體結構 tī 天頂 迒過 3 度 闊，差不多是 6 粒 月娘 tī 天頂 ê 大細。這團 恆星屑仔雲 ê 大細，照估計 ê 距離 3000 光年 來算，差不多是 150 光年 闊。這幅組合影像 是 kā 獨立 ê 狹頻濾鏡，包括 水素 發射線（紅色）kah 酸素 發射線（藍色）組合起來的結果。超新星 殘骸 ê 年歲，估計是 4 萬歲，意思是講，這个大質量恆星爆炸了後第一時間發出 ê 光，來到 地球 ê 時間，差不多是 4 萬年前。彼个時陣，長毛象 猶 tī 地球頂懸賴賴趖。這个 宇宙災難 毋但產生湠出去 ê 殘骸，閣有留一粒 脈動星 落來。脈動星是一个會自旋 ê 中子星，是 uì 恆星核心留落來 ê 殘骸。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240227/
影像：Stéphane Vetter (Nuits sacrées)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240227.html

天頂若是有兩粒月娘，而且 in 互相 kā 另外一粒閘去，會是啥物狀況？這款狀況就發生 tī 火星。這支影片 就紀錄著太空中這款無四常 ê 現象。相片內底 是火星 ê 兩粒衛星。較大粒 ê 是 火衛一 Phobos，伊踅這粒紅色行星 ê 軌道較近。較細粒 ê 是 火衛二 Deimos，伊踅 ê 軌道較遠。這个系列影像 是舊年 歐洲太空總署 ESA 一台踅 火星 ê 機器人太空船 火星快車號 翕--ê。火星表面嘛 會當看著互食景色，毋過較罕得看著。Ùi 火星表面看，較倚 ê 衛星 Phobos 會 ùi 較遠 ê 衛星 Deimos 面頭前行過。較趣味 ê 是，Phobos 踅火星是遮爾倚，所以伊 ê 公轉週期煞比火星 ê 自轉週期閣較緊。Kah 地球 ê 月娘 相比，變做是西爿 peh 起來，東爿沉落去，就親像是 Phobos tī 天頂咧 倒退攄。Phobos 是上倚火星 ê 衛星，伊踅火星 ê 速度是遮爾緊，緊甲逐工會 ùi 火星天頂經過 3 擺。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240226/
影片來源：ESA, DLR, FU Berlin, Mars Express
資料處理 & CC BY 2.0 License: Andrea Luck
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240226.html

直覺機器公司 ê 機器人登陸器 Odysseus tī 1972 年 Apollo 17 號任務 ê 時陣，完成美國頭一擺登陸月球 ê 任務 。2 月 15 ê 時陣，SpaceX 公司發射火箭，kā 電話亭大細 ê 登陸器送入去月球軌道，tī 美國東部時間 2 月 22 下晡 6：23，成功降落 tī 月球表面。伊 ê 降落區是 月球南極北 爿 300 公里遠 ê 所在，tī 一个叫做 Malapert A ê 隕石坑。目前這台登陸器停 tī 邊仔。伊這馬 當咧收集太陽能，kā 資料送轉來直覺機器公司 tī Houston ê 任務控制中心。這个任務 是人類頭一个做商業使用 ê 無載人任務。降落進前，Odysseus ê kha-mé-lah 翕著這張超級闊幅 ê 影像。停車跤 就 tī 正爿遐。伊這馬當咧飛過 Schomberger ê 隕石坑，離降落地點猶有 200 公里 ê 距離。Odysseus 號就飛 tī 月球表面 10 公里懸 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240224/
影像：Intuitive Machines
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240224.html

大閣光 ê 美麗 捲螺仔星系 Messier 106 是這張宇宙影像 ê 主題。這張 2 度闊 ê 望遠鏡景色，是看 tùi 北斗星 湯匙柄 附近 ê 獵犬座。M106 嘛去予編做 NGC 4258，差不多有 8 萬光年闊，2350 萬光年遠，伊是 獵犬 II 星系群 上大粒 ê 成員。Tùi 一个足遠 ê 星系來講，M106 ê 距離是量甲足準--ê。這是因為伊會當利用 星系 ê 微波雷射，直接量著 星系 ê 距離。這款罕得看著、毋過會自然發生 ê 微波雷射，是 活跳星系核 ê 分子雲內底 ê 水分子發出來--ê。視野內底另外一个足顯目 ê 捲螺仔星系，是 M106 正爿下底 ê NGC 4217，這是一个差不多完全坦倒 ê 側向星系。NGC 4217 ê 距離就量較無遐爾準，差不多是 6000 萬光年遠。視野內底 ê 光針 是前景 ê 恆星，in 就 tī 咱銀河系內底。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240222/
影像：Kyunghoon Lim
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240222.html

這隻鳥仔是比這粒山頭閣較大。海鷗星雲 會叫這个名是因為伊 ê 外形 就親像是一隻鳥仔。伊是一个發射星雲，tī 夜空中是 足闊--ê，伊 ê 角寸尺是 規粒月娘 ê 5 倍大以上，按呢差不多有 200 光年 大。海鷗星雲 ê 頭，編號是 IC 2177，正爿 ê 翼 下底 是一个星團，編號是 NGC 2343。海鷗星雲 主要 ê 成份是發紅光 ê 水素 氣體，內底閣有一寡塗粉帶，當咧形成 恆星。山頭頂懸這隻海鷗，就敢若是 tī 美國 加州 ê 山尖國家公園 頂懸咧飛。這幅影像，是 kā 長時間感光 ê 背景 佮 短時間感光 ê 前景 組合起來--ê。兩張攏是用仝一台 kha-mé-lah，tī 仝一个地點翕--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240221/
影像：Dheera Venkatraman
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240221.html

這是一个 抑是 兩个星系？這个問題出現 tī 1950 年，彼陣 ê 天文學家 Arthur Hoag 雄雄發現這个無四常 ê 銀河系外天體。外箍圍仔主要是藍色恆星組成--ê，中央核球主要是較老 ê 紅色恆星，in 之間是一个 o͘-mih-mà ê 縫。Hoag 天體 是 按怎形成--ê？是按怎伊有這个 會當講是完美 ê 圓箍仔？到今咱猶毋知。是講，這个圓箍仔內底，攏是恆星 kah 氣體。Kah 起源有關係 ê 假說 講，星系 tī 幾若十億年前 相挵 了後，重力改變造成星系中心 ê 星系棍仔 消失 去矣。這張相片 是 哈伯太空望遠鏡 翕--ê，了後用 人工智慧 ê 演算法 kā 背景雜訊刣掉，才閣重新處理過--ê。無線電波波段 ê 觀測表示講，Hoag 天體 tī 過去 幾若十億年 ê 時間內，並無 吸積 一个較細 ê 星系。Hoag 天體 差不多有 10 萬 光年 大，伊就 chhāi tī 蛇 ê 星座 (巨蛇座) 方向 6 億 光年 遠 ê 所在。咱閣會當看著 tī 影像正爿有足濟遙遠 ê 星系，而且真拄仔好，7 點鐘方向閣有另外一个較遠 ê 圓箍仔星系。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240218/
影像來源：NASA, ESA, Hubble
資料處理：Benoit Blanco
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240218.html

看極光 ê 人攏轉去矣！佇 冰島 九月一个安靜 ê 暗暝，半暝三點半，大部份 ê 極光攏已經消失矣。忽然間煞出現一陣新爆發 ê 粒子對天頂瀉落來，閣再 kā 地球 ê 大氣層 照予光。這个時陣，雄雄煞看著天頂 親像是 予一隻 非常 大隻 ê 鳳凰 kā 夜空照予光。用準備好 ê kha-mé-lah tùi 天頂趕緊翕兩張，閣加翕一張地景。Tī 後壁 ê 山頭是 Helgafell 山，tī 頭前 ê 河川是 Kaldá 河，兩个攏離冰島首都 Reykjavík 北爿 30 外公里遠。有經驗 ê 觀星者 to̍h 認會出 tī 山頂倒爿 ê 獵戶座。昴宿 星團 嘛 tī 相片中央面頂看會著。2016 年 ê 極光，干焦有一分鐘久，而且隨無去。若是無這張 數位組合相片，可能會予人當做是咧 臭彈。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240225/
影像：Hallgrimur P. Helgason
圖標：Judy Schmidt
音樂：P!SCO - 鼎鼎
聲優：陳威盛
翻譯：An-Li Tsai (NSYSU)
原文：https://apod.nasa.gov/apod/ap240225.html

一粒宇宙塗粉粒 ùi 太空軁入去 咱地球 ê 頂層大氣。伊落落來 ê 速度，kah 樹葉仔落 tùi 塗跤 ê 速度相比，是緊足濟--ê，所以咱才看會著這个光爍爍 ê 流星軌跡。這幅美麗 ê 夜空景色，是 2 月 8 號暗暝 tī Naples 海灣 ê 度假勝地 Capri 島 ê 時陣，拄仔好翕著--ê。Kha-mé-lah 面向 東北爿 ê Naples kah 伊週邊 ê 城市，kā 規个海灣攏翕起來。這逝 流星軌跡 指向地平線 ê 方向，拄仔好 tī Vesuvius 火山 ê 剪影 頂懸結束。Vesuvius 火山是地球頂懸上有名 ê 火山 之一，伊 tī 西元 79 年 噴發，kā 龐貝城 吞去矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240217/
影像：Wang Letian (Eyes at Night)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240217.html

彗星 12P/Pons-Brooks tī 4 月 21 ê 時陣，會閣再行到近日點，所以伊紲落來會愈來愈光。這粒 哈雷型 ê 週期彗星有青色 ê 彗鬚，咱這馬已經會當用細台望遠鏡看著伊矣。這粒活跳跳 ê 彗星有 藍色 ê 離子尾溜，這是去予 太陽風 歕出來 ê 彗鬚，較暗、嘛較歹看著。這張影像 是 kā 2 月 11 暗暝幾若張感光影像疊起來 ê 結果，才會當看著這个足暗 ê 尾溜，kah 伊 ê 詳細結構。這張影像有 2 度闊，內底有暗暗 ê 恆星、背景星系，就 tī 北天 ê 蝎虎座 方向。是講，彗星 12P tī 4 月 21 近日點 ê 時陣，kah 發生 tī 4 月 8 號 ê 日全食，才差 2 禮拜爾爾。時到，地球天頂會同齊出現彗星 kah 日全食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240216/
影像：Dan Bartlett
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240216.html

你敢揣會著玫瑰星雲？相片倒爿頂懸彼个大閣 紅、看起來敢若一蕊花 ê 星雲，是逐家上愛翕 ê 天體。毋過，其實伊是 踅 tī 圓錐星雲 kah 狐狸皮星雲 四箍圍仔 ê 水素 發射線。這个有名 ê 玫瑰星雲，就 chhāi tī 正爿下底，kah 其他星雲 相連。星雲 kah 星雲 之間，是一寡無固定形體 ê 雲絲。因為 這張 玫瑰星雲 ê 影像是 足闊閣足深，所以伊看起來，敢若閣有足濟蕊花 tī 內底。玫瑰星雲去予編做 NGC 2237，伊 ê 中心 是開放星團 NGC 2244，這是一个有足濟 足光藍光星 ê 星團。In ê 恆星風 kah 高能恆星光，kā 星雲中心 ê 物質掃甲清氣清氣。玫瑰星雲 kah 咱 ê 距離 是 5000 光年，伊 ê 視寸尺差不多是 規粒月娘 ê 3 倍大。這个天頂 ê 花園，就 tī 釘仔馬 座（麒麟座）ê 方向遐。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240214/
影像：Olivier Bernard & Philippe Bernhard
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240214.html

孤張感光相片翕做這款，是愛先計畫好勢才有法度。第一步愛先了解這款 三項排做一逝 ê 美麗現象確實會發生。第二步是愛揣著上好 ê 翕相地點。毋過第三步是上困難--ê：愛 拄著好天，tī 拄仔好 ê 時間翕。攝影師 tī 6 年內翕 5 擺，逐擺攏 歹天。落尾，10 工前 ê 天氣 總算袂䆀，攝影師 ê 夢想總是達成矣！這張 tī 意大利 Piemonte 翕--ê。前景 ê 教堂是 Basilica of Superga，中央 ê 山 是 Monviso，背景就是 你知影 ê 月娘。Tī 這張相片內底，本底攝影師干焦翕著 欲落去 ê 月眉形 月娘，毋過因為感光時間傷長，去予兩重反射 ê 地球光，嘛叫做 da Vinci ê 光 影響著，煞 kā 月娘 ê 頂半爿照予光矣！

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231225/
影像：Valerio Minato
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231225.html

仙后座 內 ê 行星形星雲 HFG1 kah Abell 6，是像 太陽 這款 中型恆星 tī 性命上尾 ê 階段 留落來 ê 殘骸。就算 行星形星雲 ê 形體看起來有成 行星，in 兩个是完全無關係。相片 倒爿下底 ê HFG1 是 雙星系統 V664 Cas。這个系統是一粒 白矮星 kah 一粒 紅巨星 組成--ê。這兩粒踅 in 共同 ê 質量中心 咧行，週期差不多是 半工 ê 地球日。V664 Cas 用 比 地球頂懸上緊火車 300 倍 閣較緊 ê 速度，chhōa 規个星雲做伙行，產生 藍色 ê 弧形 震波。這个波 kah 四箍圍仔 星際媒介物 產生作用，作用上強 ê 部份，就會產生 上光 ê 弧形震波。差不多過 1 萬年 了後，產生星雲 ê 恆星發出 ê 紫外光 減弱，行星形星雲 就會變甲看無。行星形星雲有 美麗 ê 形體 kah 結構，所以是天文攝影師 足愛翕 ê 天體。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240212/
影像Julien Cadena & Mickael Coulon
文稿：Natalia Lewandowska (SUNY Oswego)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240212.html

光爍爍 ê NGC 253 是天頂上光--ê，嘛是上厚塗粉 ê 捲螺仔星系之一。有人 kā 叫做 龍銀星系，這是伊 tī 細台望遠鏡內底 看起來 ê 形體。嘛有人 kā 叫做 玉夫座星系，因為伊就 tī 南天 ê 玉夫座內底。這个厚塗粉 ê 島宇宙就 tī 1000 萬光年遠 ê 所在。伊是 1783 年，一个數學家兼天文學家 Caroline Herschel 發現--ê。NGC 253 差不多有 7 萬光年大，是 玉夫座星系群 內底上大粒 ê 成員。玉夫座星系群是離咱 本星系群 上近 ê 星系群。Tī 這張彩色 ê 星系影像 內底，除了捲螺仔星系頂懸 ê 塗粉帶以外，星系盤 內底 ê 少年星團 kah 恆星形成區，嘛充滿 坱 phōng-phōng ê 塗粉。遮爾濟塗粉 kah 激烈 ê 恆星形成活動，予 NGC 253 成做一个 星爆星系。NGC 253 嘛是一个有強烈 高能 X 光 kah gamma 光 ê 發射源，這真有可能是因為這个星系中心附近有一寡大質量烏洞。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240215/
影像：Steve Crouch
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240215.html

頂個月你敢有看著月圓？平均來講，地球 天頂逐個月攏會出現一擺 月圓。這是因為 月球 踅伊 ê 母行星 一輾，愛開 一個月 ê 時間，這會經過一个完整 ê 月相 週期。了後，伊會閣轉來用伊去予日光照予光 ê 彼半爿，面對地球。Tī 足濟 原住民文化內底，每一个月圓攏有一个名，頂擺 ê 月圓，有叫做 冰月--ê、O͘-thá-khuh 月--ê、嘛有叫做 恬月--ê。新曆 ê 一月，有一寡文化嘛 kā 頭一个月圓號做 狼月，算是對這个會吼 ê 有名動物 致敬。這張 頂個月 ê 狼月，是 tī 意大利 Alps 山脈翕--ê，是 kā 長時間 kah 短時間 ê 感光影像合成 ê 相片。這張影像會遮爾 引人注目，是因為 tùi 一寡人來講，踅 tī 月娘四箍圍仔 ê 雲，就親像是狼 ê 喙，欲 kā 狼月 吞落去。毋過嘛有人認為講，這是狼 ê 目睭。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240213/
影像：Antoni Zegarski
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240213.html

是按怎 火箭發射，煙 ê 烏影 會指向月娘？2001 年初，Atlantis 號 太空梭 發射 ê 時陣，太陽、地球、月球、kah 火箭，拄仔好 排做一逝，才有這張相片。欲翕出這張相片，代先，太空梭 發射，煙愛投影出長長 ê 烏影，時間愛 tī 日出 抑是 日落 前後。干焦 tī 這款時間，烏影 會搝甲上長，伸 tùi 地平線彼爿去。落尾，若是去拄著 月圓，日頭 kah 月娘 會出現 tī 天頂無仝爿。日落 了後，日頭拄沉落去 地平線 下底，月娘會 ùi 另外一爿 ê 地平線 浮出來。所以，Atlantis 號太空梭若是 tī 月圓彼工，等到日落了後才發射，伊 ê 烏影就會投影 tī kah 日頭 相對面、拄 ùi 地平線 peh 起來 ê 月圓 方向。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240211/
影像：Pat McCracken, NASA
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240211.html

冥王星的真實色彩（客語版）

<華文版翻譯>

冥王星是什麼顏色呢？真的是你看到的這樣嗎？科學家花了一些時間才找到答案。就算新視野號機器人太空船在 2015年的時候飛過冥王星，把冥王星的影像送回地球，不過要處理這些多光譜資料，對人類眼睛來說，仍然是一件不簡單的事情。新視野號太空船拿到原始資料 3 年以後，公佈他們處理的結果，就在這。這是目前為止，冥王星最高解析度的真實色彩影像。我們能看到影像裡面顏色較淺、心型的部份，叫做 Tombaugh 區。西半球是充滿氮冰、意想不到很平的 Sputnik 高原。 新視野號找到這顆矮行星的時候，發現她有好幾區的顏色不太一致，這是因為她有非常複雜的表面。不過整體來說，冥王星主要是咖啡色的。一部分比較暗的顏色，主要是太陽的紫外光把冥王星表面少量甲烷 激發，才會看起來是這樣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240128/
影像來源：NASA, JHU APL, SwRI
資料處理: Alex Parker
音樂：P!SCO - 鼎鼎
聲優：客語主播許儷齡
翻譯：An-Li Tsai (NSYSU)
原文：https://apod.nasa.gov/apod/ap240128.html

冥王星是啥物色--ê？敢真正是按呢？科學家開一寡時間才揣著答案。就算 新視野號 機器人太空船 tī 2015 年 ê 時陣 飛過 冥王星 ，kā 冥王星 ê 影像攏 送轉來，毋閣欲處理這寡 多光譜 資料，tùi 人類目睭 來講，猶是一項無簡單 ê 代誌。新視野號 太空船提著 原始資料 3 年以後，公佈 in 處理了後 ê 結果，就 tī 遮。這是目前為止，冥王星 上懸解析度 ê 誠實色水影像。咱會當看著影像內底 色較淺、心臟形 ê 部份，叫做 Tombaugh 區。西半球是充滿 窒素 冰、意外足平 ê Sputnik 高原。新視野號揣著這粒 矮行星 ê 時陣，發現伊幾若區 ê 色水無啥齊，這是因為伊有 足複雜 ê 表面。毋閣總體來講，冥王星 主要是咖啡色--ê。一部份較暗 ê 色，主要是太陽 ê 紫外光 kā 冥王星表面 ê 少量 甲烷 激發，才會按呢。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240128/
影像來源：NASA, JHU APL, SwRI
資料處理: Alex Parker
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap240128.html

2024 年 1 月 18，是自動控制 ê 火星獨創號直升機 第 72 擺 tī 火星薄薄 ê 大氣層內底飛。伊飛到這粒 紅色行星頂懸 12 公尺懸 ê 所在，停 4.5 秒鐘 ê 時間。獨創號 ê 第 72 擺降落並無順利。降落 ê 過程，伊 kah 毅力號探測車 tī 火星表面 1 公尺懸 ê 所在失去聯絡。等有通重新聯絡了後，獨創號才會使送這寡影像轉來。相片是其中一片車葉仔 ê 烏影，可能是 tī 降落過程創歹去矣。所以，這个歷史上有名 ê 獨創號，就 tī 這 1000 外工探索火星了後，結束伊 ê 飛行任務，超過本底按算 欲飛 ê 時間閣較久。火星獨創號直升機 ê 小名叫做 Ginny。2021 年 4 月 19 開始，伊就是地球以外行星，頭一台會當控制 ê 飛行器。發射進前，獨創號 ê 太陽能枋 下底，閣黏一塊 人類歷史上頭一台動力控制 ê 飛龍機，Wright 兄弟 1 號，倒爿下底機翼 ê 材料。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240210/
影像：NASA, JPL-Caltech, Ingenuity
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240210.html

毋是所有 ê 玫瑰就 一定 是紅色--ê，毋過 in 猶是遐爾媠。美麗 ê 玫瑰星雲 kah 其他恆星形成區 ê 天文影像，定定攏是紅色--ê，這因為 in ê 色 主要是 ùi 星雲內底 ê 水素原子 發射線來--ê。水素是上強 ê 可見光發射線，叫做 H-alpha，是光譜內底倚紅光 ê 部份。毋過發射星雲 無一定愛紅色才會媠。星雲內底 ê 其他原子，嘛會去予高能恆星光 kā 激發，產生狹頻發射線。這張玫瑰星雲 ê 特寫影像，是 kā 狹頻影像 用 闊頻色水來表示。紅色是硫磺原子，青色是水素，藍色是酸素。實際上，這款 kā 狹頻原子發射線 (SHO) 轉做 闊頻色水 (RGB) ê 方式，定定 tī 哈伯太空望遠鏡 翕 ê 發射星雲影像內底用著。這張影像是 玫瑰星雲 ê 中央，差不多有 50 光年闊。這个星雲就 tī 麒麟座方向 3000 光年遠 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240209/
影像：Tommy Lease (Denver Astronomical Society)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240209.html

這个星系是有啥物特別？會使講是無。這个 西班牙舞者星系，NGC 1566，會使講是天頂上典型、上食相 ê 捲螺仔星系 之一。毋過 這張相片 是有一寡無仝，因為這是一張對角線兩爿相鬥 ê 相片。倒爿頂懸是 哈伯太空望遠鏡 翕--ê，正爿下底是 韋伯太空望遠鏡 翕--ê。哈伯影像 是 紫外光波段 ê 影像，有翕著這个星系壯觀 ê 捲螺仔手骨，kah 伊頂懸 足光 ê 藍色恆星 kah 烏暗塗粉 tī--lih ê 所在。相對來講，韋伯影像 是 紅外線波段 ê 影像，翕 ê 是 仝款這寡塗粉，毋過發出 ê 光 比吸收 ê 光較強。若是用滑鼠趨過這張影像，兩爿影像就會出現另外彼半張。2 張影像切來切去，就會當看著一寡溫度較懸 ê 恆星，因為 in tī 紫外光波段較光。閣會當看著一寡 tī 紫外光波段 看起來無物件 ê 空間，tī 紅外線波段煞變做咧發光 ê 塗粉。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240206/
影像：NASA, ESA, CSA, STScI, J. Lee (STScI), T. Williams (Oxford), R. Chandar (UToledo), D. Calzetti (UMass), PHANGS Team
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240206.html

船底座星雲 ê 核心是發生啥物代誌？有恆星形成，死亡，留一大片 干焦地毯 ê 烏暗塗粉絲落來。規个 船底座星雲 去予編做 NGC 3372，伊有 300 光年 闊，就 tī 船底 座 方向 8500 光年遠 ê所在。這个星雲主要是 水素 氣體組成--ê，所以 這張 有清楚細節 ê 相片中央才會 發出紅光 kah 柑仔色 ê 光。週邊 ê 藍光 主要是 微量 ê 酸素 來--ê。星雲中央 ê 大質量 少年 恆星未來若是變做超新星爆炸，會 噴出大量塗粉。海山二（嘛叫做船底座 Eta）是星雲中心能量上懸 ê 恆星，嘛是 1830 年代 天頂上光 ê 天星，毋過了後伊煞 忽然間變暗去 矣！

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240205/
影像：Carlos Taylor
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240205.html

一陣恆星 tī 一个叫做 圓錐星雲 ê 大塗粉柱內底當咧形成。Tī 恆星托兒所內底，拄生出來 ê 恆星 ê 高能恆星風 kā 氣體塗粉雲雕做圓錐形、柱仔形、kah 壯觀 ê 水流形。一个有名 ê 例就是 圓錐星雲，伊就 chhāi tī 銀河內底一个足光足大 ê 恆星形成區 NGC 2264 內底。這張目前為止有上清楚細節 ê 圓錐星雲 特寫相片，是 kā 踅地球咧行 ê 哈伯太空望遠鏡 幾若擺觀測 ê 結果疊出來 ê。圓錐星雲 tī 麒麟座 內底，離咱差不多 2500 光年 遠。伊 ê 大細差不多有 7 光年長，毋過 相片內底 是圓錐星雲 ê 頭，才佔 2.5 光年長爾爾。伊就 chhāi tī 咱銀河 ê 頷頸區，這个距離才比咱太陽 kah 伊上倚 ê 厝邊恆星系統 半人馬座 Alpha 距離 ê 一半較加爾爾。1997 年哈伯紅外線 kha-mé-lah 翕著 ê 大質量恆星 NGC 2264 IRS，就 tī 相片頂懸，伊可能就是 kā 圓錐星雲 雕出來 ê 恆星風 ê 源頭。圓錐星雲 ê 紅色面紗，是塗粉 kah 發光 ê 水素氣體發出來 ê 光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240204/
影像來源：Hubble Legacy Archive, NASA, ESA
資料處理 & 許可: Judy Schmidt
音樂：P!SCO - 鼎鼎
聲優：蔡老師
翻譯：An-Li Tsai (NSYSU)
原文：https://apod.nasa.gov/apod/ap240204.html

球形星團 杜鵑 47 是南半球 ê 珠寶。伊 嘛叫做 NGC 104，kah 其他 200 个 球形星團，做伙 tī 咱銀河系 ê 銀暈內底咧散步。杜鵑 47 是咱地球天頂第二光 ê 球形星團，比 半人馬座 Omega 較暗，離咱有 1 萬 3000 光年遠。咱會當直接用目睭 tī 杜鵑座 方向 ê 小麥哲倫星雲 附近揣著伊。這个實密 ê 星團是幾若十萬粒 恆星 組成--ê，伊 ê 大細差不多是 120 光年闊。Tī 這張 清楚 ê 望遠鏡影像 內底，咱會當真簡單就揣著 紅巨星，in 就是星團外圍彼寡反黃 ê 恆星。懸密度 ê 球形星團 杜鵑 47，其中有一粒恆星踅中央烏洞咧行 ê 軌道，是目前為止咱知影 kah 烏洞距離上倚--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240208/
影像：Marco Lorenzi, Angus Lau, Tommy Tse
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240208.html

這 2 个星系敢真正咧互相吸引？是真--ê 啦！In 是 重力相吸，才會造成這馬你看著 ê 這个足有名 ê 大型 心形 外觀。相片 內底是一組叫做 蝶仔鬚星系 ê 星系對，編號是 NGC 4038 kah NGC 4039。因為 in kah 咱 才 6000 萬 光年 遠爾爾，以 星際尺度 ê 標準 來看，算是足近--ê。In 是夜空中 科學家足愛研究 ê 交互作用星系。In 之間產生 足強 ê 吸引作用，是差不多 ùi 10 億年前開始--ê，彼馬 in 2 个是相閃身撇過。雖罔講這 2 个 星系 之間有交互作用，毋過 in 內底 ê 恆星 煞無啥會相挵。內底會有新形成 ê 恆星，主要是 因為星際氣體相碰。比論講，ùi 這對 舞伴 兩爿伸出來 ê 長長 ê 蝶仔鬚 頂懸，就有一寡新形成 ê 恆星。這个時陣 星系合併 已經完成矣，這差不多是 10 億年前，幾若 10 億粒恆星嘛可能已經形成矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240207/
影像：Kent E. Biggs
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240207.html

阿波羅 14 號 ê 登月小艇 Antares tī 1971 年 2 月 5 號 登陸月球。Tī 欲結束 ê 時陣，太空人 Ed Mitchell ùi 窗仔 tùi 月球表面 連紲翕幾若張相。了後，阿波羅月球表面期刊 ê 編輯 Eric Jones 才 kā in 組合 做這張詳細 ê 拼接圖。這個景色是登陸地點 ê 西北爿，Fra Mauro 高地，是阿波羅 14 號太空人 tī in 第二擺，嘛是上尾一擺 tī 月球面頂行路 了後翕 ê。前景彼台大台 ê，是登陸小艇 ê 設備運輸車。這是一個有兩輪 ê、kah 人力車欲仝 ê 設備，是用來送傢俬 kah 標本用 ê。Tī 這張影像頂面中央 ê 地平線附近，是一粒 1.5 公尺大 ê 闊岩石，號做龜岩。Tī 龜岩下面較淺 ê 隕石坑內底，彼支長長 ê，是採集標本 ê 機械 ê 白色手扞仔。Mitchell kā 擲 tī 遐，就敢若咧射標槍仝款。Kah Mitchell tī 月球 做伙做伴 ê，是第一個 tī 太空 ê 美國人 Alan Shepard。伊嘛凊彩提一支，kā 當做是 go͘-lú-huh (golf) 6 號鐵箠，摃 兩粒 go͘-lú-huh 球 咧耍。其中一粒 go͘-lú-huh 球，to̍h tī Mitchell 擲 ê 標槍下跤，就是彼粒白點 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240203/
影像來源：Edgar Mitchell,Apollo 14, NASA
影像拼鬥：Eric M. Jones
音樂：P!SCO - 鼎鼎
聲優：蔡老師
翻譯：An-Li Tsai (NSYSU)
原文：https://apod.nasa.gov/apod/ap240203.html

這个 tī 荷蘭好天暗暝用天文望遠鏡狹頻濾鏡翕--ê 宇宙景色，是一个足暗 ê 發射星雲 IC 410。Tī 中央正爿頂懸遐，你會當看著 氣體 kah 塗粉組成 ê 星際水池內底，有 2 个特別 ê 居民，in 就叫做 IC 410 ê 肚胿仔。這个星雲一部份 去予 前景 ê 塗粉 閘去矣，伊就踅 tī NGC 1893 ê 四箍圍仔。NGC 1893 是一个少年 ê 星系團。星際雲才拄 tī 400 萬年前形成--ê。這个 足燒、足光 ê 星團 kā 週邊 ê 氣體激發，才會發光。這个肚胿仔 是 實密 ê 冷氣體 kah 塗粉組成 ê 雲球。伊 ê 大細有 10 光年遐爾長，可能當咧進行 恆星形成。恆星風 kah 輻射 雕出這个肚胿仔 ê 形體。頭殼 ê 部份是 離子氣體組成、看起來較光 ê 山陵，尾溜 ê 部份是欲離開 由 少年恆星組成 ê 星團中心。IC 410 kah 藏 tī 內底 ê NGC 1893 就 tī 厚星雲 ê 御夫座方向，差不多 1 萬光年遠 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240202/
影像：Sander de Jong
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240202.html

棍螺仔星系 NGC 1365 是一个足媠 ê 島宇宙，伊 ê 大細差不多有 20 萬光年闊。NGC 1365 就 tī 暗暗毋過燒燒 ê 天爐座方向，離咱干焦 6000 萬光年 ê 距離，是 足濟人研究過 ê 天爐座星系團 內底 主要 ê 成員 之一。Tī 這張 清楚 ê 彩色影像 內底，咱會當看著 星系中心棍仔尾 kah 捲螺仔手骨頂懸，有強烈、反紅 ê 恆星形成區。咱嘛會當看著有清楚細節、會閘光 ê 塗粉帶，迒過 星系 ê 明亮核心。這个星系 ê 核心有藏一粒超大質量烏洞。天文學家認為講，NGC 1365 顯目 ê 棍仔 tī 星系演化 ê 過程中，代表一个關鍵 ê 角色。伊會 kā 氣體 kah 塗粉搝綴 恆星形成區去，落尾攏去予 中央 ê 烏洞 食食去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240201/
資料處理：Jean-Baptiste Auroux
資料來源：Mike Selby
音樂：P!SCO - 鼎鼎
聲優：阿勻
翻譯：An-Li Tsai (NSYSU)
原文：https://apod.nasa.gov/apod/ap240201.html

月娘 kah 山敢會投影出類似 ê 影？會呢！毋閣 光 kah 暗 ê 邊界無一定愛對予齊齊。這張相片是 2022 年 10 月初翕--ê，是 意大利 Grivola 山 kah 天頂 ê 頂半月。日頭就 tī 這幅構圖 ê 正爿，kā 月娘 ê 正爿照予光，嘛仝款 kā 山 ê 正爿照予光。這款 月相 叫做「半月」，是因為伊去予日光照著 ê 彼爿，tī 地球 頂懸 看著 ê 部份，佔規个月表 ê 4 分 1。用數位技術處理這个孤張感光影像了後，會當閣較清楚看著這兩項 大項 物件。地球逐工自轉 一輾，所以欲翕著 半月 ê 晨昏線 kah 直直直 ê 山陵 排 tiàm 仝一條線，時間就愛掠較絚咧。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240122/
影像：Enzo Massa Micon
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240122.html

12 月 28 暗暝，美國 Florida 州 Kennedy 太空中心發射 獵鷹號載重火箭，這是這个火箭會當重複使用 ê 側助推器 ê 第 5 擺發射。飛了 2 分鐘 20 秒了後，兩爿 ê 側助推器 就 kah 火箭 ê 核心級分--開。這張 感光 3 分鐘 ê 相片，就紀錄著 kah 助推器分--開了後，欲轉來地球 降落區 進前 ê 精彩 回航噴射。雖罔講本底無按算欲 kā 獵鷹號載重火箭 ê 核心級收轉來閣再用，毋閣兩个側助推器攏成功降落，會當閣再飛。這寡側助推器進前 ê 4 擺飛行，包括 舊年 10 月 ê 時陣，發射 NASA 欲飛去小行星 ê 靈神星任務。後一个飛行計畫是 Europa 快船任務，按算欲 tī 2024 年 10 月發射。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240120/
影像：Dennis Huff
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240120.html

金牛座 Epsilon，嘛叫做 畢宿一，kah 咱 ê 距離有 146 光年遐爾遠。金牛座 Epsilon 是一粒 K 型 ê 紅巨星，溫度比太陽較低，毋閣半徑是太陽 ê 13 倍大，光度差不多是太陽 ê 100 倍光。這粒巨星 閣有一个名叫做 Ain，是 畢宿 開放星團 ê 成員之一，kah 閣較光 ê 巨星 畢宿五，成做 金牛 ê 目睭。金牛座 Epsilon 就 tī 金牛座 厚塗粉 ê 烏暗雲內底。咱知影講，伊嘛有一粒行星。這粒行星叫做 金牛座 Epsilon b，是一粒氣體巨行星，是利用 徑向速度 測量法 tī 2006 年揣著--ê。伊比木星閣較大粒，伊 ê 軌道週期是 1.6 年。雖罔講 系外行星 無法道直接看著，毋閣 tī 深夜 欲直接用目睭揣伊 ê 母恆星 金牛座 Epsilon，是一件真簡單 ê 代誌。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240126/
影像：Reg Pratt
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240126.html

這張多彩 ê 恬靜夜空，是今年 冬節 tī 地球 南半球紐西蘭翕--ê 8 分鐘感光相片。向南方看過去，就 tī 相片頂懸遐，會看著恆星 tī 天頂有短短 ê 仝心弧軌跡，踅 地球 ê 南天極 咧行。相片中心 ê 倒爿頂懸，是 南十字星群 ê 軌跡 kah 銀河 ê 烏斑，火炭橐仔星雲。其中，半人馬座 Alpha kah Beta 較光 ê 黃色軌跡 kah 藍色軌跡，反射 tī Otago 半島 ê 南島 ê 太平洋海岸，Hoopers 灣，ê 海面上。12 月 短短 ê 熱天暗暝，南極光 嘛 tī 山崙天頂發出青光 kah 紅光。極光是 頂層大氣 ê 原子 kah 分子 kah 高能粒子相挵了後激發，發出 ê 光。頂層大氣 ê 光，kah 極光無仝。伊出現 tī 相片倒爿頂懸 ê 對角線，是受著 日光激發 產生 ê 連紲化學反應，才會發出淺色 ê 青色輝光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231223/
影像：Ian Griffin (Otago Museum)
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231223.html

你可能無法度隨認出這張 tī 地球 頂懸 芬蘭 Jyväskylä 市內底 ê 市區地圖。毋閣，這可能是因為這張 1 月 16 ê 地圖是投影 tī 夜空中，才用全天相機 kā 翕--ê。北方 ê 寒天暗暝，差不多是 零下 20 度。冰晶 tī 大氣層頂懸形成了後，街仔路 ê 燈火湠 tùi 天頂去，會產生 清楚 ê 光柱。彼个那有那無 ê 外觀，是因為落落來 ê 薄板形冰晶，進行 鏡面反射 造成--ê。是講，路燈投影出來 ê 光柱，kā 街仔路照甲光光，就敢若畫出一張地圖仝款。毋閣 ùi kha-mé-lah ê 視角 攑頭看，這張地圖 ê 正爿 kah 倒爿 是 顛倒反。這个光柱組成 ê 市區地圖，tī Jyväskylä 市 ê 暗暝 天頂，出現幾若點鐘久。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240125/
影像：Harri Kiiskinen
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240125.html

Ùi 遙遠世界看著 ê 地球 kah 月娘會是啥款？雖罔講 in 定定 做伙 翕，毋閣這兩个逐家熟似 ê 組合 tī 這張相片 是 ùi 無仝角度翕--ê。這張是 2022 年底 NASA Artemis 1 號 任務 ê 獵戶座機器人太空船 踅 到 月球後壁 翕 倒轉來 地球這爿。地球 ê 直徑是 月球 ê 4 倍，相片內底 ê 月娘 較大粒，是因為太空艙 較倚 月球。Artemis 2 號 是 NASA Artemis 系列計畫 ê 後一个任務，目前按算欲 tī 2025 年 kā 人類送到月球附近。紲落來 ê Artemis 3 號 是按算欲 tī 2026 年底 kā 人類送到月球表面。頂禮拜，日本 JAXA ê SLIM 機器人 太空船 ùi 日本 發射，降落 tī 月球 頂懸，閣囥 2 台會趒 ê 探測車 tī 遐。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240124/
影像來源：NASA, Artemis I
資料處理：Andy Saunders
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240124.html

你對這个夜空有偌了解？好！你敢會當 tī 這張 深空 影像內底認出幾个較有名 ê 天體？毋管你是佗一款，咱先來做一个測驗，看你是毋是會當 tī 這幅 有 足濟暗暗霧霧星雲 ê 深空影像內底，揣著一寡 較有名 ê 夜空天體。這張影像內底有 昴宿星團、Barnard 環、馬頭星雲、獵戶座星雲、玫瑰星雲、圓錐星雲、參宿七、海䖳星雲、猴山仔頭星雲、火焰星星雲、肚胿仔星雲、畢宿五、Simeis 147（意大利麵星雲）、海鳥星雲、kah 加州星雲。欲知影 in tī 佗位，會當參考這張 有 kā 名標出來 ê 影像。欲揣 in 是有淡薄仔困難，這是因為 tī 足暗 ê 夜空 中，就算是咱熟似 ê 星座 嘛是真歹揣，因為咱 ê 夜空傷複雜矣。這張是 kā tī 美國 Arizona 州 ê 烏暗夜空下底 開 800 點鐘 ê 感光時間翕 ê 28 張相片 組合 起來 ê 拼鬥影像。這个夜空是有 偌爾複雜，咱會當 ùi 遮看著一部份。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240123/
影像：Alistair Symon
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240123.html

是講，你看過 ê 暴風雪敢有親像按呢？1938 年 頂 Michigan 州 半島 ê 世紀暴風雪，有一寡所在 ê 雪落到 kah 電火條仔 欲平懸。86 年前 ê 這場風暴實在是真意外，雪 落超過 2 工，落了差不多有 1 公尺懸。落大雪 ê 時陣，風強甲，雪嘛 落甲足懸，足濟路攏袂行，欲挖一條路出來嘛無法度。人袂當行，轎車、校車、火車嘛攏袂振袂動，甚至發生 火燒厝。有 2 个人死去矣，一寡 學生 嘛去予留 tī 學校內底幾若工。這張相片 是在地人 tī 暴風雪 過了隨翕--ê。雖罔講所有 ê 雪落尾攏溶去矣，像這款 地球 頂懸落雪區 ê 連紲暴風雪，是會當幫贊長期 冰河 ê 形成。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240121/
影像：Bill Brinkman; Courtesy: Paula Rocco
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240121.html

木星是太陽系內底上主要 ê 巨行星，嘛是 自轉速度上緊 ê 行星，踅一輾毋免 10 點鐘。毋閣，氣體巨行星 kah 固體 ê 自轉無啥仝。木星南北極 ê 一工 是 9 點鐘 56 分，毋閣 tī 赤道附近 ê 一工煞賰 9 點鐘 50 分。巨行星 ê 高速自轉產生 較強 ê 噴射氣流，kā 雲分做一輾一輾、踅行星 ê 暗帶 kah 光區。這張是 1 月 15 彼暗 tī 法國 巴黎邊仔 用 kha-mé-lah kah 細台天文望遠鏡翕--ê。Tī 這組清楚相片內底，你會當真簡單就看著木星 ê 高速自轉。這粒巨行星 ê 赤道南部有巨型風暴系統，就是咱知影 ê 大紅斑。你會當 tī 相片內底看著伊綴行星咧自轉，ùi 倒爿徙到正爿。這組 ùi 倒爿下底 到 正爿頂懸 ê 系列影像經過 ê 時間，差不多是 2 點鐘 30 分。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240119/
影像：Aurélien Genin
音樂：P!SCO - 鼎鼎
聲優：蔡老師
翻譯：An-Li Tsai (NSYSU)
原文：https://apod.nasa.gov/apod/ap240119.html

Tī 這張 1 月 15 翕 ê 夜空相片，北極光 就 tī 地球平流層 咧發光。這張 5 秒鐘 ê 孤張感光相片，是手扞 kha-mé-lah 翕飛 tī 加拿大 Winnipeg 天頂 ê 飛龍機。感光 ê 時陣，tī 飛龍機 高速飛行下底 ê 燈火，出現五彩 ê 光跡。Tī 遠方地平線頂懸，去予 地球極區 磁場 加速 ê 高能粒子，激發酸素原子，產生閃閃爍爍 ê 北極光。極光發出 ê 青光，是 tī 海拔 100 - 300 公里懸 ê 所在產生--ê。紅色是 tī 較低大氣密度、較懸海拔 ê 所在產生--ê。銀河盤頂懸暗暗 ê 恆星 tī 夜空中 chiâⁿ 做一條彎弓。北天 ê 仙女座星系，予這个夜空擴展到 銀河系以外 ê 世界。仙女座星系是 kah 咱銀河系上倚 ê 大型捲螺仔星系。這个霧霧 ê 星系，就 tī 相片倒爿頂懸。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240118/
影像：Ralf Rohner
音樂：P!SCO - 鼎鼎
聲優：蔡老師
翻譯：An-Li Tsai (NSYSU)
原文：https://apod.nasa.gov/apod/ap240118.html

這張清楚 ê 宇宙影像中心是 獵戶座星雲 ê 心臟，內底有 4 粒高溫大質量恆星，in 就是 四邊形星群。In 相倚 tī 半徑 1.5 光年 ê 範圍內，是獵戶座星雲核心 ê 實密星團 ê 主要成員。四邊形星 群發出 ê 電離輻射 紫外光，大部份是 ùi 一粒足光 ê 恆星，獵戶座 Theta-1 C 發出來--ê。伊驅動這个複雜 ê 恆星形成區，予伊發出可見光。這个 300 萬歲 ê 獵戶座星雲 內底 ê 星團，是比伊少年 ê 時陣猶閣較實密。照 動力學研究 表示講，可能是當初時 失控 ê 恆星相挵，產生一粒 質量超過 100 倍太陽質量 ê 烏洞 。星團內底若是有 烏洞 ，就會當解說 四邊形星群 內底 ê 恆星是按怎會有遮爾懸 ê 運動速度。獵戶座星雲 kah 咱 ê 距離差不多有 1500 光年，按呢這粒烏洞真有可能是目前為止 kah 咱地球 上倚 ê 烏洞。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240105/
影像：Fred Zimmer, Telescope Live
音樂：P!SCO - 鼎鼎
聲優：阿勻
翻譯：An-Li Tsai (NSYSU)
原文：https://apod.nasa.gov/apod/ap240105.html

這粒 12 月 ê 月娘對一部份北半球 ê 人來講，叫做 冷月 抑是 長暝月。這粒 2023 年上尾 ê 一擺月圓就 ùi 這个超現實 ê 山脈 peh 起來，出現 tī 夜空中。這幅 Daliesque 風格 ê 景色，是 tī 意大利 Grappa 山附近 用 kha-mé-lah 鬥長焦鏡頭 翕 ê 孤張感光相片。是講，這粒月娘並無溶去啦！伊 tī 地平線附近看起來去予搝甲變形，這是因為視線方向 ê 光線屈折去，予 金爍爍 ê 月盤影像徙位。這款 tī 大氣內底發生 ê 屈折，是因為 大氣無仝層 ê 溫度 kah 密度無仝。其他影響，親像是視線方向迵過 ê 大氣層長度較長，造成光線屈折去，予這粒 peh 懸 ê 月圓 tī 下底產生變形 ê 薄縭絲紅色邊，kah 頂懸薄縭絲 ê 青色邊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231230/
影像：Giacomo Venturin
音樂：P!SCO - 鼎鼎
聲優：阿勻
翻譯：An-Li Tsai (NSYSU)
原文：https://apod.nasa.gov/apod/ap231230.html

1986 年 ê 時陣，航海家 2 號 變做是唯一一个近距離探索 冰巨行星 天王星 ê 太空船。就算是按呢，這張 ùi James Webb 太空望遠鏡 近紅外線相機 NIRCam 翕 ê 新相片，猶是會當提供 遙遠世界 ê 詳細景色。這粒趨趨 ê 外行星，差不多 17 點鐘會踅伊 ê 自轉軸一輾。伊 ê 北極這馬是指向咱 ê 視線方向附近，所以咱會當直接看著伊 ê 北半球 kah 暗暗霧霧闊闊 ê 環。這粒巨行星有 27 粒已經知影 ê 衛星，這張相片內底有標 其中 14 粒。相片內底閣有一寡霧霧 ê 背景星系。一寡較光 ê 衛星，出現 Webb 影像才有 ê 繞射光針。是講這寡外太陽系 ê 世界，tī 莎士比亞 ê 年代猶無人知影。這 27 粒天王星 ê 衛星當中，干焦 2 粒毋是用這位英國詩人寫 ê 戲劇內底 ê 人物 kā 號名--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231229/
影像：NASA, ESA, CSA, STScI
音樂：P!SCO - 鼎鼎
聲優：阿勻
翻譯：An-Li Tsai (NSYSU)
原文：https://apod.nasa.gov/apod/ap231229.html

火箭敢會 kā 月娘製造波痕？袂，毋過伊會予背景 ê 月娘看起來有 波痕。像這个例，是頂禮拜 ùi NASA Kennedy 太空中心 發射 ê SpaceX 獵鷹載重火箭。這張火箭發射 ê 相片，火箭噴--ê 煙是光甲比遠方咧 peh 起來 ê 規粒月娘閣較光。是講較奇怪 ê 是，月娘下底邊仔有 無四常、咧滴水 ê 波痕。其實，遠方 ê 月娘本身 是無改變。造成這寡 視覺上波痕 ê 物理原因，是 月光 經過較燒較薄 ê 空氣胞，比經過較冷較實密 ê 空氣胞，產生 ê 屈折 較無遐爾強，才會看起來變按呢。就算這擺 ê 翕相是已經計畫好--ê，毋過 火箭發射 ê 時間點嘛愛算甲好勢好勢，才會予伊 tī 這張 孤張感光 ê 相片內底，拄拄仔好 ùi 月娘面頭前飛過。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240102/
影像：Steven Madow
音樂：P!SCO - 鼎鼎
聲優：阿勻
翻譯：An-Li Tsai (NSYSU)
原文：https://apod.nasa.gov/apod/ap240102.html

你敢捌 tī 天頂看過龍？雖罔講這个世界無真正會飛 ê 龍，毋過 tī 2019 年 ê 冰島天頂，捌出現 看起來敢若是龍 ê 極光。極光 是按怎來--ê？極光是太陽 kā 紮電粒子 ùi 日冕 ê 空縫 擲入去 太陽風 內底，綴太陽風來到無穩定 ê 行星間磁場，落尾來到 地球 ê 磁層。這寡粒子有一部份去挵著地球大氣，激發原子 了後輻射出來 ê 光，就是極光。這个特殊形態 ê 極光是遮爾 迷人，連攝影師 in 老母嘛走出來看，結果就去予翕入去，變做前景 ê 一部份。時間愈倚近 2025 年 ê 太陽極大期，咱 ê 活跳太陽 就會繼續出現比平常時閣較大量 ê 日珥、太陽絲、太陽烏子、kah 較大區 ê 太陽活跳區。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240114/
影像：Jingyi Zhang & Wang Zheng
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240114.html

中央彼是啥物？是白矮星！白矮星 kah 尾蝶仔 仝款，會 kā 共家己包起來 ê 繭，就是氣體殼，擲出去，開始一个新 ê 性命週期。照這个比喻，咱 ê 日頭 是 刺毛蟲，去予擲出去 ê 氣體殼就是 上媠 ê 繭。這張相片內底 ê 繭，是 編號 NGC 2440 ê 行星形星雲，內底有到目前為止 溫度上懸 ê 白矮星。白矮星 就是相片中央附近彼个柑仔色 ê 光點。咱 ê 太陽 免 50 億年，嘛會變做一隻「白矮星 尾蝶仔」。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231224/
影像來源：NASA, ESA, Hubble
資料處理：H. Bond (STScI), R. Ciardullo (PSU), Forrest Hamilton (STScI)
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231224.html

用針孔相機 kah 翕相紙進行 183 工 ê 感光，結果翕出這幅長時間 ê 日照軌跡圖。這張相片是 tī 葡萄牙 Mertola 紀錄 日頭 ùi 2022 年 ê 夏至 到 冬至，6 月 21 到 12 月 21，逐工 tī 地球 天頂 ê路線。6 月 21 ê 時陣，太陽 tī 北半球天頂行到上懸 ê 所在，伊 tī 天頂 ê 路線行做一條上長 ê 弧線，表示講這工 ê 日時上長。這就是天文學定義 北半球 夏季 ê 頭一工。冬至 ê 日時時間上短，是北半球冬季 ê 頭一工。Tī 這張 2022 年 ê 日照軌跡圖內底，就是太陽上低上短彼條光弧。北半球 2023 年 ê 冬至是 tī 世界協調時 12 月 22 3:27。對北美洲 ê 時區來講，是 12 月 21。對亞洲 ê 時區來講，仝款是 12 月 22。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231222/
影像：José Zarcos Palma
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231222.html

壯麗 ê 捲螺仔星系 Messier 33 看起來是有過量 ê 水素氣體 leh 發光。M33 是本星系群 ê 成員之一，嘛叫做 三角座星系，離咱有 300 萬 光年遠。這張 清楚 ê 宇宙肖像，就是這个星系中心 3 萬光年 ê 範圍，是 leh 翕 M33 發紅光 ê HII 區，就是水素離子雲。這寡 HII 區就綴 M33 鬆鬆 ê 捲螺仔手骨，踅入去星系核內底。M33 ê 大片 HII 區 是目前咱知影 上大 ê 恆星誕生區，會生出足濟短命 ê 大質量恆星。足光 ê 大質量恆星 發出強烈 ê 紫外光輻射，kā 邊仔 ê 水素氣體 離子化，予 in 發出特別 ê 紅光。這張影像是 kā 闊頻資料 kah H-alpha (Hα) 濾鏡紀錄 ê 狹頻資料 疊出來 ê 結果。H-alpha (Hα) 濾鏡是 tī 可見光波段，會當 kā 上強 ê 水素 發射線 ê 信號送過來。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231013/
影像：Reinhold Wittich
音樂：P!SCO - 鼎鼎
聲優：草莓大福
翻譯：An-Li Tsai (NSYSU)
原文：https://apod.nasa.gov/apod/ap231013.html

咱 ê 宇宙是有偌大？這个問題 tī 1920 年代，是 所有天文問題內底，2 个上有名 ê 天文學家 leh 諍 ê 問題，這就是歷史上有名 ê「天文大辯論」。有足濟天文學家相信講，咱 ê 銀河系 就是規个宇宙。毋過其他天文學家認為，咱 ê 銀河系 是所有星系內底 ê 其中一个。Tī「大辯論」內底，每一个論點攏講甲足詳細--ê，毋過無共識。這个答案一直到 3 年後，tī 仙女座星雲 內底揣著一粒變光星，才解決。這張相片就是證明這个答案 ê 原始玻璃底片，經過數位方式重新處理 ê 結果。Edwin Hubble 比較無仝張影像，注意著這个 光點 ê 強度會變化，煞 tī 1923 年 10 月 6 號 ê 時陣，tī 玻璃底片頂懸寫一字「變！(VAR!)」。Hubble 知影上好 ê 解說就是，這个光點是 tī 遙遠所在 ê 變光星。所以 M31 應該是 仙女座星系 才著，可能 kah 咱銀河系有成。這張 tī 100 年前做記號 ê 影像可能毋是蓋媠，毋過變光星 ê 紀錄 拍開人類智識 ê 窗仔門。這是頭一擺咱知影講，咱 ê 宇宙是大甲毋是款。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231006/
影像：致謝 Carnegie Institution for Science
音樂：P!SCO - 鼎鼎
聲優：草莓大福
翻譯：An-Li Tsai (NSYSU)
原文：https://apod.nasa.gov/apod/ap231006.html

四分儀座流星雨這个名是 ùi 一个 去予人放袂記 ê 星座 來 ê，伊逐年攏會為北半球 ê 觀星者表演一擺。這个流星雨 tī 天頂 ê 輻射點 是踮一个老甲已經無咧用 ê 名，四分儀座 內底。彼位離北斗星群袂傷遠，就踮現代星座 牧夫座 kah 天龍座 ê 交界。北斗星群，有一寡人嘛 kā 叫做 牛犁。這个星群 ê 湯匙仔柄,就 tī 這幅圖 ê 正爿頂懸附近，流星雨 ê 輻射點就 tī 伊下底。北極星 就 tī 倒爿頂懸遐。Tī 這个南韓長水郡 ê 夜空景色內底，只要綴天頂 ê 光巡行到輻射點，就知影這个是四分儀座流星雨。相片是 tī 2024 年 1 月 4 號流星雨上強 ê 幾若點鐘內翕了了後，才 kā 疊出來--ê 合成影像。四分儀座流星雨 ê 塗粉來源，tī 2003 年 ê 時陣就認為講，可能是 ùi 一粒小行星來 ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240111/
影像：염범석 Bum-Suk Yeom
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240111.html

你看--過 ê 極光敢有遮爾媠？第一，極光 看起來有可能會親像 虹，毋過 in 是完全無仝款 ê 現象。極光是因為太陽產生 ê 粒子，綴 地球磁場 來到 地球大氣層，激發 tī 地球無仝懸度 ê 原子 發彩色光 ê 結果。顛倒來講，虹 是日光 ùi 欲落--落來 ê 雨水，反向散射產生--ê，無仝色是無仝角度 屈折 ê 結果。是講 真不幸，極光袂產生水沖，毋過你若是計畫好勢、運氣袂䆀，你就會當同齊翕著 in。這張影像 是進前 11 月 tī 冰島 Skógafoss 水沖 附近 翕--ê，是 kā 幾若張相片組合起來 ê 影像。這个翕相 ê 計畫主要是欲翕 媠甲親像一幅圖 ê 水沖，kah 伊天頂 ê 銀河系 中央帶。是講運氣袂䆀，壯觀 ê 極光連鞭就出現 tī 銀河彎弓下底。遙遠 ê 背景內底，閣有 昴宿星團 kah 仙女座 星系。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231227/
影像：Stefano Pellegrini
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231227.html

你敢捌看過銀河內底 ê 鳥仔？毋但 月娘頂懸有藏一个查埔人，咱 ê 夜空閣有足濟故事通講。而且無仝所在 較有歷史 ê 文化，嘛會 kā in 上久長 ê 傳說 投影 tī 天頂 ê 天星抑是星雲。一代一代 ê 人看這寡天象，聽 in ê 故事，就會繼續 kā 故事傳落去。這張相片 毋但是 銀河系 中央帶 ê 一部份爾爾，若是根據幾若个 烏拉圭 原住民 ê 傳說，in 閣是一隻叫做 美洲鴕鳥 ê 大隻鳥仔。而且，美洲鴕鳥 ê 跤跡閣 kah 南十字 星群有關係。前景 ê 剪影 是 María Micaela Guyunusa ê 雕像。伊是活 tī 1800 年代 Charrúa 族 ê 原住民查某，是一个抵抗殖民 ê 象徵。這張組合影像是 4 月中 tī 烏拉圭 Cabo Polonio 翕--ê，背景是 大西洋。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230620/
影像來源 kah 版權：Fefo Bouvier
畫線 ê 人：Alfonso Rosso
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230620.html

昨昏是 初一。毋過 1 月 9 號這工，毋管是 tī 地球佗一位，透早就 peh 起來 ê 人，天光進前 tī 東爿看著 ê，是 下月眉。這張簡單 ê 速翕是 tī 德國西部 Rhineland-Palatinate 州 Saarburg 市翕--ê，天頂有日出進前 ê 下月眉。毋但按呢，咱閣會當 tī 地球天頂 看著 倚太陽彼爿 ê 內行星 金星 kah 水星，做伙出現 tī 這个 冷吱吱 ê 透早。前景是歷史上有名 ê 城塔 kah 城堡，閣有 10 世紀 ê 廢墟。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240112/
影像：Michael Luy, Trier Observatory, TWAN
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240112.html

Kā 你 ê 3D 目鏡 提來，咱來看這張 tī 別个世界 ê 立體影像。這張是阿波羅 17 號任務 ê 指揮官 Eugene Cernan tī 1972 年 12 月 11 欲降落月球進前 踅月球一輾 ê 時陣，紀錄著 ê 相片。這組立體浮雕是 ùi 兩張相片 (AS17-147-22465, AS17-147-22466) 組合來--ê，是 伊 kah Harrison Schmitt 博士 tī 登月艙 挑戰號飛到上好地點翕--ê。遐是 阿波羅 17 號 ê 降落地點，Taurus-Littrow 山谷。這个面對日光、寬闊 ê 南 Massif 山就 ùi 相片 中央附近 peh 起來。倒爿是烏暗 ê Taurus-Littrow 山谷。Ron Evans 駛--ê 踅月球行 ê 美國號指揮艙，就 tī 南 Massif 山 ê 山尖 頭前。Tī 山脈後壁，月球邊緣彼搭，是月球 ê 寧靜海。2025 年 9 月以後，Artemis 2 號任務 會發射，伊按算欲載 4 个太空人踅月球冒險了後，才閣轉來地球。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240117/
影像：Gene Cernan, Apollo 17, NASA; Anaglyph by Patrick Vantuyne
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240117.html

有當時仔，上無簡單看著 ê 恆星才是上趣味--ê。IC 348 是一个少年星團，伊 kā 伊四箍圍仔 ê 塗粉絲照甲光 iàⁿ-iàⁿ。Webb 太空望遠鏡 最近發表 ê 紅外線影像 內底攏是這款粉紅仔色，虯毛虯毛 ê 塗粉絲。Tī 可見光波段，這寡塗粉主要會反射藍光，所以伊 四箍圍仔 ê 物質 就會出現 反射星雲 定定看著 ê 藍光。除了較光 ê 恆星以外，IC 348 內底閣有幾若个較低溫 ê 天體。咱看會著 in，是因為 in tī 紅外線波段 足光--ê。目前 ê 假說是認為講，這寡天體應該是低質量 ê 棕矮星。這个證據 包括量著 不明 大氣化學物質，應該是 炭化水素（碳氫化合物），這進前捌 tī 土星 大氣 揣著。這寡天體 ê 質量敢若是比咱已經知影 ê 行星質量較大淡薄仔，差不多是 木星 質量 ê 幾若倍爾爾。而且這寡少年 星團 內底閣有一寡值得注意 ê 天體：是低質量、浮 tī 宇宙中，無踅其他恆星行 ê 棕矮星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240115/
影像：NASA, ESA, CSA, STScI, and K. Luhman (Penn State U.) and C. Alves de Oliveira (ESA)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240115.html

地球踅太陽 ê 軌道 毋是圓--ê，是長株圓。咱美麗 ê 地球 tī 長株圓軌道頂懸行到 kah 太陽上倚 彼點就叫做近日點。遠日點就是地球 tī 長株圓軌道頂懸行到 kah 太陽上遠彼點。今年 ê 近日點是 tī UTC 世界時 1 月 2 號 1:00，地球 kah 太陽 ê 距離差不多比伊行到遠地點 ê 距離，較近 480 萬 公里。是講，地球 kah 太陽 ê 距離 毋是決定季節 ê 原因，嘛袂影響著日箍 ê 大細。這張相片是攝影師 tī 德國 Heroldstatt 附近 ê 庄頭散步 ê 時陣翕--ê。這个美麗 ê 冰日箍是一个 角寸尺 22 度，踅日頭一輾 ê 圓箍仔。欲看著這款現象，去揣藏 tī 懸懸 ê 樹身後壁 ê 日頭，是看較會清楚。日箍 直徑 ê 角寸尺 22 度，是浮 tī 地球大氣較懸層 ê 六角形冰晶造成--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240113/
影像：Radoslav Zboran
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240113.html

你若是徛 tī 週期性彗星 67P/Churyumov-Gerasimenko ê 山壁頂懸，並袂去予這場暴風雪擋咧。Rosetta 太空船 tī 2016 年 6 月踅這粒彗星 ê 時陣，伊 ê 狹視角 kha-mé-lah 就 tī 彗星表面 頂懸 附近，紀錄著這寡 tī 視野內底看起來敢若是咧落雪 ê 塗粉 kah 冰粒。有一寡 tī 影像內底較光 ê 光斑，可能是因為高能紮電粒子 抑是 宇宙線 去舂著 kha-mé-lah。有一寡是 tī 大隻狗星座（大犬座）方向 實密 ê 背景星。影片 內底 ê 背景星較好揣，因為 in ê 光巡 是 ùi 頂懸到下底。這支精彩 ê 影片是 Rosetta 太空船 tiàm 離 彗核 13 公里遠 ê 所在，kā 25 分鐘內翕 ê 33 張 連紲影像 合成 ê 影片。2016 年 9 月 ê 時陣，Rosetta 太空船完成伊最後 ê 任務了後，成功控制伊家己去挵 彗星 67P。彗核就變做是 Rosetta 太空船 上落尾安息 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240106/
影像：ESA, Rosetta, MPS, OSIRIS; UPD/LAM/IAA/SSO/INTA/UPM/DASP/IDA
動畫：Jacint Roger Perez
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240106.html

金星有相位 ê 變化。金星 就親像月娘，會出現完整 ê 圓盤，薄薄 ê 月眉形，kah 這兩款之間 ê 形態。金星定定是 日落了後，抑是 日出進前，天頂上光 ê 天體。毋過，伊傷細粒矣，一般是愛用雙筒千里鏡 抑是 細台天文望遠鏡，才有法度看清楚伊這馬 ê 相位是佗一款。這場 縮時攝影系列相片，是 2015 年 開 6 個月 ê 時間，tī 法國 Charente-Maritime 省 ê Surgères 翕--ê。毋但有翕著金星相位 ê 變化，嘛有翕著伊視寸尺 ê 改變。金星 若是出現 tī 離地球較遠 ê 太陽後壁彼爿，伊看起來就會較細粒，而且是月圓相。金星 kah 地球 若是攏出現 tī 太陽仝這爿，伊看起來 就會較大粒，毋過會是月眉相。這個月 ê 金星 會 tī 天光進前出現，會是 頂膨月 ê 相位。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240108/
影像：Stéphane Gonzales
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240108.html

Tī 這張予人讚嘆 ê 紅外線相片內底，有一粒 逃走 ê 恆星，蛇夫座 Zeta，伊就親像是 tī 宇宙海內底咧行 ê 船仝款，產生這个 弓形 ê 星際震波。這張假色影像中心附近，有一粒 藍色 ê 蛇夫座 Zeta，這是一粒 比太陽 較大 20 倍 ê 恆星，用 一秒鐘 24 公里緊 ê 速度向倒爿飛過去。伊頭前有足強 ê 恆星風，kā 厚塗粉 ê 星際物質 壓縮、加溫，才會造成這个弓形 ê 震波波前。是講是啥物驅動這粒恆星？蛇夫座 Zeta 本底可能是 雙星系統 ê 成員之一，伊 ê 星伴質量較大，性命嘛較短。等這个星伴變做 超新星爆炸，質量消去了後，蛇夫座 Zeta 就去予擲出去這个系統矣。蛇夫座 Zeta 離咱 460 光年遠，光度差不多是太陽 ê 6 萬 5000 倍強。伊若毋是去予 塗粉 包咧，光線去予閘去，伊應該是地球天頂上光 ê 恆星之一。這張影像若是照 蛇夫座 Zeta 估算 ê 距離來看，大細應該有 1.5 度闊，差不多是 12 光年大。2020 年 1 月 ê 時陣，NASA kā Spitzer 太空望遠鏡 轉做安全模式，結束伊 16 年來，成功 探索宇宙 ê 任務。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240104/
影像：NASA, JPL-Caltech, Spitzer Space Telescope
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240104.html

雷神 Thor 毋若有 專屬 ê 日子（拜四），嘛是天堂 ê 頭盔。咱一般攏 kā NGC 2359 叫做 雷神 Thor ê 頭盔。伊是一个帽仔形 ê 宇宙雲，閣有兩支翼股。雷神 Thor ê 頭盔有 30 光年闊，tùi 北歐神 來講嘛是有夠大 ê。實際上，這个宇宙崁蓋較成是一个 星際氣泡，是去予氣泡中心一粒明亮、大質量恆星 ê 高速恆星風吹出來 ê。中心恆星是 Wolf-Rayet 星，伊是 足燒 ê 巨恆星，是 超新星 前期足短 ê 演化 階段。NGC 2359 離 咱有 15000 光年遠，to̍h tī 大犬 座 ê 方向。這張 遮爾清楚 ê 影像 是濫幾若款無仝 ê 觀測資料，有闊頻 kah 狹頻 濾片 ê 資料。內底毋若有 一般看著 ê 影像，嘛有 星雲 雲絲 ê 清楚結構。雷神 Thor ê 頭盔 中心 ê 恆星，閣紲落來幾若千年了後，應該會 爆炸，變做壯觀 ê 超新星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240109/
影像：Ritesh Biswas
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240109.html

Tùi 一寡人來講，這看--起來敢若是貓咪仔 ê 目睭。毋閣其他人可能會感覺這是一粒 tī 宇宙 ê 大型 海螺 殼。伊實際上是一粒咱熟似 ê 行星形星雲。伊足光 ê、咱嘛看會著足詳細 ê 細節。伊 kah 太陽是仝款 ê 恆星，伊行到性命上尾坎站 ê 時陣，會 tī 一个足短 ê 發光階段 kā 氣體擲--出去，才形成這款星雲。這个星雲 中央 ê 恆星欲死亡 ê 時陣，會連紲 tī 外 層 產生 一重一重 ê 球形 外殼。是按怎 產生 這个美麗、複雜、對稱 ê 內部結構，到今 猶無蓋了解。這張影像 是 kā Hubble 太空望遠鏡 ê 光學影像 kah 踅地球 leh 行 ê Chandra 天文台 翕 ê X-光影像 用 數位組合 ê 方式 敆做伙 ê。這个美麗 ê 太空雕像，有超過一半 光年 ê 長度。咱若是 斟酌看這粒 貓咪仔 ê 目睭，可能會看著咱太陽未來 ê 命運。伊會 tī 差不多 50 億年了後，變做 kah 這个 行星形星雲 仝款 ê 演化階段。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240107/
影像來源：NASA, ESA, Hubble Legacy Archive; Chandra X-ray Obs.
資料處理 kah 版權：Rudy Pohl
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240107.html

這个踅 tī 極光邊仔無四常 ê 紅光是啥物？伊是 穩定極光紅弧 SAR。SAR 弧 是真罕得看著，是 1954 年才知影，開始研究--ê。這張 闊幅相片 是 這個月初 tī 紐西蘭 Poolburn 發生一場足強 ê 地磁風暴 ê 時陣翕著--ê。有翕著完整 ê SAR 弧，kā 較捷看著 ê 青色 kah 紅色 極光 包 tī 內底。是講 SAR 弧 是按怎會形成，到今猶是一个 研究主題，毋過伊真有可能 kah 保護地球 ê 磁場 有關係，磁場是 地球 內部 熔去 ê 鐵 流動產生--ê。這个磁場通常會 kā ùi 太陽風紮來 ê 紮電粒子 引導到地球 ê 南北極。毋過，伊嘛會 tī 赤道附近箍 一輾離子，等 太陽活動 較激烈 ê 時陣，就會當 ùi 磁層 提著能量。這个 離子環 內底 ê 高能電子，會 kah 比 地球電離層 內底普通 極光 較懸 ê 酸素相挵，激發酸素發出紅光。這馬咧進行 ê 研究，有揣著證據講，SAR 弧 會當轉變做 茄仔色 kah 青色 ê STEVE 極光。STEVE ê 全名是「速度增加的強熱輻射」。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240103/
影像：Tristian McDonald
文稿：Tiffany Lewis (Michigan Tech U.)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240103.html

這張彩色夜景 ê 闊度有 3 粒月娘遐爾闊，是一个 tī 北天 厚天星 ê 星雲，銀河盤頂懸附近 ê 皇家星座，仙王座 內底。相片中央是發紅光 ê 發射區 Sharpless 155 (Sh 155)，嘛叫做 洞窟星雲。伊就佇 2400 光年遠 ê 大質量分子雲區邊仔附近。這个宇宙洞窟 ê 氣體壁有 10 光年闊，去予邊仔高溫少年恆星 ê 紫外光 kā 電離去。像正爿 ê vdB 155，是一个厚塗粉 ê 反射星雲，伊佮實密閘光 ê 雲，佇這張星際畫布頂懸是滿四界。天文 研究 已經知影其他 恆星形成活動會產生戲劇性 ê 信號，包括 咧發紅光 ê Herbig-Haro 168 (HH 168)。中央正爿下跤--ê，是 Herbig-Haro 天體，伊 ê 發射源是 新形成 ê 恆星 噴出來 ê 高能噴射流。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240110/
影像：Gábor Galambos
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240110.html

星系 會遮爾迷人，毋但是因為看會著 ê 部份，閣有看袂著 ê 部份。這个 極大望遠鏡陣列 ê 其中一台 翕 ê 大捲螺仔 星系 NGC 1232 ê 細節，就是一个袂䆀 ê 例。看會著 ê 部份主要是幾若百萬粒 光爍爍 ê 恆星 kah 烏暗 塗粉，in 攏去予重力搝 tī 捲螺仔手骨內底，做伙踅星系中心行。咱會當 tī 捲螺仔手骨頂懸看著 開放星團 kah 伊內底光爍爍 ê 藍色恆星，閣有 tī in 中央，由實密 ê 星際 塗粉 形成 ê 烏暗帶。另外閣有 較看無，毋過猶量會著 ê 幾若十億粒較暗 ê 恆星 kah 大量 ê 星際氣體。遮爾懸 ê 質量，做伙控制 星系 中心 ê 動力。這馬 ê 主流理論暗示講，其實有閣較 大量 ê 物質咱是看袂著，in ê 型態咱嘛猶毋知。目前 ê 假設是講，烏暗物質 是四界攏是，一部份是用來解說外部星系 可見物質 ê 運動。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20240101/
影像：FORS, 8.2-meter VLT Antu, ESO
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap240101.html

是按怎有一隻海䖳 tī 恆星海內底咧泅水？正爿 ê 海䖳星雲，就浮 tī 一粒足光 ê 恆星，雙子座 Eta 附近。伊 kā 伊 ê 鬚，ùi 中央倒爿 光光 ê 發射弧 伸出來。實際上，這隻宇宙 海䖳 是氣泡形 超新星殘骸 IC 443 ê 一部份。IC 443 咧漲大 ê 屑仔雲是 ùi 大質量恆星爆炸 來--ê。這个爆炸發--出 ê 光，上早來到咱 地球 是 3 萬年前 。IC 443 就 kah 伊 tī 天文海洋內底 ê 親情，毛蟹星雲仝款，這个超新星殘骸 中央有一粒 中子星，是恆星核心崩塌 ê 殘骸。海䖳星雲離咱差不多有 5000 光年 遠。照這个距離來估算，這張相片 應該 有 140 光年闊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231226/
影像：David Payne
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231226.html

這幅 ùi 烏影區看出去 ê Cassini 太空船影像，是 面對土星彼半球 ê 內衛星 土衛二 Enceladus。Cassini ê kha-mé-lah tī 2016 年 11 月翕著 這張戲劇性 ê 景色。相片頂懸是 北方 ，相機是向太陽 ê 方向翕--ê，離衛星較光 ê 月眉形彼爿有 13 萬公里遠。實際上，遙遠天體反射 超過 90 葩照著伊 ê 日光，予伊 ê 表面 ê 反射率 kah 拄落 ê 雪 差不多仝款。直徑才 500 公里 ê 土衛二 Enceladus，無想到 是一粒活跳跳 ê 衛星。Ùi Cassini 太空船飛過 Enceladus ê 時陣提著 ê 資料 kah 影像，揣著南極 ê 歇陣噴泉，伊會噴出水煙 kah 冰粒。另外嘛有揣著海洋 ê 證據，液態水就藏 tī 衛星 ê 冰層地殼下底。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231216/
影像：Cassini Imaging Team, SSI, JPL, ESA, NASA
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231216.html

咱是按怎來到遮--ê？請你 揤「放送」，坐予好勢，開始來看。這个宇宙演化 ê 電腦模擬，提供咱了解 tī 這个宇宙中，星系是按怎形成--ê？人類是 tī 宇宙 ê 佗一位？揭示計畫 是一个 tī 2014 年 用 2000 萬點鐘 ê CPU 時間，追蹤 3500 萬 光年 長 ê 立方體 tī 130 億年內演化 ê 電腦模擬計畫。這个模擬 是咧追蹤物質是按怎 做出 無仝款 ê 星系。這个虛擬 宇宙 那演化，一寡物質嘛那咧漲大。無偌久，這个宇宙就因為重力作用，堅做雲絲、星系、kah 星系團。這支影片 是利用虛擬相機踅咧看一部份 ê 宇宙。頭一个是咧看 烏暗物質 ê 演化，紲落來 0:45 ê 時陣是 水素 氣體 tī 無仝溫度 ê 變化，閣來 1:30 ê 時陣是重元素，像 日素 kah 炭素 ê 出現，落尾 2:07 ê 時陣閣轉來看 烏暗物質。影格倒爿下跤標 ê 是 ùi 大霹靂 開始算 ê 時間，正爿下底標 ê 是物質 ê 種類。0:50 ê 爆發事件是星系中心 ê 超大質量烏洞噴出來 ê 燒滾滾 ê 氣泡。揭示計畫 kah 真正 ê 宇宙 無仝 ê 部份真趣味，包括講 這个模擬 是按怎會生出傷濟較老 ê 恆星，所以這嘛是一个研究主題。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231231/
影像：Illustris Collaboration, NASA, PRACE, XSEDE, MIT, Harvard CfA
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231231.html

這粒光爍爍 ê 火流星 tī 一个足短 ê 時間內，tī 地球夜空中變甲比木星閣較光。這張意外翕著 ê 影像，是 12 月 14，差不多是 雙生仔座流星雨 上濟 ê 時陣，tī 加拿大 冷吱吱 ê 暗暝，利用 kha-mé-lah 咧翕流星 ê 縮時攝影 ê 時陣翕著--ê。雙生仔座流星雨是 編號 3200 ê Phaethon 小行星 ê 年度禮物，一直是 tī 12 月 ê 時陣送--來。這粒神祕小行星落 tī 軌道頂懸 ê 塗粉粒，用一秒鐘 22 公里緊 ê 速度迵過地球高層大氣 ê 時陣，就會蒸發，變做流星光巡。是講，雙生仔座流星雨會叫做這个名，是因為這寡流星 ê 輻射點 tī 雙生仔座內底。這个輻射點就 tī 相片倒爿下底。除了流星以外，12 月 ê 夜空 閣有 昴宿星團 kah 畢宿星團，正爿閣有足光 ê 木星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231228/
影像：Gaurav Singh
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231228.html

是啥物 tī 天頂創出這寡無四常 ê 光弧？是冰晶啦！這個月初，德國 Bavaria 州 Füssen 附近 拄落雪 ê 時陣，有一个攝影師發現講，伊走入去冰霧內底矣。浮 tī 空中 ê 水欲堅做 冰霧，溫度愛低、空氣溫度嘛愛零度以下。這團 冰霧 反射 聖 Coleman 教堂 後壁 欲日落 ê 日光。這个結果是攝影師看過 上壯麗 ê 景色 之一。咱愛先知影，這張相片 內底 ê 光點 毋是背景星，是浮 tī 空中 ê 冰 kah 雪。閣來，咱會當看著相片內底有兩个足明顯 ê 冰暈，就是冰晶反射日光造成 ê 日箍：22 度 ê 日箍 kah 46 度 ê 日箍。咱嘛 看會著 幾若條 光弧，ùi 頂懸到下底是：對日弧（嘛叫做 映日弧）、環天頂點弧、Parry 弧、切線弧、kah 幻日弧（嘛叫做 環水平弧）。落尾，kah 太陽相連 ê 雞胿形 光弧是 上罕得 看著--ê。伊叫做 太陽弧，是日光 ùi 浮 tī 空中 水平方向 ê 六角形 冰晶 ê 邊仔面反射來--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231220/
影像：Bastian Werner
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231220.html

太空中敢有 Calafia 女王 ê 神話島嶼？可能無，毋過這團太空分子雲 ê 外形，kah 美國加州是有成。咱 ê 太陽 就 tī 銀河系 ê 獵戶座捲螺仔手骨 頂懸，離 加州星雲 才 1000光年遠爾爾。伊嘛叫做 NGC 1499，是一个典型 ê 發射星雲，差不多有 100 光年 長。Tī 這張影像 內底，加州星雲上顯目 ê 紅光，是 ùi 水素 原子重新 kah phàng 見 ê 電子複合，發出 ê 光。這个 phàng 見 ê 電子，是去予 高能恆星光 kā 電離，才走去--ê。發出 高能恆星光、kā 大部份 星雲氣體 電離 ê，應該是 tī 星雲 ê 正爿彼粒較光、高溫、藍色 ê 英仙座 ξ。加州星雲是天文攝影師愛翕 ê 目標。Tī 烏暗夜空中，用闊幅望遠鏡 tī 英仙座 方向、昴宿星團 附近就 揣會著伊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231219/
影像：Steven Powell
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231219.html

咱銀河系內底 ê 大質量恆星 有燦爛 ê 一生。In 是 ùi 大型宇宙雲崩塌來--ê，in ê 核子反應爐 著起來了後，會 tī 核心製造重元素。大部份大質量恆星經過短短幾若百萬年了後，會 kā 伊 產生 ê 物質 噴轉去星際空間，變做後一擺做恆星 ê 材料。這个咧漲大 ê 屑仔雲叫做仙后座 A，這是 恆星性命週期 上落尾 ê 階段。超新星爆炸產生超新星殘骸，伊發出來 ê 光，350 年前頭一擺 tī 地球天頂 hŏng 看著，毋過這个光其實是愛開 1 萬 1000 年才會到咱遮。這幅 James Webb 太空望遠鏡 ê NIRCam 翕 ê 清楚影像，有翕著超新星殘骸 猶燒滾滾 ê 雲絲 kah 雲丸。咧漲大 ê 白煙外殼，大細差不多有 20 光年大。Uì 大質量恆星爆炸發出來 ê 光，有去予 Webb 太空望遠鏡翕著。這張清楚影像，就是超新星殘骸 仙后座 A。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231214/
影像：NASA, ESA, CSA, STScI; D. Milisavljevic (Purdue University), T. Temim (Princeton University), I. De Looze (University of Gent)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231214.html

是啥物驅動心臟星雲發光？代先，倒爿 ê 大型 發射星雲 ê 編號是 IC 1805，看起來敢若是 人 ê 心臟。星雲發 ê 紅光，是 ùi 伊主要 ê 成分，水素，來--ê。毋過這張長時間感光影像，閣有濫 sir-lí-khóng（黃色）kah 酸素（藍色）發出 ê 光。心臟星雲 中央是 開放星團 Melotte 15，內底 ê 少年恆星，利用激發態 ê 原子 高能光 kah 恆星風，tī 這區雕出幾若條足媠 ê 塗粉柱。心臟星雲 就 tī 仙后座 ê 方向，差不多 7500 光年 遠 ê 所在。 心臟星雲正爿下底，閣有 魚頭星雲 kah 伊做伴。 這張闊幅深空影像 清楚表示講，心臟星雲 ê 四箍圍仔 攏是咧發光 ê 氣體。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231213/
影像：William Ostling, Telescope Live
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231213.html

2022 年 12 月 5 號，無載人 ê 獵戶座太空船 用回航動力飛過月球 ê 時陣，鬥 tī 伊頂懸 ê kha-mé-lah 翕著這个景色。Tī 獵戶座太空船其中一組拍開 ê 太陽能枋陣列後壁，是 風暴洋 西爿 烏暗 koh 滑溜 ê 地形。Tī 月球這爿 ê 風暴洋 是足顯目--ê，伊是 月球頂懸去予熔岩崁牢 ê 月海 內底上大--ê。月球 ê 晨昏線，就是月球暗暝 kah 日時 ê 交界線，就 tī 這張影像倒爿。直徑 41公里 ê Marius 隕石坑 就 tī 中央頂懸，輻射形 ê Kepler 隕石坑 就出現 tī 正爿上邊仔，太陽能枋陣列 ê 正爿遐。Kepler 隕石坑 ê 淺色 ê 輻射紋向北 kah 向西去，一直到 烏暗 ê Marius 隕石坑 遐。2022 年12月11日，獵戶座太空船 轉來 in 兜 矣。落尾這个歷史性 ê Artemis 1 號任務 ê 獵戶座太空船成功轉來地球，落 tiàm 地球 表面 ê 太平洋，噴甲規四界，結束伊 ê 任務。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231207/
影像：NASA, Artemis 1
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231207.html

這是船底座星雲內底 ê 恆星 kah 塗粉 ê 相戰，恆星贏矣！講較詳細咧，拄生出來 ê 大質量 恆星 ê 高能光 kah 恆星風 kā 生 in ê 厚塗粉 ê 恆星托兒所 蒸發、歕予散。這寡塗粉柱是 tī 船底座星雲 內底，一个私底下叫做 神祕山 ê 所在。In 主要是會透光 ê 水素 氣體，毋過外觀是袂透光 ê 咖啡色塗粉。雖罔講有一寡 塗粉柱 看起來敢若 火把，毋過 in 無 著。而且，in 是去予附近 ê 恆星照予光。這張影像是 Hubble 太空望遠鏡 翕--ê，是咧強調 7500光年遠 ê 船底座星雲內底一个 1 光年 大，叫做 HH1066 ê 部份。閣幾若百萬年，這寡恆星就 會贏矣！這寡塗粉火把就會完全 蒸發 去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231206/
影像來源：NASA, ESA, Hubble Heritage (STScI/AURA)
資料處理：Franco Meconi (Terraza al Cosmos)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231206.html

這張向南天 天鶴座方向 翕 ê 1 度闊 闊幅視野內底，四界攏是遙遠 ê 星系。毋過，正爿下跤有三个捲螺仔星系是足出眾--ê。實際上，這三个星系是一組--ê，叫做 天鶴三重奏，離咱有 7000 萬光年遠。這張 12 月 13 翕 ê 望遠鏡影像，有翕著 美麗 彗星 C/2020 V2 ZTF。這粒彗星這馬 kah 咱 ê 距離差不多是 29 光分遠，伊綴 雙曲線 軌道欲離開內太陽系，迵過黃道面落去。這粒 ZTF 彗星 tī 2023 年 5 月 上倚太陽，kah tī 9 月上倚地球 ê 時陣較光。毋過咧翕這張南天夜空 ê 望遠鏡相片 ê 時陣，伊猶是足光--ê，所以伊看起來 kah 天鶴三重奏 就差不多光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231221/
影像：Dan Bartlett
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231221.html

格仔 A kah 格仔 B 敢是仝色？確實是按呢！你若是 kā 你 ê 滑鼠徙一下抑是 揤一下 就看會著 in 是仝色。這張 錯覺插圖，叫做 仝色錯覺。科學上，人類若是完全倚靠視覺，可能會拄著 看毋著 抑是看袂清，就算是直接 看 相對色彩，嘛有可能認毋著。天頂 嘛有足濟 錯覺 現象，像 月娘 tī 地平線附近 ê 寸尺看起來較大，抑是 天體 ê 外形看起來親像某一項物件。像 CCD 這款自動化、會當重複測量 ê 設備，會當予一般 科學 kah 天文學 較莫受著 人類 錯覺 ê 影響，雖然講無法度完全袂影響著。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231218/
影像：Edward H. Adelson, Wikipedia
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231218.html

這寡流星是 tùi 佗位來--ê？以天頂 ê 方位來看，這个答案應該是指向 雙生仔座。這就是是按怎 12 月主要 ê 流星雨叫做 雙生仔座流星雨，因為這寡流星雨攏是 ùi 一个 tī 雙生仔座 ê 輻射點 來--ê。Ùi 3D 空間來看，這粒 編號 3200 ê 奇怪小行星 Phaethon 噴出來--ê 沙塗大細 ê 屑仔，就落 tī 踅太陽 ê 軌道頂懸，其中較倚 地球 ê 部份就出現 tī 雙生仔座 頭前。地球 行過這粒小行星 ê 軌道 ê 時陣，因為這寡 落落來 ê 沙塗屑仔 出現 tī 雙生仔座方向，所以 輻射點 看起來就 tī 雙生仔座內底。這張相片是 kā 幾若工前 tī 中國 念湖 暗暝翕--ê 足濟張 相片鬥做伙 ê 組合影像。咱會當看著內底有超過 100 粒較光 ê 雙生仔座流星雨 ê 流星 軌跡。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231217/
影像：Hongyang Luo
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231217.html

編號 319 ê 小行星 Leona tī 12月 12 號 ùi 光爍爍 ê 參宿四面頭前行過，tiàm 地球頂懸照出一个烏影。毋過，逐家這擺若是想欲看紅巨星去予閘暗去，你就愛徛 tī 狹狹 ê 烏影帶 中央線下底附近。這條烏影帶迒過 墨西哥中部，向東到美國 Florida 州南部，太平洋，歐洲南部，kah 歐亞大陸。這兩張 tī 西班牙 Almodovar del Rio 翕 ê 相片，有翕著這个地心系統 ê 天文事件。倒爿是小行星掩星事件發生進前，正爿是發生了後。TĪ 這兩張相片內底，參宿四攏 tī 倒爿頂懸，tī 咱熟似 ê 獵戶座 ê 肩胛頭遐。這是一个足罕得出現 ê 掩星現象，伊 ê 輝度變暗去 ê 現象是足顯目--ê。Tī 短短幾若秒鐘 ê 時間內，這粒巨星去予一粒直徑 60 公里大 ê 主小行星帶 小行星閘去矣！

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231215/
影像：Sebastian Voltmer
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231215.html

天頂 這兩个大型弓形光弧是啥物？咱較熟似 ê 應該是倒爿 ê 銀河系 中央帶。這个銀河大盤仔內底攏是恆星 kah 星雲，敢若是 kā 大部份 ê 南天包起來。Tī 銀河彎弓下底，是 柑仔色 ê 火星 kah 仙女座星系。毋過這个暗暝毋但按呢！Tī這个 寒冷 ê 北極暗暝，天頂有短短仔時間出現第二个 大彎弓，kā 一部份北天箍牢，這就是極光。極光是比天星較倚咱，伊是 地球高層大氣 內底 ê 發光氣體。青色極光彎弓 頂懸，是咱 熟似 ê 一陣星，北斗星。這幅數位影像 是 kā 2022 年 11 月中踮 挪威 Lofoten 島 翕 ê 20 張相片鬥做伙 ê 組合影像。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231212/
影像：Giulio Cobianchi
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231212.html

太陽表面是一直咧改變。有幾若年是 tiām-chih-chih，太陽烏子 kah 活跳區嘛較少。其他年就較活跳較激烈，太陽烏子 嘛較濟，閣定定有 日冕物質噴射 (CME) kah 太陽爍光。太陽 表面受著磁性 ê 影響會產生反應。每 11 年一个週期，會經過相對較恬 ê 太陽極小期，kah 相對活跳跳 ê 太陽極大期。這支影片 ê 倒爿是 2019 年底一個月 ê 時陣，太陽 tī 太陽極小期 附近。正爿是 2014 年 ê 其中一個月，太陽極大期 ê 時陣。影片是 NASA 太陽動態天文台 tī 遠紫外光 波段翕--ê。咱 ê 太陽會 tī 2025 年才來到 太陽極大期，毋過 意外 ê 是，太陽表面這馬已經有足濟太陽活動矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231211/
影像：NASA, SDO, SVS
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231211.html

你是當時開始會曉認這陣星--ê？雖罔講 in 是全世界足濟人攏足熟 ê 一陣星，毋過 無仝文化會予伊無仝意象、產生無仝傳說。美國 kā 伊叫做 大支湯匙，咱 kā 叫做北斗星。這陣星是 國際天文聯合會 tī 1992年 ê 時陣定義 ê 大熊座 ê 一部份。其他星 ùi 倒爿到正爿是，搖光、開陽、玉衡、天權、天璣、天璇 kah 天樞。是講，星座 內底 ê 星，物理上無一定 有關連。毋過 較意外 ê 是，北斗星大部份 ê 成員看起來有仝款 ê 運動 方向，閣較大範圍內底 ê 天體 mā 是按呢。咱 量著 in 有共同運動，表示講這是一个 tī 咱附近、櫳櫳 ê 星團，kah 咱 ê 平均距離差不多是 75 光年 遠、大細 30 光年闊。這个星團較有名 ê 名是 大熊座徙動星群。這張相片 是 2017年 tī 加拿大 Alberta 省 金字塔山 翕--ê，天頂這寡天體就是北斗星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231210/
影像：Steve Cullen
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231210.html

11 月 19 日 ê 透早，昴宿星團 出現 tī 法國 Pyrenees 山脈 天頂 ê 夜空中。是講 tī 日出進前，這張感光 3 秒鐘 ê 相片拄阿好翕著這个意外 ê 景色：金爍爍 ê 流星光巡 迵過星團中心，kā 切做兩爿。Ùi kha-mé-lah ê 視角來看，星團 kah 流星 拄仔好 tī 南峰 山頂天文台 ê 正天頂。就算天文學家 認為 昴宿星團 離咱無偌遠，毋過這粒 tī 地球頂層大氣捽過、蒸發 ê 塗粉粒，實際上 kah 這个 實密 ê 少年星團 是差 400 光年遠。這張 夜空 縮時攝影是 kā kha-mé-lah kah 長焦鏡頭 鬥 tī 三跤馬頂懸，tī 離南峰 5 公里遠 ê Col du Tourmalet 山頂 ê 環法國鐵馬比賽路線 ê 山坡 翕--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231209/
影像：Jean-Francois Graffand
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231209.html

12 月 4 號 ê 時陣，週期性 彗星 12P/Pons-Brooks kah 織女星，就是北天 ê 天琴座 alpha，同齊出現 tī 這个 望遠鏡視野 內底。織女星 是地球暗暝天頂第 5 光 ê 天星，離咱有 25 光年遠。毋過這粒較暗 ê 彗星，離咱才 21 光分遠。是講 最近這幾若個月，彗星爆發造成 Pons-Brooks 彗星 ê 光度衝懸。伊有一个偏名叫做惡魔彗星，因為伊 ê 外形看起來敢若有生角 ê 款。有一寡咧逐星際太空飛行物 ê 迷眾，認為這款變形 ê 大型中央彗鬚，就親像 Star Wars 內底 ê 宇宙船 千年鷹號。12P/Pons-Brooks 是哈雷型彗星，頂擺來到咱 內太陽系 ê 時陣是 1954 年。後擺經過近日點，就是離太陽上倚 ê 時陣，會是 2024 年 4 月 21。這拄仔好是 4 月 8 號日全食路線經過北美洲 ê 2 禮拜前。毋過，因為伊 ê 軌道 對 太陽系黃道面來講，角度有較趨，週期 彗星 12P/Pons-Brooks ê 軌道就袂 kah 地球 ê 軌道交叉。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231208/
影像：Dan Bartlett
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231208.html

這是目前為止咱所知影挵地球 能量上懸 ê 粒子之一。毋過伊是 ùi 佗位來--ê？這粒粒子 ê 名是 天照，是日本 神道教 太陽女神 ê 名。伊佮所有挵 地球大氣 ê 宇宙線 仝款，會造成電子、質子、佮其他 基本粒子 ê 空氣射叢，就是粒子西北雨 ê 意思，噴到地球面頂。這張插圖 內底 ê 宇宙線 ê 空氣射叢，挵著 美國 猶他州 ê 望遠鏡陣列。這就紀錄佇 2021 年 5 月 ê 「天照事件」中。宇宙線空氣射叢是定定有，你嘛可能去予這款事件 ê 粒子噴過，毋過你可能無感覺。這款高能粒子 ê 源頭可能是 原子核，這个 謎題 有留兩个線索落來。第一，咱毋知影粒子抑是原子核是按怎提著遮爾懸 ê 能量。第二，科學家捌追蹤這寡粒子，看有法度揣著 in ùi佗位來--ê。毋過無揣著可能 ê 來源。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231205/
插圖：Osaka Metropolitan U./L-INSIGHT, Kyoto U./Ryuunosuke Takeshige
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231205.html

無啦！月娘毋是弓，嘛無共飛龍機當做箭射出去。這張相片是一个意外相疊 ê 結果。飛龍機 ê 白煙尾溜 一般攏是白色--ê，毋過日出方向 ê 大量空氣共藍光彈出去，毋但造成 天色變做藍色--ê，嘛共白煙尾溜反射做 紅色--ê。佇 飛龍機 後壁遙遠 ê 月眉，嘛小可仔紅紅。這張相片是頂個月初 ê 時陣佇 英國 Bolton 翕--ê，是日出了後隨翕--ê，所以飛龍機佮白煙尾溜攏去予下底 ê 日光照著。是講真不幸，閣幾分鐘，這場臨時出現 ê 天空 表演就欲煞矣。飛龍機飛走，天愈來愈光，月娘 繼續 peh 起來，毋過愈來愈看袂清楚，白煙尾溜 嘛沓沓仔無去矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231204/
影像：Juned Patel
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231204.html

這寡人無危險啦！Ùi 倒爿出現 ê 是月娘，只是較遠爾爾。月娘 會遮爾大粒，是因為這是 用長焦鏡頭翕--ê。月娘 振動主要是因為 地球 咧自轉，伊就沓沓仔出現佇 Teide 山 後壁，彼是一粒佇非洲西北爿 Canary 群島 海岸 ê 火山。相片內底 ê 人是 16 公里遠，有足濟台 kha-mé-lah 攏面向日頭，因為 in 嘛咧欣賞佇攝影師後壁 ê 日出。月圓 出現，日頭就會落去。這毋是 意外，這是因為太陽佇天頂總是 kah 月圓是佇相對面。這支影片 是 2018 年 ê 牛奶月 彼陣拍--ê。這毋是 縮時攝影 影片，月娘 落去真正就遮爾緊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231203/
影像：Daniel López (El Cielo de Canarias)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231203.html

你會當 坐地鐵去參觀中國北京這个天文台，毋過你佇遐袂揣著任何望遠鏡。天文學家佇西元 1400 年代踮 北京古觀象台 頂懸裝這台儀器，通追蹤一寡 目睭會當直接看著 ê 恆星 kah 行星 ê 位置，共 in 量較準咧。其中一寡大型華麗 ê 天文儀器 到今猶佇遐。今仔日你甚至會當佇觀星台頂懸看天星，毋過佇 城市燈火 遮爾光 ê 狀況下，干焦閣跤光 ê 天體才看會著。這張是固定佇三跤馬頂懸 ê kha-mé-lah 照時間翕--ê 系列相片，有紀錄美麗 ê 弧形星軌，上光 ê 彼條光跡是月娘--ê。伊 ê 弧較闊，就出現佇古觀象台黃銅 渾天儀 ê 後壁。你嘛會使共這張 kah 1895 年 9 月翕--ê 北京古觀象台做比較。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231202/
影像：Jeff Dai (TWAN)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231202.html

Tī 這个 深空夜景 中，銀河中心 就 ùi 智利山頂 ê La Silla 天文台後壁 peh 起來。咱 ê 銀河中心就 tī 人馬座方向，相片 ê 倒爿。這張是用南歐天文台 ESO ê 新科技望遠鏡翕--ê，伊有上新 ê 主動光學系統，通控制遮爾大片望遠鏡 ê 鏡莫變形。正爿是 ESO 3.6 公尺大 ê 望遠鏡，是揣 系外行星 HARPS kah NIRPS ê 光譜儀。Tī in 之間 ê 銀河中心核球 內底，是星際塗粉雲、金爍爍 ê 恆星、星團、kah 星雲。中央附近發出紅色水素發射線--ê，是當咧進行恆星形成 ê 內海仔星雲 M8。Tī 這个宇宙內海仔 倒爿是三裂星雲 M20，伊除了有發紅光 ê 發射線，閣有發藍光 ê 反射塗粉雲。兩个攏是 望遠鏡愛好者上愛看 ê 銀河中心 ê 目標。這張組合相片 是 2023 年 4 月彼陣用仝一台 kha-mé-lah，連煞翕仝一个視野 ê 地面影像 kah 天頂影像，才共組合起來--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231201/
影像：José Rodrigues
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231201.html

這隻 燕魟 tī 宇宙海內底 leh 飛。這个烏暗星雲 ê 正式編號是 SH2-63 抑是 LBN 86，是氣體 kah 塗粉組成--ê，伊 ê 外形就親像是 海底 ê 魚仔。這个 星際塗粉 星雲 ê 光是咖啡色--ê，因為伊 kā 伊後壁 ê 可見光 閘 leh、予光 變較紅。烏暗星雲主要是 tī 紅外線 leh 發光，毋過伊嘛會 tī 可見光 反射伊邊仔 ê 恆星光。烏暗星雲內底 ê 塗粉粒，一般攏是 tī 次毫米波看會著 ê 炭素、sir-lí-khóng、酸素，in ê 表面定定有 堅一重 一酸化炭素 kah 窒素。烏暗星雲嘛是 分子雲，因為𪜶 內底有足濟 水素 分子 kah 較大 ê 分子。伊進前無號名，這馬叫做 燕魟 星雲，平常時是 足暗--ê。毋過這張感光超過 20 點鐘 ê 清楚影像，是 tī 智利 ê 夜空中 翕--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231127/
影像：Vikas Chander
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231127.html

你 tī 日落無偌久 看著彼粒 ùi 東爿 peh--起來 ê 光明燈，是木星。11 月 2 號 ê 時陣，咱太陽系 上大粒 ê 氣體巨行星 tī 半暝 ê 天頂 peh 甲懸懸懸。這工是伊 tī 2023 年行到「衝」，就是 tī 地球天頂 kah 太陽相對 ê 位置。毋過才無幾工前，10 月 28 ê 時陣，月娘嘛行到「衝」。結果月圓 kah 木星煞有法度做伙出現 tī 這幅長焦視野內底。這幅天景相片是兩款感光組合 ê 結果，一款長時間感光，一款短時間感光。這是為著欲 tī 這个暗暝 ê 月偏食 期間，做一擺紀錄光爍爍 ê 行星 kah 閣較光 ê 月娘。月光迵過意大利北部 ê 薄懸雲，製造出 多彩 ê 雲 kah 月華。咱若是較斟酌 kā 看，你閣會發現幾粒木星 ê 加利略衛星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231103/
影像：Giorgia Hofer
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231103.html

太陽系內底上大粒 ê 衛星是生做啥物款？木星 ê 衛星 木衛三 Ganymede 是比 水星 kah 冥王星 閣較大，伊 ê 表面有一重冰。表面有較淺色 ê 少年隕石坑，下底有濫一寡較老、較烏、一塌一塌 ê 地形，中央閣有 山溝仔 kah 山陵。造成溝仔地形 ê 原因到今猶是一个 研究主題，目前主要 ê 假說是講，這可能 kah 冰質 ê 枋塊徙動有關。木衛三 Ganymede 去予人認為講有 一重海洋，比地球 ê 水閣較濟，而且 有可能有性命。Ganymede 就 kah 咱 ê 月娘 仝款，嘛是用 仝一面 面對伊 ê 母行星，木星。這張影像 是 2021 年 NASA ê Juno 機器人太空船飛過這粒大衛星 ê 時陣翕--ê。這擺 Juno 太空船近距離飛過衛星 ，予 Juno 踅木星 ê 軌道週期 ùi 53 工變做 43 工。Juno 會繼續 研究 這粒巨行星 ê 懸重力，無四常 ê 磁場，kah 複雜 ê 木星雲結構。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231128/
影像來源 kah 版權：NASA/JPL-Caltech/SwRI/MSSS
資料處理 & 版權: Kevin M. Gill
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231128.html

這个看起來亂糟糟、有交纏雲絲--ê，是衝擊波產生 ê 發光氣體。咱會當 tī 地球夜空 ê 天鵝座方向看著伊，是 面紗星雲 ê 一部份。面紗星雲 是大型 ê 超新星殘骸，是大質量恆星死亡爆炸了後，產生 ê 一个脹大 ê 雲。Ùi 超新星爆炸來 ê 光 應該是 tī 5000 年前 to̍h 行到地球矣。這个 發光 ê 雲絲 親像是 ùi 邊仔看著床單面頂長長 ê 皺痕。影像內底清楚看著發紅光 ê 離子化水素原子 kah 發藍光 ê 離子化酸素原子。面紗星雲 嘛叫做 天鵝環，編號是 NGC 6979，差不多是 月娘 視角 ê 6 倍大。這个雲煙差不多有 30 光年 長，估計伊到地球 ê 距離是 2400 光年遠。伊嘛叫做 Pickering 三角形，是 哈佛大學天文台 台長號 ê。伊閣有一个名，是用發現者 天文學家 Williamina Fleming ê 名 kā 號 ê，to̍h 叫做 Fleming 三角精靈。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231121/
影像：Cristiano Gualco
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231121.html

這个美麗 ê 星際塗粉雲是恆星風 kah 輻射 kā 雕塑出來的。彼當時仔看起來就敢若是咱知影 ê 某一个形體。照伊 ê 形體，伊去 hŏng 叫做 馬頭星雲，chhāi tī 1500 光年 遠 ê 所在，就藏 tī 大型 獵戶座星雲 複合體內底。這片烏暗雲 ê 懸度差不多有 5 光年，伊 ê 編號是 Barnard 33。咱看會著伊只是因為後壁 ê 紅色發射星雲 IC 434 咧發光，所以咱才看會著 伊閘光 ê 塗粉形體。烏暗雲內底 有 恆星當 leh 形成。相對來講，這張影像 倒爿下底 ê 藍色反射星雲 NGC 2023，是踅 tī 一粒高溫、少年 恆星 ê 四箍圍仔。這張美麗 ê 彩色相片，是 kā 幾若台望遠鏡紀錄 ê 狹頻 kah 闊頻 影像鬥出來 ê 結果。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231120/
影像：Mark Hanson & Martin Pugh, SSRO, PROMPT, CTIO, NSF
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231120.html

天欲光進前，意大利 Sicily 島 上南爿一粒 岩石 ê 天頂，有一个歪歪 ê 山角形 chhāi tī 遐。組成這个三角形 ê 成員，是地球天頂 上光 ê 4 粒天體 ê 其中 3 粒：木星、金星、kah 月球。雖罔講，月娘賰薄薄 ê 下月眉，毋過咱會當看著去予 地球反照光 照著 ê 大部份月盤。這張相片是 2022 年 4 月 27 翕--ê。中央是金星，倒爿是木星，in 之間 ê 角距離是差 3 度，而且欲行到 合相 ê 位置矣。金星 kah 木星 ê 合相 逐年攏會發生一擺，會出現 tī 日出進前 ê 東爿，抑是日落了後 ê 西爿。這張相片 是 地球頂懸 上光 ê 天體，太陽，欲 peh 起來 進前一點鐘左右翕--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231114/
影像：Giovanni Passalacqua
文稿：Liz Coelho (Pikes Peak)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231114.html

南半球 ê 天爐座星系團 是離咱上倚 ê 星系團之一，會按呢號名只是因為大部份星系攏會當 tī 天爐座 方向揣著。天爐座 tī 差不多 6200 萬光年遠 ê 所在，比咱 ê 厝邊 仙女座星系 較遠 20 外倍，伊比成員數量較濟 ê 室女座星系團 才遠 10 葩爾爾。Tī 這个 3 度闊 ê 視野內底，差不多每一个黃色光點攏是天爐座星系團內底 ê 長株圓星系。長株圓星系 NGC 1399 kah NGC 1404 是下底中央彼个星系團內底上光、上主要 ê 成員。正爿頂懸彼个引人注目 ê 大型棍螺仔星系 NGC 1365，嘛是天爐座星系團內底上主要 ê 成員之一。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231102/
影像：Marcelo Rivera
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231102.html

你敢有看過仙女座星系 M31？雖罔講 M31 對咱目睭來講是一个暗暗霧霧 ê 斑，毋過你看著 ê 光是 200 萬年以前發出來--ê，這真有可能是你會當 直接看著--ê 上老 ê 光。。這張相片 是舊年年初 ê 時陣翕--ê，這个時陣 仙女座星系 欲落落去 瑞士 ê Alps 山 後壁矣。咱會當用目睭直接看著咱 銀河系 ê 厝邊星系，是一件足 cool ê 代誌。而且長時間感光，嘛會當看著足濟 較暗、hŏng 讚嘆 ê 細節。這張組合影像 ê 前景影像 kah 背景影像，是用仝一台 kha-mé-lah tī 仝一个地點 連煞 翕出來--ê。最近 ê 資料表示講，咱 ê 銀河 會 tī 未來幾若十億年 kah 仙女座星系相挵 kah 合併。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231113/
影像：Dzmitry Kananovich
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231113.html

一部份 ê 日頭 tī 這個月初無去矣，毋過無啥物人咧煩惱。無去 ê 部份，tī 一寡所在 看著 ê 是連中央就攏無去。這是因為 月球 tī 伊頭前 kā 閘去，就是咱知影 ê 日環食。這張相片是日食 系列相片，是月球 tī 天頂行超過 peh 起來 ê 太陽。前景 ê 山崙是 美國 猶他州 ê 工場山。Ùi 日頭中央 ê 放射光毋 是真--ê，是 kha-mé-lah ê 光圈繞射現象，這就叫做 太陽星。月娘是真--ê，毋過有 kā 伊調較光咧，予伊 ê 外形較清楚。按呢就會當 tī 火環日食 ê 階段，看著月娘 ê 位置 leh 改變。是講這个 日食系列相片 實在是予人讚嘆，毋過這張相片其實是天文攝影師 leh 練習爾爾。是按怎講？因為明年 2024 年 4 月 8 號 北美洲 會出現 日全食，伊向望會當利用這擺機會，tī 日全食 ê 時陣翕著較好 ê 相片。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231101/
影像：MaryBeth Kiczenski
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231101.html

Chăng 暝 地平線頂懸發紅光 ê 是啥毋？是極光啦！咱 ê 太陽 最近是 特別活跳跳，幾若工前伊發生 表面爆發，噴出一大堆電子、光子、kah 大質量紮電原子核。日冕物質噴射 會驅動地球 ê 極光，這咱知影通常是發生 tī 地球 北半球 較倚南部 ê 所在。舉例講，這是頭一擺 天文攝影師 tī in 兜 意大利 翕著極光。而且，足濟極光影像 ê 色光，實在是紅甲。這張影像 ê 前景 tī 意大利這爿 ê Alps 山 ê Comelico Superiore 庄頭，天頂閣有 ùi 倒爿下跤 peh--起來 ê 銀河系 中央帶。毋過上吸引人 ê 猶是上正爿 ê 紅色 極光。這張相片 是 tī 仝一个地點用仝一台 kha-mé-lah 連煞翕 ê 前景相片 kah 背景相片鬥做伙 ê 組合影像。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231106/
影像：Giorgia Hofer
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231106.html

彼个 ùi 火星 表面走過去--ê 是啥物？是風沙暴。像這款會捲踅 ê peh 升空氣柱是去予溫度較懸 ê 地表熁燒--ê，而且這款現象 tī 地球 溫暖焦燥 ê 所在嘛定定 看會著。風沙暴 kā 火星表面鬆鬆 ê 紅色塗粉弄起來 ê 時陣，就較看會著，毋過下底較深較重 ê 沙塗就無代誌。這个過程一般講來，干焦會持續幾若分鐘爾爾。風沙暴毋是干焦看起來足 cool 爾爾，in 閣會 留跤遮落來。而且 太陽能枋竟然有法度保持清清氣氣，hŏng 記牢牢。這支 AI 控制 ê 影片，是 tī 8 月初 ê 時陣毅力號探測車拍--ê，伊這馬 tī Jezero 隕石坑內底搜揣 古早時代性命 ê 線索。這支 6 秒鐘 ê 縮時攝影影片，實際上 ê 時間是超過 1 分鐘。這个 捲踅 ê 風沙暴 毋是蓋遠，伊 ê 速度應該是一點鐘 20 公里，伊 ê 懸度大細差不多有 2 公里懸。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231107/
影像來源：NASA, JPL-Caltech, Perseverance Rover
AI 處理：PipploIMP
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231107.html

萬聖節 ê 起源 是 tī 足久足久以前，而且 kah 天文有關。萬聖節 是 ùi 西元前 5 世紀開始--ê，這工是提來慶祝 跨季日，就是 ùi 秋分 到 冬至 中央。秋分這工 ê 日時 kah 暗暝平長，冬至這工 tī 北半球是日時上短、暗暝上長。毋過 現代曆法 內底，就算今仔日是萬聖節，真正 ê 跨季日 會是 後一禮拜。另外一个 跨季日是 番鼠日，嘛會使叫做 竹鼠日。萬聖節 ê 現代慶祝方式，猶是有 保留以前 ê 風俗，就是 妝甲怪怪，通 kā 幽靈嚇驚走。Tùi 這个古老節日上適當 ê 貢品，就是這張 巫師星雲 (NGC 7380) ê 特寫相片。這寡恆星、氣體、塗粉 ê 交互作用，視覺上 tùi 一寡人來講，會看做是 小說內底講著--ê，古早時代 ê 巫師。雖罔講星雲干焦會活幾若百萬年爾，毋過一寡受著 重力聚集氣體生出來 ê 恆星，有可能會比咱 ê 太陽 活閣較久。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231031/
影像：Richard McInnis
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231031.html

咱 ê 月娘看起來應該毋是按呢。咱地球 ê 衛星，月球，實際上 表面並無遮爾豐富 ê 紋理，伊 色 ê 變化是無差遮爾濟。毋過 這張影像 是照誠實 ê 色彩 做數位處理 ê 結果。是 kā 幾若張相片疊做伙了後，強調 月球 ê 地表特性 所產生 ê 圖。強化 ê 圖，會當予咱看這寡隕石坑看較清楚咧。嘛較有法度予咱了解 tī 過去這 46 億年 ê 歷史內，發生 tī 月球 ê 大型衝擊事件。像 較暗 ê 區域 就叫做 月海，遮以前是 熔岩海，內底 ê 隕石坑 較少。另外就是，影像 ê 色彩 雖然是照月球地表 ê 誠實成份去分配--ê，毋過色彩有調整過，對比嘛有改較大。Tī 遮，藍色代表鐵 ê 成份較濟，柑仔色代表 a-lú-mih ê 成份有較超過。雖罔講這幾若十億年來，月球 一直用仝一面向咱地球，毋過 現代 ê 技術 已經有法度予咱 tùi 伊 較了解 矣，嘛知影伊會按怎 影響著咱地球。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230116/
影像：Darya Kawa Mirza
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230116.html

Ùi 初一行到十五 ê 半路，就是行到 頂半月 ê 月相。這是月球一個月 踅地球一輾 ê 四分一。頭一个 四分一，有半粒月娘看會著，這是 日光 kā 照予光--ê 彼半爿。月球 ê 下半月就是 ùi 十五 行到 初一 ê 半路，日光 kā 月盤另外彼半爿照予光。毋管是頂半月 抑是 下半月 ê 月相，kā 月球分做暗暝 kah 日時 ê 晨昏線，就 tī 中央 kā 月娘分做兩爿。月球晨昏線附近 ê 隕石坑 kah 山，會因為有較長 ê 烏影，煞變甲足清楚。所以半月 ê 月相是一个觀測月球足好 ê 時間點。Kā 你提醒一下，2022 年 所有 ê 半月 月相 kah in ê 日期，攏 tī 這張望遠鏡影像內底排甲好勢好勢。是講 ，你下暗會當看著月娘 ê 頂半月。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231021/
影像：Marcella Giulia Pace
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231021.html

這張 星系滿四界 ê 清楚望遠鏡影像 是 10 月 12 tī 美國加州六月湖天頂翕--ê。這个天景有 2 度闊，就 tī 北天星座 獵犬座 ê 邊界。Tī 倒爿頂懸彼个顯目 ê 星系是 NGC 4258，伊 to̍h chhāi tī 2350 萬光年遠 ê 所在，是一个大型捲螺仔星系，嘛叫做 Messier 106。中央正爿頂懸彼个吸引咱目睭 ê 是側向捲螺仔星系 NGC 4217，伊就 tī 6000 光年遠 ê 所在。編號 C/2023 H2 ê Lemmon 彗星 拄仔好行過 這个美麗 ê 視野，這是舊年 4 月 ùi Lemmon 山巡天計畫 ê 影像資料內底揣著 ê 彗星。這粒彗星有顯目 ê 青色彗鬚，kah 一條狹狹暗暗 ê 離子尾溜，伸 tùi 這幅圖頂懸去。這位 內太陽系 ê 人客 離咱才無夠 7 光分遠，用雙筒望遠鏡欲看猶真困難，毋過伊是愈來愈光矣。編號 C/2023 H2 ê Lemmon 彗星 會 tī 10 月 29 行到近日點，就是離太陽上倚彼點，tī 11 月 10 號行到近地點，就是離咱地球上倚彼點。伊 tī 北半球天頂出現 ê 時間嘛會 ùi 透早 變做暗暝。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231020/
影像：Dan Bartlett
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231020.html

你敢有想欲看著 kā 日頭箍牢 ê 環？Tī 全世界 ê 日時欲看著這个景色，攏是 真簡單 ê 代誌。這是薄懸卷雲內底 無仝方向排列 ê 冰晶 產生 ê 22 度闊 ê 圓形日暈，嘛叫做日觳，是比虹較捷看著。這張影像是 2021 年 5 月 29 tī 意大利 羅馬 附近，用智慧型手機仔 翕 ê。你若是較細膩 kā 日頭閘 leh，差不多用一个指頭仔尾，按呢你 to̍h 會當看著 平常時看會著 ê 日觳環。這个日觳有一个特別角度，差不多愛 kā 你 ê 手骨伸長，指頭仔拍開，ùi 大頭拇 kah 尾指 ê 角度欲仝。毋過若是欲看 火環日食 就較困難。今仔日（10 月 14） 拄仔好會當看著這个特殊 ê 環形日食，嘛叫做 火環。你若是徛 tī 月球產生 ê 狹細烏影帶內底，to̍h 有法度看著。這个烏影帶迒過一部份 ê 北美洲、中美洲、kah 南美洲。毋閣 tī 較闊 ê 範圍，包括規个美洲，是攏看會著日偏食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231014/
影像：Vincenzo Mirabella
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231014.html

一冬前，美國東部時間 2022 年 11 月 16 半暝 1 點 47 分 ê 時陣，NASA 進行頭一擺 深空探索系統綜合試驗。NASA ùi 地球發射 太空發射系統火箭，執行 Artemis 1 號任務，面頂載一台獵戶座太空船。Ùi Kennedy 太空中心 歷史久長 ê 39B 發射場 發射出去 1 點鐘了後，獵戶座太空船 ê 外部影像 kha-mé-lah ùi 太空 ê 新角度 翕著這張相片。前景是 獵戶座軌道機動系統 ê iăn-jín kah 輔助 iăn-jín，就 tī 歐洲服務艙 ê 底部。服務艙其中一个 7 公尺長 ê 太陽能枋陣列翼 後壁，是太空船 ê 美麗家園。無載人 ê Artemis 1 號任務 飛倚到月球表面，來到 7 萬公里懸 ê 逆形軌道。這个任務擋超過 25 工，是 leh 試驗看人類探索月球 kah 火星 ê 能力到佗位。Artemis 1 號任務 ê 成功，會當幫贊 Artemis 2 號任務 ê 進行。2024 年 11 月以後，Artemis 2 號任務按算欲載 4 个太空人進行踅月行動，了後才轉來地球。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231118/
影像：NASA, Artemis I
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231118.html

11 月 28 是 獵戶座太空船載 Artemis 1 號 任務 飛出去 ê 第 13 工，這工是伊飛到離咱地球上遠 ê 所在。獵戶座太空船就 tī 離地球超過 43 萬公里遠 ê 遠逆行軌道，是目前為止載人太空船飛到上遠 ê 所在。進前上遠 ê 紀錄是 1970 年 去月球 ê Apollo 13 號。Tī 這支第 13 工飛行日 ê 相片內底，咱地球 kah 月球 攏 tī 內底。Ùi 這台無載人 ê 太空船方向來看，咱地球 kah 月球差不多是平大粒。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231130/
影像：NASA, Artemis I
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231130.html

捲螺仔風內底敢會閣有一个捲螺仔風？一般講來是袂。OK，按呢若是一个較闊 ê 沙螺仔風 敢會藏一个捲螺仔風 tī 內底？無可能，因為 捲螺仔風是 ùi 天頂來--ê，毋過沙螺仔風是 ùi 塗跤 生出來--ê。這幅圖內底 ê 是 陸捲螺，是一款無四常 ê 捲螺仔風，出現 tī 足猛 ê 雷雨 邊仔。這張陸捲螺 相片，是一个專門 leh 逐風暴 ê 愛好者，tī 2019 年 6 月 tī 美國 Kansas 州 翕著、認出來--ê。真正 ê 捲螺仔風 是 tī 中央，外圍彼輾 可能是中央捲螺仔風 擲出來--ê 較大粒 ê 塗粉粒。到今為止，唯一咱知影會有捲螺仔風 ê 行星是 地球，毋過太陽表面 嘛有 kah 捲螺仔風 類似 ê 活動，而且 沙螺仔風 tī 火星 是定定有。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231129/
影像：Brad Hannon
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231129.html

恆星形成區就親像是一支宇宙筅仔，利用內底 ê 發射線、塗粉、kah 烏暗星雲畫圖，畫出一張 星際畫布。這是一張 5 度闊 ê 望遠鏡拼鬥圖，這區包括 足光 ê 畢宿五以北 ê 區域，就 tī 金牛座分子雲 氣泡 ê 內底壁。相片倒爿下跤有 編號 Sh2-239 ê 發射線，可能是少年恆星藏 tī 遐。這區 ê Herbig-Haro 天體 (HH 天體)，是 kah 拄生出來 ê 恆星有關 ê 星雲，伊 ê 特徵是水素氣體受著衝擊產生 ê 紅色噴射流。金牛座 T 星 ê 正爿頂懸，是 金牛座 T 型變星 ê 原形。伊 ê 邊仔是一个黃色星雲，歷史上 kā 叫做 Hind 變光星雲 (NGC 1555)。金牛座 T 星這馬去 hŏng 認為是一粒少年、猶無夠幾若百萬歲 ê 類太陽恆星，猶 tī lih 恆星形成 ê 早期階段。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231123/
影像：Yuexiao Shen, Joe Hua
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231123.html

彗尾是 ùi 佗位來--ê？咱揣無 彗核 頂懸佗位通 噴出物件，形成 彗尾。毋過 ESA ê Rosetta 太空船 tī 2016 年 ê 時陣，毋但翕著 彗星 67P 頂懸 ê 噴射流，嘛 ùi 噴射流中央飛過去。這張相片欲 kā 逐家講 ê 是，金爍爍 ê 雲煙 是 ùi 一个細細箍 ê 圓箍仔內底噴出來--ê，邊仔是 10 公尺懸 ê 壁。科學家 ùi Rosetta 太空船提著 ê 觀測資料 做分析，發現講噴射流是塗粉 kah 水冰組成--ê。這个敧敧曲曲閣 無啥物特別 ê 地形 暗示講，tī 濟孔 ê 地表下底，應該是發生啥物代誌，才會產生這个雲煙。這張影像 是 Rosetta 任務欲煞 進前 2 個月翕--ê，彼陣太空船 ê 任務是欲去攏彗星 67P ê 地表。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231126/
影像：ESA, Rosetta, MPS, OSIRIS; UPD/LAM/IAA/SSO/INTA/UPM/DASP/IDA
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231126.html

這幅星際星場內底 ê 恆星 kah 塗粉，敢有啥物形體予你感覺足趣味--ê？這規片闊莽莽、反射恆星光 ê 雲，就敢若是有 寶石 tī 內底仝款，伊就浮 tī 皇家星座 仙王座 ê 夜空。這寡 敢若幻影 ê 幽靈 離 地球 厝邊隔壁猶足遠--ê，in 就 tī 銀河盤內底，仙王座爍光 分子雲複合體 ê 邊緣，離咱有 1200 光年 遠。Tī 這幅圖 下底 ê 幽靈星雲，編號是 VdB 141 抑是 Sh2-136。伊有超過 2 光年大，是比其他 奇奇怪怪 ê 組合體 較光。反射星雲 內底閣看會著 早期 恆星形成過程中，實密核心 崩塌 ê 明確痕跡。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231030/
影像：Bogdan Jarzyna
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231030.html

這粒浸 tī 奇怪 ê 青色光內底，生做敧敧曲曲 ê 細粒行星，面頂竟然有世界媠 ê 水沖 kah 宇宙懸 ê 山。這粒就是地球。11 月 9 號 這暗，有一台 數位 kha-mé-lah tī 冰島西部 ê 教堂山 山區 翕著 ùi 上低點為中心 ê 360 度 拼鬥影像。極光嘛叫做 北極光。閃閃爍爍 ê 極光 窗仔簾提供淺青色 ê 光線。強烈 ê 極光現象是 11 月初 ê 太陽活動引起--ê，太陽活動 kah 地球磁層 作用，產生強烈 ê 地磁風暴。教堂山本身是 chhāi tī 這个 立體投影 ê 圓形地平線頂懸。北半球 ê 天文愛好者會 tī 教堂山天頂 揣著 逐家足熟 ê 北斗星。正爿下跤，實密 ê 昴宿星團 kah 巨行星 木星，嘛 tī 這粒細粒行星 ê 夜空中閃閃爍爍。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231125/
影像：Victor Lima
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231125.html

這兩張 厝頂望遠鏡 翕--ê 木星影像看起來是足清楚--ê。兩張攏是 tī 11 月 17 tiàm 新加坡翕--ê，這工是 2023 年木星衝 過了 2 禮拜後。這粒大粒行星 tī 半暝 peh 去 lih 天頂，伊 kah 新加坡 ê 距離才 33.4 光分爾爾。按呢差不多是 4 ê 天文單位 遐爾遠。踅 tī 木星表面 ê 暗帶 kah 光區 ê 細節是遮爾清楚，頂懸閣有 tī 這个大型世界內底 白色雞卵型 ê 捲螺仔旋。木星上有名 ê 大紅班猶是南半球上顯目 ê 標誌。木星 ê 自轉是足緊--ê，10 點鐘踅一輾。所以，咱若是 kā 影片內底差 15 分鐘 ê 兩張影格提出來，就是一組立體影像矣。咱來看這張相片中央，兩粒目睭看對互相交叉 ê 方向，一直看到兩張獨立影像合做伙，你就會當看著太陽系內底上大粒 ê 氣態巨行星 ê 3D 影像。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231124/
影像：Marco Lorenzi
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231124.html

IC 342 kah 咱附近 大型較光 ê 捲螺仔星系 寸尺差不多，伊才 1000 萬光年 遠 爾爾，就 chhāi tī 長頷頸 ê 北方星座 鹿豹座 遐。IC 342 是一个足大型 ê 宇宙島，應該是咱夜空中一个足顯目 ê 星系，毋過 tī 這个清楚 ê 視野內底，伊煞藏起來矣。咱干焦會當 迵過 由咱 銀河盤 內底 ê 恆星、氣體、kah 塗粉雲組成 ê 面紗看著伊。就算 IC 342 ê 光受著咱 kah 伊之間 ê 宇宙雲 影響煞變較暗較紅，毋過這張 清楚 ê 望遠鏡影像 有揣著星系內底 ê 塗粉、少年星團、kah 綴捲螺仔手骨 發光 ê 恆星形成區。捲螺仔手骨就是 ùi 星系核 踅出來、踅甲遠遠 ê 結構。IC 342 最近才拄經過一擺足激烈 ê 恆星形成 活動，因為伊 kah 咱 ê 距離算近--ê，所以伊 ê 引力會影響著 本星系群 kah 銀河 ê 演化。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231122/
影像：Steve Cannistra
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231122.html

Tī Qeqertaq 庄 一般講來是無啥物光害問題。這个 tī 格陵蘭島西部海岸 ê 偏僻庄頭，tī 2020 年 ê 時陣人口數才 114 ê 人爾。就算是按呢，夜空中 ê 光猶是 leh 爍 leh 爍 leh。地球 最近有較強 ê 地磁風暴。11 月 6 號 ê 時陣，這寡美麗 ê 極光 kha-tián 就出現 tī 北極區 ê 天頂。這个北緯 70 度 ê 極區 tī 紲落來幾若禮拜，會開始變做 極夜，就是日頭規工攏袂 peh 起來 ê 暗暝。這个予人精神 ê 北極光，就反射 tī Disko 灣 ê 海面上。這个景色內底有一粒孤獨 ê 冰山，伊浮 tī 冰海頂懸 leh 行，去予海邊 ê 燈火照予光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231117/
影像：Dennis Lehtonen
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231117.html

月娘是發生啥物代誌？昨昏有一部份月球行到 地球烏影 下底。這毋是逐個月攏有，一年會發生一擺到兩擺，因為月球踅地球 ê 軌道 有小可仔趨一个角度。這張相片是 拍獵月，是秋分了後 ê 第二擺月圓，伊 tī 意大利 發生 月偏食 ê 時陣，會出現 2 擺。倒爿 ê 月娘大部份攏 過度 感光 矣，伊 ùi 正爿下底開始發生月食，tī 遮有出現咱熟似--ê 月球表面。正爿是仝一粒 月娘，kah 伊相比，月球是正常感光，毋過正爿下底是暗--ê。地球 向月球彼半爿頂懸 ê 人攏看會著 各種月食。天頂 若是無雲，歐洲、非洲、亞洲、kah 澳洲，攏會當 看著 這擺 ê 月食。北美洲 會 tī 4 月 ê 時陣看著 日全食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231029/
影像：Orazio Mezzio
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231029.html

金星這馬是地球天頂上光 ê 透早星，會 tī 日頭出來進前出現 tī 東南爿地平線頂懸。11 月 9 號 拜四這工，tùi 透早就 peh 起來 ê 人來講，這粒 tī 天頂 ê 白銀色燈塔 就 kah 下月眉，兩粒成做一對。毋過 tī 北半球一寡所在 看著--ê，是月娘 ùi 金星面頭前行過，會 kā 後壁 ê 金星閘去。Tī 歐洲大部份所在，月掩星嘛有可能 出現 tī 日時 ê 天頂。這个照時間順序排 ê 組合相片，是 leh 翕月娘 kah 透早星 tī 波蘭華沙 ê 藍天愈行愈倚 ê 情形。這 8 張 清楚 ê 望遠鏡速翕，是 ti 當地時間 10:56am 到 10:58am 之間翕--ê。照時間排是 ùi 倒爿翕到正爿，金星就 tī 足光 ê 月球邊緣 閃閃爍爍。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231116/
影像：Katarzyna Kaczmarczyk
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231116.html

這張相片是 tī 法國北部 天拄暗 ê 時陣翕--ê。地平線方向有淡薄仔雲，天頂有一條 闊闊闊、光光光 ê 紅弧，是一个意外 ê 人客。這是 11 月 5 號 向天頂點方向翕--ê，是一張 ùi 西爿到東爿 ê 拼鬥影像。暗暗 ê 大氣光帶 是 穩定極光紅弧 (SAR 弧) ê 一个例。這个真罕得看著 ê 夜空現象 嘛出現 tī 世界各地真罕得出現--ê 足低海拔 ê 所在，而且 較強地磁風暴 出現 ê 時陣嘛有活動力較強 ê 極光現象。公民科學 kah 衛星 調查 對 穩定極光紅弧 和 in kah 極光反射線 ê 關係 有一寡研究。若是 uì 比一般極光較懸海拔 ê 所在來看，較深 ê 紅色發射線應該是 地球內部 磁層 電流 ê 強熁燒引起--ê。Tī 法國北部 ê 夜空，除了穩定極光紅弧以外，地平線 頂懸 ê 雲帶 kah 天頂 ê 銀河弧，是定定出現 ê 人客。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231111/
影像：Julien Looten
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231111.html

大質量星系團 Abell 2744 內底 主要 ê 成份是烏暗物質，有一寡人共叫做 Pandora 星系團。伊就 tī 玉夫座方向 35 億光年遠 ê 所在。大質量星系團 產生 ê 重力透鏡效應會 kā 時空拗彎、kā 後壁較遠 ê 天體放大。天文學家利用這个特性，揣著 紅移 Z=10.1 ê 背景星系 UHZ1。按呢 UHZ1 ê 光，照算應該是 ùi Abell 2744 後壁 132 億光年遠 ê 宇宙來--ê，彼陣差不多是咱現在宇宙年歲 ê 3 葩爾。這張組合影像是 kā 茄仔色 ê Chandra X 光太空天文台 ê 影像資料 kah 紅外線 ê James Webb 太空望遠鏡 ê 影像資料鬥出來 ê 結果，插圖就是 UHZ1 星系。Tī Chandra 觀測資料 量著 UHZ1 ê X-ray 發射線有提供一个足明顯 ê 線索，就是 tī 這粒超懸紅移星系中心 ê 超大質量烏洞是愈來愈大。這予咱量著目前咱所知影上遠 ê X 光波段 ê 烏洞，就是 UHZ1 中心彼粒愈來愈大粒 ê 烏洞。這个結果暗示講宇宙中頭一粒 超大質量烏洞是按怎形成、當時形成--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231110/
影像來源：X-ray: NASA/CXC/SAO/Ákos Bogdán; Infrared: NASA/ESA/CSA/STScI
影像處理：NASA/CXC/SAO/L. Frattare & K. Arcand
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231110.html

毛蟹星雲 是 彼个有名 ê Charles Messier 星表 ê 頭一粒天體。伊 ê 編號是 M1，毋是彗星。天文學家 tī 1054 年 ê 時陣 to̍h 有發現伊 矣。實際上，咱這馬已經知影 毛蟹星雲 其實是一个 超新星殘骸，是大質量恆星死亡爆炸了後 ê 雲屑仔。這張清楚 ê 影像是 ùi James Webb 太空望遠鏡 ê 近紅外線相機 NIRCam kah 中紅外線儀器 MIRI 做伙提著 ê 觀測資料，是 tī 紅外線波段探索 猶咧脹大 ê 星際雲屑仔 發--出 ê 奇怪光線。對現代天文學家來講，其中上特別 ê 天體是 毛蟹星雲脈動星，to̍h 是相片中央上光彼粒，這是一粒一秒鐘踅 30 擺 ê 中子星。這粒恆星核心崩塌 ê 殘骸 to̍h kah 宇宙發電機 仝款，伊是毛蟹星雲 ê 動力來源，予伊 tī 電磁波頻譜產生發射線。毛蟹星雲差不多有 12 光年闊，伊 tī 金牛座 內底，離咱干焦 6500 光年遠爾爾。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231109/
影像：NASA, ESA, CSA, STScI; Tea Temim (Princeton University)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231109.html

這毋是 太陽烏子啦！這是 國際太空站 (ISS) tī 太陽面頭前行過 ê 時陣去予翕著 ê。若是 太陽烏子，to̍h 會有一个較暗 ê 中央 本影 kah 一个較光 ê 半影，而且 袂有天龍號太空船停 tī 遐。毋閣，ISS 是一个足複雜多變 ê 機械。伊是 人類 歷史上上大 上複雜 ê 太空船之一。而且，太陽烏子踅 太陽，ISS 踅 地球。Tùi ISS 來講，ùi 太陽面頭前行過是一件真四常 ê 代誌。伊每 90 分鐘踅地球一輾。毋閣愛 ùi 一幅 大張圖 內底提著伊 ê 位置、時間、kah 設備 ê 資訊，較無簡單。這張影像 是 kā 三張影像敆做伙，三張攏 tī 仝一位、差不多仝一个時間翕--ê。第一張影像感光傷超過矣，煞翕著太陽面頂一寡足暗 ê 日珥。第二張影像感光無夠，煞翕著 太陽色球層 ê 複雜花逝。第三張影像是上困難翕著 ê，是翕著太空站 tī 無夠一秒鐘 ê 時間內底 行過 太陽面頭前。咱若是 斟酌來看 太空站 ê 外形，to̍h 會看著停 tī 遐 ê 天龍號太空船。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231119/
影像：Mehmet Ergün
音樂：P!SCO - 鼎鼎
聲優：彪彪
翻譯：An-Li Tsai (NSYSU)
原文：https://apod.nasa.gov/apod/ap231119.html

毛蟹星雲 是 彼个有名 ê Charles Messier 星表 ê 頭一粒天體。伊 ê 編號是 M1，毋是彗星。實際上，咱這馬知影 毛蟹星雲 是一个 超新星殘骸，是懸質量恆星死亡爆炸了後產生 ê 脹大星雲 ê 雲屑仔。天文學家 tī 1054 年 ê 時陣有看著這个激烈出世 ê 毛蟹星雲。這个星雲 ê 直徑差不多有 10 光年，伊 ê 脹大 速度 是一秒鐘 1500 公里。你若是比較 Hubble 太空望遠鏡 kah James Webb 太空望遠鏡 ê 清楚影像，就會發現 伊咧脹大。2005 年 Hubble 太空望遠鏡 ê 可見光波段 kah 2023 年 Webb 太空望遠鏡 ê 紅外光波段，有翕著毛蟹星雲 ê 雲屑仔 kah 雲絲 ê 活動。這隻宇宙甲殼類動物，就 tī 金牛座 方向差不多 6500 光年遠 ê 所在。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231115/
影像：NASA, ESA, CSA, STScI; Jeff Hester (ASU), Allison Loll (ASU), Tea Temim (Princeton University)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231115.html

這是膨月。大部份 地球人 較熟似 ê 月娘，是 伊 規爿去予 太陽 照著 ê 月圓相，kah 伊 邊緣去予太陽照著 ê 月眉相。是講月球若是有超過一半去予太陽照著，毋過猶袂到規爿面 ê 月相，就叫做 膨月。雖罔講電視 kah 電影足少看著 膨月，毋過其實伊 tī 夜空是定定出現--ê。這張相片 是 2018 年 10 月左右 tī 瑞典 Jämtland 翕--ê。幾若工後，膨月 就會轉做月眉、新月、月眉，落尾閣轉來膨月。攝影師準備好勢，欲翕這粒媠噹噹 ê 膨月 ê 時陣，煞 意外 翕著飛龍機，就 ùi 月娘面頭前飛過去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231112/
影像：Göran Strand
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231112.html

這馬天頂有一台新--ê 太空望遠鏡，叫做 Euclid。Euclid 有鬥 2 台大台全景相機，會當翕相 ê 範圍 ùi 可見光 到 近紅外線。Euclid 主鏡 ê 直徑有 1.2 公尺闊，利用伊 較利 ê 光學系統，開 5 點鐘 ê 觀測時間，通看著 2.5 億 光年 遠 ê 英仙座星系團 內底 ê 千外粒星系。嘛有翕著背景超過 10 萬粒 ê 星系，有一寡是 100 億光年 遠。Euclid 太空望遠鏡 革命性 ê 改變，是伊有 2 倍月娘大 ê 闊幅視野，kah 620 百萬像數 懸解析度 ê kha-mé-lah，而且伊 tī 紅外線是會當同齊翕著影像 kah 光譜。Euclid 開始做 ê 巡天觀測，看 ê 範圍包括 3 分 1 ê 天區，紀錄了 20 億粒星系。這會當予咱 研究 烏暗物質 kah 烏暗能量，通予咱了解 咱 ê 宇宙。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231108/
影像來源 kah 許可：ESA, Euclid, Euclid Consortium, NASA
資料處理：Jean-Charles Cuillandre (CEA Paris-Saclay) & Giovanni Anselmi
文稿：Jean-Charles Cuillandre
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231108.html

這工是萬聖節，天頂看起來敢若有一款生物 tī 遐。是啥物生物呢？天文攝影師嘛毋知，毋過你會使臆看覓咧。是講，到底是啥物原因 tī 2013 年造成這款 奇怪現象？這咱知影。是彼年上精彩 ê 極光表演。這个 壯觀 ê 極光 有足濟 細節 通看。這張 相片有活潑 ê 青色 kah 茄仔色 極光。這是高層大氣內底 ê 酸素 kah 窒素 tùi 太空中入來 ê 一大陣 電子 ê 反應。前景看起來仝款足奇怪 ê 生物，是 挪威 Tromsø ê 白樺 樹。這款 翕起來足媠 ê 極光，kah 地磁風暴 是定定做伙出現。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231105/
影像：Ole C. Salomonsen (Arctic Light Photo)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231105.html

仙后座 γ 是北半球秋天暗暝足光 ê 一粒星。伊是這張望遠鏡影像內底上光 ê 恆星，就 tī 仙后座方向。倒爿頂懸 ê IC 59 kah IC 63 是氣體 kah 塗粉組成 ê 幽靈星際雲，kah 仙后座 γ 做伙出現 tī 這个空間。彼寡雲 其實毋是幽靈，就 chhāi tī 差不多 tī 600 光年遠 ê 所在。受著 足燒足光 ê 仙后座 γ 高能輻射 ê 影響，in 去予侵蝕去，沓沓仔 leh 消失。仙后座 γ 實際上是 kah 這个星雲 差 3、4 光年遠。IC 63 kah 仙后座 γ 小可仔相倚，主色 ê 紅色 H-alpha 發射光，是水素原子去予恆星 ê 紫外光輻射了後離子化，重新 kah 電子複合 發--出 ê 光。IC 59 是較遠 ê 恆星，有較少 ê H-alpha 發射線，毋過有較濟 反射恆星塗粉 發出 ê 特別藍光。這个宇宙舞台 ê 大細超過 1 度，照估算 ê 仙后座 γ kah 伊附近天體 ê 距離來看，這差不多是 10 光年大。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231028/
影像：Guillaume Gruntz, Jean-François Bax
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231028.html

頂禮拜三，旅行中 ê Lucy 太空船 頭一擺 拄著 一粒小行星，編號 152830 ê Dinkinesh，而且發現這粒 內沿主小行星帶 ê 小行星有一粒衛星。Lucy 長距離偵察影像儀 tī 400 外公里遠 ê 所在，翕著這个雙小行星系統 ê 特寫，伊 ê 速度是 一秒鐘 4.5 公里。Dinkinesh 小行星是一个奇妙 ê 世界，伊是一粒細細粒 ê 小行星，上闊嘛無夠 800 公尺闊。Ùi 太空船 ê 角度來看，伊 ê 衛星是 ùi 主小行星 ê 後壁出現。小行星 ê 衛星，照估算應該差不多才 220 公尺闊爾爾。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231104/
影像：NASA/Goddard, SwRI, Johns Hopkins APL, NOIRLab
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231104.html

閣翕著一張新 ê 相片矣！木衛一 Io ê 火山是一直咧噴。為著欲了解這个現象，NASA ê Juno 機器人太空船開始連紲拜訪這粒 奇怪 ê 衛星。Io kah 咱 ê 月球是差不多大細，毋過因為木星 kah 其他木衛 ê 重力搝搦，伊 ê 內部去予熁燒，表面變甲全火山。這張相片是 頂禮拜 Juno 太空船 ùi Io 頂懸 1 萬 2000 公里懸 ê 所在飛過翕--ê，下底是危險 ê 活跳世界。Io ê 表面 去予硫磺 kah 堅凍 ê 二酸化硫 kā 變做黃色、柑仔色、kah 咖啡色。Juno 飛過火山 ê 時陣伊 當咧 噴煙，就是相片頂懸暗暗 ê 雲煙。研究 Io ê 火山 kah 雲煙，會當幫贊咱人類閣較了解 木星這个複雜 ê 系統，包括伊 ê 衛星、木星環、極光，是按怎產生交互作用。Juno 太空船按算欲 tī 紲落來幾若個月，用 10 倍近 ê 距離飛過 Io 2 擺。一擺 tī 12 月，另外一擺 tī 2024 年 2 月。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231023/
影像來源：NASA, JPL-Caltech, SwRI, MSSS
資料處理 & 版權：Ted Stryk & Fernando García Navarro
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231023.html

是按怎這个極光看起來遮爾成你？2013 年 tī 北半球 加拿大 某一个透早，你若是有夠勇敢，tī 足寒 ê 暗暝行到外口看夜空，就有機會看著一个足特別 ê 極光。這个 極光 足成一項 物件，毋過是按怎會按呢？天文攝影師 翕著 ê 這 2 个幽靈光影有成尪姨抑是早起的女神。毋過你 嘛會當 kā in 想做 萬聖節 內底 ê 角色。毋管你是 按怎想，按怎解說，這張遮爾媠 ê 極光 總是青色--ê。科學上嘛確定講，這是太空中 ê 高能粒子 kah 地球頂層大氣 ê 酸素 產生交互作用所引起 ê 現象。Tī 影像下底，前景 ê 部份是堅凍 ê Alexandra 水沖，中央有規片 ê 常綠樹。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231022/
影像：Yuichi Takasaka, TWAN
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231022.html

這會引起你 ê 注意，毋是因為伊有一个足大 ê 環。這个踅 tī 行星 PDS 70 四箍圍仔 ê 大輾行星形成環 ê 影像，是遮爾清楚閣遮爾趣味。嘛毋是 leh 講 大塊盤仔 內底倚正爿彼粒，彼逐家早就討論足久矣。這粒編號 PDS 70c ê 系外行星是拄形成--ê，而且較趣味 ê 是，伊 ê 寸尺 kah 質量攏 kah 木星 差不多。引起話題 ê，其實是踅 tī 系外行星 planet PDS 70c 邊仔霧霧 ê 光斑。彼个霧霧 ê 光斑，應該是一个當 leh 形成衛星 ê 塗粉盤。這是以前毋捌看過--ê。這張影像是 2021 年 用 ALMA 大型次毫米波陣列望遠鏡 翕--ê。ALMA 是一組 tī 智利 北部 ê Atacama 沙漠 ê 66 台 電波望遠鏡。根據 ALMA 資料，天文學家推測講，這个當 leh 形成衛星 ê 系外行星盤 ê 半徑 應該 kah 咱地球軌道差不多大。而且未來可能會形成 3 粒左右 月球 大細 ê 衛星，就 kah 木星 有 四大衛星 差不多。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231017/
影像：ALMA (ESO/NAOJ/NRAO); M. Benisty et al.
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231017.html

人類歷史上知影 ê 第二粒彗星是 Encke 彗星，編號 2P/Encke。Encke 彗星飛到 內太陽系 ê 時陣，伊就 ùi 木星軌道以內 ê 遠日點，行到金星軌道以內 ê 近日點。伊每 3.3 年會轉來近日點一擺，是 太陽系內底週期上短 ê 主要彗星。Encke 彗星 上無 kah 地球 ê 2 个逐年攏會拄著 ê 流星雨有關係，北金牛座流星雨 kah 南金牛座流星雨。2 个流星雨 ê 活跳期出現 tī 10 月底 kah 11 月初。In 2 个 ê 輻射點分別 tī 頭足大粒 ê 金牛座 內底 較光 ê 星，畢宿五附近。這張 tī 8 月 24 翕--ê 望遠鏡景色 有翕著暗暗 ê Encke 彗星。伊美麗 ê 青色彗鬚 tī 天頂行到 發射星雲 IC 410 內底 ê 少年星團 kah 幾若光年長 ê 肚胿仔形 恆星形成雲 附近。5 工前 ê 10 月 22，伊拄經過近日點，這馬行到室女座內底一粒足光 ê 角宿一附近矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231027/
影像：Dan Bartlett
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231027.html

這張縮時攝影相片是 10 月 14 翕--ê，是 tī 地球 Bryce 山谷 日落點翕 ê 日出。這工是初一 ê 月娘 tī 透早 ê 山谷逐著天頂 ê 日頭。月娘 烏影出現 tī 這个懸海拔景色 ê 時陣，當地溫度嘛降落來。透早時 ê 這粒光爍爍 ê 日頭，嘛變做較柔和 ê 黃色色調，光線就照 tī 紅色 ê 岩石山頂懸。這張縮時攝影相片是 每 2 分鐘翕一擺。Kha-mé-lah kah 太陽濾鏡是 固定 tī 三跤馬 頂懸 leh 翕 日環食 ê 無仝階段。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231019/
影像：Martin Ratcliffe
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231019.html

這个星雲實在是傷大，煞定定會無看著。這 規个面紗星雲 是 月娘 直徑 ê 6 倍大，毋過伊足暗--ê，你愛用 雙筒望遠鏡 才看會著。這个星雲是 1 萬 5000 年前 tī 天鵝 座 內底 ê 一粒恆星爆炸了後產生--ê。這个 壯觀 ê 爆炸，捌比 金星 較光，光差不多一禮拜，毋過 無人紀錄落來。相片是猶咧脹大 ê 氣體雲 ê 西爿面。較顯目 ê 氣體絲包括 tī 倒爿頂懸 ê 尪姨掃帚星雲，就 tī 彼粒足光 ê 前景星 天鵝座 52 附近。閣有 ùi 影像正爿中央趨到下底 ê Fleming 三角精靈，以前嘛叫做 Pickering 三角形。這張長時間感光、有包幾若色--ê，實在是足少去 hŏng 翕著。伊是 影像倒爿墜直方向 ê 咖啡色反射 塗粉，這可能是 ùi 大質量 恆星 ê 低溫大氣生出來--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231018/
影像：Jiang Wu
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231018.html

伊攏知影，除了彼个問題。伊真清楚駛車到 in ê 目的 Oregon 州 ê Abert 湖，會看著完整 ê 日 環食。伊知影後一擺欲 tī 美國 看著 火環日食，愛閣等 16 冬以上，所以欲翕這張相片是一个足罕得有 ê 機會。伊 tùi 這个翕相 ê 計畫真了解：伊 kah in 男朋友會是這張日食相片 ê 剪影，有當時仔做伙翕，有當時仔分開翕。伊知影 日環食 干焦出現幾若分鐘爾爾，伊嘛 開幾若點鐘 ê 時間 leh 鬥相共。伊嘛看著 in 朋友 tī 400 公尺遠 ê 山跤 leh chhāi kha-mé-lah。伊毋知 ê 是，伊會去予問彼个問題。毋過伊知影伊 ê 答案是：「我願意」。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231016/
影像：Jerry Zhang (倒爿), Baolong Chen (攝影師) & Amber Zhang (正爿)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231016.html

是哩！毋知恁兜 ê 樹仔敢會變做這形？你若是注意看這張相片 ê 塗跤，就會發現有足濟日食影像，這是 昨昏日食 透過樹仔做出來 ê 影像。樹葉仔縫就親像是 針孔 透鏡，每一空攏會做出 偏食 ê 日頭影像，投影 tī 另外一个方向。這張相片是 tī 美國 德州 Burleson 翕--ê。昨昏 tī 美洲 ê 人攏有 看著 日偏食，這个現象就是月娘 ùi 日頭面頭前行過。Tī 地球 狹狹 ê 日食帶 下底 ê 人，攏會當看著 日環食，嘛會使 kā 叫做 火環日食。這个時陣，月娘完全 去予日頭包 tī 內底，日光 ùi 月球外緣 射出來。咱閣轉來 上開始 彼个問題，恁兜 ê 樹仔毋但會當 變做這形，而且逐擺拄著日食 ê 時陣，攏會變做這形。明年 4 月 8 號，北美洲 會當看著 日全食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231015/
影像：Shawn Wyre
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231015.html

這是死亡之舞。2 个大型星系 leh 相戰，in 之間有一條由恆星、氣體、塗粉組成、搝甲長長長 ê 宇宙橋，有 7 萬 5000 光年 長。宇宙橋本身就是一个強烈 ê 證據，表示講這 2 个大型星系進前捌 行相倚。In ê 引力互相影響，產生 激烈 ê 引潮力。另外一个證據是，正爿 ê 正向捲螺仔星系，嘛叫做 NGC 3808A，有足濟 ùi 爆發性恆星形成活動中生出來 ê 少年藍色星團。倒爿彼个扭曲 ê 側向星系 NGC 3808B，去予 星系橋 ê 物質包起來，成做一个奇妙 ê 極環。這 2 个星系成做一个系統，就叫做 Arp 87。這款交互作用延續幾若十億年，一直 互相迵過來迵過去，落尾會合併做一个星系。雖罔講 這款景色 實在是足特別--ê，毋過星系合併是足四常 ê 現象，Arp 87 就代表 這个過程 ê 其中一个階段。Arp 87 這雙 leh 跳舞 ê 星系，差不多 tī 獅仔座 方向 3 億 光年 遠 ê 所在。上倒爿彼个 顯目 ê 側向捲螺仔星系 是一个較遠 ê 背景星系，伊無參與這場星系合併活動。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231024/
影像來源：NASA, ESA, Hubble
資料處理：Harshwardhan Pathak
音樂：高小糕 GaoXiaoGao
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231024.html

造父四，嘛叫做 仙王座 μ，是一粒足大粒 ê 恆星。伊是一粒 M 型超巨星，是太陽 ê 1500 倍大，是目睭會當直接看著 ê 上大粒恆星之一，嘛是規个銀河系內底上大粒 ê 恆星之一。咱若是 kā 太陽系 ê 太陽換做造父四，火星 kah 木星就去予食去矣。造父四 實在是足紅--ê，歷史上嘛 kā 叫做 Herschel 的紅寶石。這張望遠鏡視野內底 ê 超巨星，離咱差不多才 2800 光年遠，就 tī 發紅光 ê 發射星雲 IC 1396 邊仔，北天 ê 皇家星座，仙王座 ê 方向。因為這粒超巨星比太陽較冷，所以伊嘛比太陽較紅。而且受著銀河內底塗粉 ê 吸收 kah 散射影響，這粒超巨星就閣較紅矣。造父四是 一粒 hŏng 研究透透 ê 變星，目前是 tī 恆星演化一个較晏 ê 階段。而且因為伊嘛是一粒大質量恆星，未來 總是會因為核心崩塌變做 超新星，上尾會爆炸死亡，結束伊 ê 一生。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231012/
影像：David Cruz
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231012.html

這个捲螺仔星系下面彼支捲螺仔手骨是發生啥物代誌？是出現一粒 超新星 啦！頂個月，阿拉伯聯合大公國 ê Al-Khatim 天文台 發現一粒 超新星 SN 2023rve。紲落來閣 發現 伊 ê 特性 kah 大質量恆星死亡爆炸 ê 情形仝款，表示講伊嘛有可能留一粒 烏洞 tī 遐。捲螺仔星系 NGC 1097 是一个 tī 咱附近 ê 星系，才 4500 萬 光年 遠爾爾，用細台望遠鏡就會使 tī 南天 ê 天爐座 方向看著伊。這个星系會有名，毋但是因為伊有 足媠 ê 捲螺仔手骨，嘛是因為伊有 暗淡 ê 噴射流。這个噴射流 和 伊 tī 古早時代 kah 其他星系相挵 留落來 ê 恆星流 有對同。Kah 伊相挵 ê 星系，可能就是倒爿下跤 彼个 tī 捲螺仔手骨之間 ê 細粒星系。這張影像 是靠 兩張差幾若個月 ê 相片 相疊比較，才標出這粒新發現 ê 超新星。Tī 厝邊星系 揣超新星 是一項足重要 ê 工課，因為這會當決定咱 規个宇宙 ê 尺度 kah 脹大速度。這是一个目前猶 足緊張、猶有 足濟爭論 ê 研究主題。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231011/
影像資料：Telescope Live (Chile)
影像處理 kah 版權：Bernard Miller
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231011.html

哈雷彗星 ê 彗星編號是 1P/Halley，是歷史上頭一粒人類知影 ê 彗星，伊每 76 年會轉來內太陽系一擺。這粒有名 ê 彗星頂擺轉來予咱看 ê 時陣是 1986 年。毋過哈雷彗星留 tī 太空中 ê 塗粉粒，逐年會有兩擺 tī 地球天頂落塗粉雨，成做 5 月 ê 寶瓶座流星雨 kah 10 月 ê 獵戶座流星雨。實際上，這張 10 月 23 透早翕--ê 慢速攝影相片，有翕著兩粒足光 ê 流星，這是 ùi 哈雷彗星 ê 塗粉粒蒸發出來--ê。這張相片 ê 背景有滿滿 ê 天星，是 tī 金牛座分子雲 ê 方向。這寡塗粉粒用一秒鐘 66 公里緊 ê 速度去挵地球大氣。青色 ê 流星光巡就指向 流星雨 ê 輻射點，獵戶座 參宿四 ê 北方。參宿四足光--ê，毋過無出現 tī 相片內底，伊 tī 相片倒爿下底閣較出去 ê 所在。咱熟似 ê 昴宿星團，就 tī 這个厚塗粉天景 ê 正爿。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231026/
影像：David Cortner
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231026.html

獵戶座大星雲內底有藏足濟恆星。咱若是用可見光直接看，獵戶座 內底有足濟細塊細塊、霧霧 ê 光斑。毋過 這張 用 Webb 太空望遠鏡 翕--ê 彩色影像，有紅光 kah 近紅外線 ê 觀測資料。相片有翕著 獵戶座星雲 足 清楚 ê 細節。伊是一个無閒𩑾插 ê 星雲，內底有少年恆星、高溫氣體、kah 烏暗塗粉。替換 ê 彩色影像 是仝一區，是 近紅外線 ê 觀測資料。驅動 獵戶座星雲 (M42) ê 是 四邊形星團，是 M42 中心一陣足光 ê 恆星。恆星邊仔這寡霧霧 leh 發光 ê 雲絲，主要是去予熁燒 ê 星際 塗粉。斟酌檢查這寡影像了後，煞 意外發現一大陣 木星質量雙星 (JuMBOs)，就是兩粒一組 ê 木星質量天體。In 可能會提供咱一寡線索，幫贊咱了解 恆星 是按怎形成--ê。規个 獵戶座星雲 複合體包括 馬頭星雲，會 tī 未來幾若百萬年內散去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231010/
影像來源 kah 許可：NASA, ESA, CSA, JWST
影像處理：M. McCaughrean & S. Pearson
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231010.html

是哩！毋知你敢捌看過這款日出？2019 年 日偏食這工 ê 日出，日頭 tī 遮先拄著厚雲，了後干焦是分做兩塊 peh--起來。Kha-mé-lah sàng 講，這个景色是伊這世人拄過 上使人讚嘆 ê 日出。這个 去予大氣紅化 ê 太陽，伊頂懸附近 ê 烏色圓盤 是 月球，毋閣下跤彼个尖尖 ê 烏影嘛是。這是因為 地球大氣 內底有一層空氣 ê 溫度實在是傷懸矣，to̍h 親像是一粒 大型 ê 鏡頭，才會產生 第二个影像。Tùi 一般 ê 日出 抑是 日落來講，這款較罕得看著 ê 大氣光學 現象 to̍h 叫做 Etruscan 花矸效應。這張相片 是 2019 年 12 月 tī 卡達 ê Al Wakrah 翕 ê。Tī 地球 東爿狹細範圍內底 ê 一寡觀星者，會當看著 完整 ê 金環日食。Tī 遐，月球完全去予背景 ê 太陽箍 tī 內底，to̍h 親像是一輾 火箍仔。Tùi 有萬全準備 ê 觀星者來講，後一擺 ê 日食，嘛是日環食，會 tī 這禮拜六 出現。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231009/
影像：Elias Chasiotis
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231009.html

這个星雲看起來敢有成尪姨 ê 頭？逐家 kā 這个星雲叫做尪姨頭星雲，就是因為伊 ê 形體就敢若是 萬聖節風格 bàng-kà 內底 ê 尪姨 ê 頭。是講這个形體到底是按怎來--ê？這就是一个愛靠想像力來臆 ê 主題矣。咱知影 ê 部份是 IC 2118 大細差不多 50 光年 大，是氣體 kah 塗粉組成--ê。所以咱會使臆講，這个形體因為有一部份去予附近 ê 參宿七 侵蝕去矣。參宿七 是 獵戶座 內底較光 ê 一粒恆星，就 tī 這張影像 下底閣出去 ê 所在。尪姨頭星雲 ê 藍光毋但是因為 參宿七 有足強 ê 藍光，嘛是因為 塗粉粒 散射 藍光 ê 效率比紅光較好。仝款這个 物理機制，造成地球日時 ê 天空是藍色--ê。毋過 tī 地球大氣 內底 ê 散射源，是 窒素 分子 kah 酸素 分子。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231004/
影像：Abdullah Alharbi
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231004.html

你敢有看著沙漏 ê 形體？抑是其實是伊 leh kā 你看？你若是想像力袂䆀，應該看會著 MyCn 18 ê 幾若个環，規个外形就 kah 沙漏足成--ê，而且中央有一粒足特別 ê 目睭。毋管是你 leh kā 看猶是伊 leh kā 你看，沙漏形 ê 行星形星雲 中央彼粒恆星，時間已經無濟矣！等 核心 ê 燃料 燒了了後，這个 類太陽 恆星 ê 外層氣體殼就去 hŏng 擲出去。這个 性命 欲結束 ê 階段是遮爾短、閣遮爾媠。了後核心就變做一粒足冷、足暗 ê 白矮星。1995 年 ê 時陣，天文學家用 Hubble 太空望遠鏡 (HST) 翕一系列 ê 行星形星雲 ê 影像，嘛包括這个星雲。相片內底這寡較幼--ê、leh 發光 ê 氣體環，疊出來 ê 形體就敢若是 沙漏 ê 壁。發紅光 ê 是 窒素，發青光 ê 是 水素，發藍光 ê 是 酸素。Hubble 翕著 行星形星雲 kā 氣體殼擲出去 ê 過程，這是有史以來上清楚 ê 影像，予咱看著 進前毋捌看過 ê 細節。這會當 kā 咱鬥解決足困難 ê 謎團，予咱了解像 MyCn 18 這款對稱 ê 行星形星雲 ê 複雜形體。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231003/
影像來源 kah 版權：NASA, ESA, Hubble, HLA
資料處理 & 版權： Harshwardhan Pathak
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231003.html

60 秒以內，這粒欲落去 ê 日頭就會變做青色--ê。實際上，日頭 頭頂毋但會出現青光，閣會出現波湧，而且是出現 tī 規粒日頭 ê 邊緣。日頭本身是無改變，這兩款 效應 攏是因為看 tùi 地球大氣 ê 高溫 kah 低溫層造成--ê。這款特別 ê 色光就是 青爍，這是因為大氣層毋但會改變背景影像，嘛會 kā 色光色散到無仝方向，就親像 稜鏡 分光仝款。這支影片是這個月初 tī 美國 Hawaii 海岸翕--ê。影片有 60 秒，你 看到上尾 欲煞進前，日頭 頂懸有一部份家己停 tī 太空中，毋但變做 青色，嘛變做 藍色。了後日頭就隨勼去無去矣，愛等到明仔載才會出現。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231025/
影像：Tengyu Cai
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap231025.html

日頭頭前彼个是啥物？Kah 咱上倚 ê 是 飛龍機，出現 tī 日頭中央，是拄仔好去予咱翕著--ê。較遠 ê 是 地球大氣 內底 ê 雲，看起來是變做烏色 ê 水平線。閣較遠 ê 是 咱 ê 月娘，就是正爿頂懸 烏烏圓圓彼个，kā 日頭 咬去一大塊。比飛龍機較遠，tī 太陽表面下底--ê，是太陽烏子。相片內底主要 ê 太陽烏子群，編號是 AR 2192，是 2014 年揣著上大陣 ê 烏子群。這陣烏子一禮拜前 ùi 太陽邊緣踅過來了後，就一直 leh pi̍t-pi̍t pho̍k-pho̍k、噴出太陽爍光。是講真拍算，這个太陽剪影一目𥍉就無去矣。飛龍機閣過幾若秒鐘就飛去矣。雲閣過幾若分鐘嘛散去矣。月娘 ùi 日頭面頭前行過 造成 ê 日偏食，閣過幾若點鐘嘛結束矣。較好運 ê 是，這寡 意外 相疊 ê 現象 tùi 太陽來講，是 定定有--ê。這禮拜六出現 tī 北美洲 kah 南美洲 ê 日偏食，有可能會閣看著其中一款現象。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231008/
影像：Doyle and Shannon Slifer
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231008.html

夜空是發生啥物代誌？為著欲 揣出 這个答案，全球 ê 天文望遠鏡攏 看 tùi 深空去。探索 ê 目標包括欲了解 早期宇宙，搜揣追蹤會威脅地球 ê 小行星、揣 有外星性命 ê 系外行星、kah 監看恆星 來幫贊咱閣較了解咱 ê 太陽。這張組合影像 ê 前景 kah 背景是 4 月 ê 時陣 tī 西班牙 Canary 群島 ê La Palma 島 翕--ê。相片內底有幾若个 Roque de los Muchachos 天文台 ê 天文望遠鏡，背景是烏暗 ê 夜空。前景 ê 望遠鏡，ùi 倒爿到正爿是 Magic 1, Galileo, Magic 2, Gran Canarian, kah LST。背景 ê 天色 較 hŏng 注意--ê，是 銀河系 ê 中央帶、人馬座、蛇夫座 kah 天蝎座、發紅光 ê 鴟鴞星雲 kah 內海仔星雲、閣有 天淵三 kah 心宿二。因為有 這寡天文台，人類 才有法度 tī 過去 100 冬內，tùi 咱 夜空 ê 了解，比 人類過去 tùi 宇宙 ê 了解閣較濟。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230718/
影像：Marcin Rosadziński
音樂：P!SCO - 鼎鼎
聲優：阿綠
翻譯：An-Li Tsai (NSYSU)
原文：https://apod.nasa.gov/apod/ap230718.html

10 月 14 這工是 初一，月球 ê 烏影，就變做地球頂懸 迒過 北美洲、中美洲、kah 南美洲 ê 一條狹狹 ê 路線。咱注意看月球烏影 tī 天頂行過 ê 路線，就會發現月盤 ê 視寸尺無法就 kā 日頭完全閘去。顛倒是月球 ê 外形會 tī 食甚 ê 幾若分鐘內出現，外沿包一輾火環。這就是日環食，有人較愛 kā 伊叫做 火環日食。這張 2012 年 5 月翕 ê 縮時攝影系列相片，就展現火環日食 ê 每一个階段。Ùi 日食開始進前 一直到 日落 ê 階段，攏會當 tī 地球 ê 紀念碑谷 上出名 ê 山頭 天頂看著。愛會記--lih，10 月 14 ê 火環日食嘛會當 tī 紀念碑谷 看著，會 tī 日出了後出現 tī 東爿 ê 天空。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231005/
影像：Tunc Tezel (TWAN)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231005.html

有當時仔爍爁會出現 tī 欲倚太空 ê 所在。紅色精靈爍爁 就是這款 爍爁。伊是 25 冬前才 tī 地球 去 hŏng 翕著，開始研究--ê。其實毋管是佗一款 爍爁 ê 起源，攏是科學家有興趣 ê 研究主題。像 紅色精靈爍爁 到底是按怎來--ê？科學家嘛一直想欲知影。研究結果表示講，等產生較強 ê 正電 雲對地爍爁 了後，就會生出 紅色精靈。伊拄開始 ê 時陣是 100 公尺大 ê 離子氣體球，tī 80 公里懸 ê 所在，用 10 葩 ê 光速 射落來。隨綴 leh 出現 規陣衝懸 ê 離子球。這張 解析度特別懸 ê 相片是 一大陣紅色精靈。這張影像是影片 ê 孤張影格，長度才 1/25 秒爾爾。影片是 3 禮拜前 tī 法國 Dordogne 省 ê Castelnaud 城堡 頂懸翕--ê。紅色精靈是一目𥍉就無去矣！後一格影格就看袂著矣！

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231002/
影像：Nicolas Escurat
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231002.html

看火環日食上好 ê 所在可能是 tī 沙漠。因為沙漠內底會閘著咱 ê 雲 kah 樹仔攏較少。所以有一陣攝影師，為著欲翕出現 tī 天頂 這个特別日食 ê 清楚影像，in 就 tī 2019 年 12 月底 ê 時陣，去到 阿拉伯聯合大公國 ê Rub al-Khali 沙漠，這是世界上大片 ê 沙漠。這个 火環日食 就是日環食，是 月球 行到伊踅 地球 ê 長株圓軌道離地球較遠 ê 所在，予伊 ê 視寸尺看起來傷細粒，按呢伊就無法度 kā 規粒日頭 閘去。日環食 ê 食甚階段，日頭上外沿就會 ùi 月娘上外沿走出來，月娘看起來就親像是 giōng 欲 kā 日頭規粒閘去 ê 大烏斑。攝影師知影講，這个特別 ê 日食，會 tī 日出了後無偌久 就來到食甚 ê 階段。等 in 揣著 焦燥拋荒 ê 所在，就開始翕相。結果 上趣味 ê 日食影像，是 前景有一欉樹仔。因為比起 沙崙，樹仔閣較會當予這个超現實 ê 背景提供現實、比例尺、kah 材質 ê 對照。Tiàm 北美洲 kah 南美洲 狹狹 ê 日食帶內底 ê 人，tī 10 月 14 拜六這工，天氣若是袂䆀，就會 tī 天頂看著新 ê 火環 日食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231001/
影像：Maxime Daviron
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231001.html

對蹛 tī 北半球 ê 人來講，九月 ê 月圓叫做 收冬月。這張望遠鏡景色是 9 月 28 ê 時陣 tī 意大利 Tuscany 翕--ê。月色是反射日落 ê 溫暖色調，伊就 tùi 山崙頂懸 ê 松柏仔後壁 peh 起來。收冬月是祭典、故事、kah 歌唱 ê 月份，是 冬節 左右 ê 月圓 ê 傳統名。照按呢講，這个名實在是有夠合。農作物成長 ê 季節 欲煞 ê 時陣，日時 ê 時間就變甲愈來愈短。這个時期 ê 月圓，伊 ê 光 會當予農民 ùi 日落到日出這段時間，繼續收冬。Tùi 一寡人來講，收冬月嘛叫做超級月娘，是 行到近地點附近 ê 月圓。這是 2023 年 第 4 个，嘛是上尾一个超級月娘。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230930/
影像：Antonio Tartarini
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230930.html

這張相片是 9 月 24 頂禮拜 ê 拜日 tī 美國 鹽湖城 附近 ê 國防部 猶他州 測驗訓練場翕--ê。這个 50 公斤重、79 公分闊 ê 標本回航艙 ùi 小行星 編號 101955 ê Bennu 小行星 轉來矣，就停 tī 地球表面 ê 沙漠內底。這个回航艙是去予 OSIRIS-Rex 太空船擲落來--ê。伊看起來臭火焦矣，應該是伊迵過地球實密大氣層 ê 時陣，去拄著傷過懸 ê 溫度矣。OSIRIS-Rex 是 ùi 2021 年 5 月 ê 時陣開始飛轉來--ê。這个太空艙 ê 罐仔 按算欲 tī 9 月 25 ê 時陣 送到 美國 Houston ê NASA Johnson 太空中心。內底有貯 250 公克 Bennu 小行星 風化層 無去予汙染著 ê 標本。科學家 kah 工程師 攏 tī 為著 OSIRIS-REx 任務設計 ê 新 ê 實驗室內底 進行罐仔 ê 解體工程，嘛計畫欲 tī 10 月 11 公佈 近地小行星 ê 標本。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230929/
影像：NASA/Keegan Barber
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230929.html

發光 ê 星際氣體山龍 kah 烏暗塗粉雲，就蹛 tī 內海仔星雲 ê 宇宙深空亂流 內底。伊嘛叫做 M8，是一个 5000 光年遠--ê、光爍爍 ê 恆星形成區。咱 用望遠鏡做夜空旅行 ê 時陣，伊就是一个逐家足愛看 ê 目標，就 tī 咱銀河系中心 ê 人馬座方向。這个內海仔星雲中央 ê 望遠鏡深空景色 差不多有 40 光年闊。伊發出 ê 紅色發射光，主要是離子化 ê 水素原子 kah 脫離出去 ê 電子重新複合 ê 時陣產生 ê 光。相片中央附近 光爍爍 ê 漏仔形結構，是離子氣體 去予 大質量少年恆星 ê 高能輻射 kah 極端恆星風 kā 雕出來--ê。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230928/
影像：Josep Drudis, Christian Sasse
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230928.html

毋是逐條路攏迵 tùi STEVE 極光去。頂禮拜，有一个夜空愛好者 leh 旅行，伊 ê 目標是欲翕 Huron 湖 天頂 ê 極光。伊駛車行過 加拿大 Ontario 庄跤小路 ê 時陣，預報講 ê 景色 煞提早出現，予這个攝影師 tī 伊駛到美麗 ê 五大湖 進前就愛提早停車。結果伊翕著 ê 極光是 tī 北方，頭前是陸地，毋是海。等第二擺極光出現 ê 時陣，西方煞出現一个 特別 ê 光帶。過一站仔，攝影師 kah 伊 ê 朋友發現講，這个西方 ê 光帶真有可能是一款特別形態 ê 極光，叫做 STEVE，速度增加的強熱輻射。而且，這个 STEVE 極光 嘛 leh 表演予咱看：伊 kah 咱 銀河系 ê 中央帶交叉，閣 kah 庄跤路尾附近 ê 地平線交叉。攝影師用 kha-mé-lah 翕著 這个 宇宙 X 影像了後，伊就暫時停落來欣賞這个 tī 平凡環境中 意外發現 ê 美麗景色。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230927/
影像：Theresa Clarke
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230927.html

你敢有看著馬 ê 頭？你看著--ê 毋是彼个有名 ê、tī 獵戶座 ê 馬頭星雲，是另外一个 tī 深空影像內底 看起來 kah 伊足成--ê 較暗 ê 星雲。這張影像 內底 ê 分子雲 複合體 ê 主體，是 反射星雲 IC 4592。反射星雲是足幼 ê 塗粉 組成--ê，一般看起來是較暗，毋過伊會因為反射附近能量較懸恆星 ê 可見光，所以看起來較藍。像這个，予星雲反射發光 ê 恆星就 tī 這隻 馬 ê 目睭 彼位。這粒恆星是 天蠍座 ν ê 成員，是 天蠍座 內底較光 ê 恆星系統。第 2 个 反射星雲 叫做 IC 4601，伊就 tī 影像中央正爿頂懸，kā 2 粒恆星 包起來。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230926/
影像：Antoine & Dalia Grelin
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230926.html

這个捲螺仔星系是發生啥物代誌？幾若億年前，這張相片下底這兩个大型 星系 khah 頂懸彼个 NGC 2936，猶是 一般 ê 捲螺仔星系，伊 leh 自轉，leh 製造恆星，leh 無閒家己 ê 代誌。毋過伊隨就 kah 下底彼个 大質量 長株圓星系 NGC 2937 行傷倚矣，煞改變伊 ê 方向。NGC 2936 受著 近距離 ê 引力交互作用，毋但改變方向，嘛去予搝甲變形。這个外形予伊嘛去 hŏng 叫做 蜂鳥 星系。Tī 烏暗 星際塗粉 ê 雲絲後壁彼粒足光 ê 藍光星，就是蜂鳥 ê 鼻仔，捲螺仔星系 ê 中心就是目睭。這組 星系對 做伙叫做 Arp 142，看起來就敢若 海豬仔 抑是 leh 保護卵 ê 徛鵝。這張有 Arp 142 清楚細節 ê 相片是最近 Hubble 太空望遠鏡 翕--ê ，有 重新處理過。Arp 142 就 chhāi tī 水蛇座 方向 3 億 光年 遠 ê 所在。閣 10 億年左右，這兩个星系 有可能會合併 做一个較大型 ê 星系。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230925/
影像來源：NASA, ESA, Hubble, HLA
資料處理 kah 版權：Basudeb Chakrabarti
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230925.html

這粒編號 101955 ê Bennu 小行星是一粒近地小行星，伊細細粒，表面攏是岩石。OSIRIS-REx 太空船 tī 2020 年 10 月 20 細細膩飛倚到 這粒小行星了後，太空船 ê 機器手骨 伸手 kā 磕一下。這个收集標本 ê 任務叫做「磕一下就走任務 (TAG)」。Tī 太空船 ê 採樣相機 SamCam ê 特寫相片中，有翕著 TAG 採樣機制 (TAGSAM) 30 公分闊 ê 採樣頭，敢若是欲 kā 一寡岩石硩予破 ê 款。這張速翕相片是 kah 離地球 3 億 2100 萬公里遠 ê 小行星 進行地表接觸 ê 時陣，紀錄落來--ê。1 秒鐘了後，這台太空船 kā 氣體罐內底 ê 窒素氣體 發射出去，想欲 kā 大量 Bennu 小行星 風化層 ê 物質噴入去採樣頭內底，通予伊 kā 較鬆 ê 表面物質收集起來。過了三年以後，ùi 小行星 Bennu 提著 ê 標本 按算欲 tī 今年 9 月 24 禮拜 轉來到地球。OSIRIS-Rex 太空船 會 tī 伊飛倚地球 ê 時陣，kā 收集標本 ê 回航艙擲轉來地球。擲了 20 分鐘了後，太空船會 kā 推進器點予著，飛離開地球，繼續飛去另外一粒近地 小行星 99942 Apophis，踅伊行。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230921/
影像：OSIRIS-REx, University of Arizona, NASA, Goddard Scientific Visualization Studio
音樂：高小糕 GaoXiaoGao
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230921.html

日行軌跡就是 tī 一冬內逐工踮仝一个時間紀錄日頭 tī 佗位 ê 8 字形曲線。為著欲翕出這張相片，有一台 4x5 英吋 ê 針孔 相機 to̍h 囥 tī 紐西蘭南島 向 北方天頂看過去。每一工當地時間下晡 4 點 ê 時陣，若是拄著好天，就會 kā 快門拍開短短仔 ê 時間，tùi 仝一片 光敏感 玻璃 感光。Ùi 2022 年 9 月 23 到 2023 年 9 月 19，按呢攏總感光一冬 ê 時間。Tī 冬節 kah 夏至這兩工，快門會加開一擺，開 tī 本來彼擺 ê 15 分鐘後，會一直開到日頭落去。按呢就會當 tī 曲線 頂懸 kah 下底 翕出日頭 ê 軌跡。春秋分這兩工就出現 tī 曲線 ê 中央，毋過毋是 tī 交叉點遐。是講，這个曲線 kah 北半球 ê 日行軌跡相比，是 顛倒爿--ê。今仔日是南半球 ê 春分，毋過是北半球 ê 秋分，就是秋天開始 ê 日子。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230923/
影像：Ian Griffin (Otago Museum)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230923.html

日時 tī 中國 甘肅省 敦煌市 附近 戈壁沙漠 西爿 100 兆 watt ê 熔鹽太陽能發電廠內底，有超過 1 萬 2000 面大塊鏡 leh 反射日光。逐塊鏡攏 leh 逐咱 ê 日頭，就親像日頭花仝款。In 做伙合作變做一面足大塊 ê 鏡，固定 kā 日光反射去發電站 ê 中央塔。毋過 暗暝 ê 時陣，這寡鏡就攏袂振動。In 反射 銀河內底 濟甲算袂清 ê 遠方恆星、星團、星雲，kah 銀河後壁 ê 天體。這幅 科幻 夜景是 9 月 15 彼工 tī 大型鏡面陣列邊仔，用 固定 tī 三跤馬頂懸 ê kha-mé-lah 翕--ê。這張 kha-mé-lah ê 數位感光 組合影像，有翕著 天星 tī 夜空 ê 仝心弧軌跡，kah 恆星軌跡 ê 超現實倒影。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230922/
影像：Jeff Dai (TWAN)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230922.html

雲後壁 ùi 地平線 peh 起來 ê 物件是啥物？是日頭啦！是講，大部份 ê 日出袂 親像按呢，因為大部份 ê 日出無包括月娘。毋過 tī 2013 年 5 月 10 號透早，澳洲 西部 peh 起來 ê 日頭 kah 咱地球之間閣有一粒月娘。這个時陣，若是 無人 kā 咱講，咱會足歹理解這到底是發生啥物代誌。發生 日環食 ê 時陣，月球 kah 咱 地球 ê 距離傷遠矣，所以無法度 kā 規粒太陽閘牢。閘袂牢 ê 日光，就 ùi 月球外沿迵過來，上濟會留一輾 火環 ê 形體 tī 遐。因為地平線頂懸 ê 地球大氣 ê 反射率較懸，所以這張 縮時攝影影片 翕著 ê 日出 kah 月出 看起來就較扁。影片繼續放送，日頭嘛繼續 peh 起來，毋過太陽 kah 月球煞開始分--開。欲看著後一擺 ê 日環食，毋免等 3 禮拜。10 月 14 拜六這工天氣若是袂䆀，咱就會當 tī 迒過 北美洲 kah 南美洲 狹狹 ê 全食帶內底，看著 一輾 火環。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230924/
影像：Colin Legg & Geoff Sims
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230924.html

恆星 當 leh 形成 ê 時陣，敢一定會產生噴射流？無人知影。氣體雲會因為 重力收縮，變做 盤仔形，開始自旋。毋過伊踅傷緊矣，煞予伊無法度繼續形成 原恆星。理論學家 假設 講，這款自旋，可能會因為噴出噴射流，予伊 ê 轉踅速度變較低。In 臆--ê，kah 咱知影 ê Herbig-Haro (HH) 天體 有成。這是一款有噴射流 ê 少年恆星，有當時仔是 足壯觀足華麗--ê。這張相片 是 最近 Webb 太空望遠鏡 (JWST) tī 紅外線 翕--ê 影像，有翕著一粒當 leh 形成 ê 少年恆星 HH 211 ê 清楚細節。綴 2 條狹狹 ê 粒子束 方向，咱閣會當看著 tī 星際氣體 內底，去予噴流衝擊 ê 紅色 震波。HH 221 ê 噴射流，應該會 tī 紲落來 10 萬年 ê 時間內，沓沓仔變光抑是變暗去，嘛會因為按呢改變伊 ê 外形。這寡 恆星形成 ê 細節研究，會繼續進行落去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230919/
影像來源：NASA, ESA, CSA, Webb
資料處理：Tom Ray (DIAS Dublin)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230919.html

這寡宇宙雲花就開 tī 1300 光年遠 ê 仙王座 豐富 ê 星場內底。伊就叫做 尾蝶花星雲，編號是 NGC 7023。伊毋是天頂唯一一个生甲親像 花 ê 星雲。這張深空望遠鏡景色 有翕出 尾蝶花星雲 kah 伊四箍圍仔 ê 星際塗粉。咱看會著 尾蝶花星雲 大範圍 ê 色光 kah 對稱 ê 結構。Tī 尾蝶花星雲內底，厚塗粉物質 ê 中央 有一粒高溫少年恆星。反射星雲主要 ê 色光是藍色--ê，這是塗粉粒反射恆星光 ê 特殊色光。Tī 反射星雲 中心 ê 雲絲，發出較暗 ê 紅光，這是一款 光致發光現象，就是物質吸收光子了後，重新輻射出光子 ê 結果。這个結果，予塗粉粒 kā ùi 恆星發出來 看袂著 ê 紫外光輻射，有效率轉做 看會著 ê 紅光。紅外線 觀測 表示講，這个星雲內底有一款足複雜 ê 炭素分子，叫做 PAHs 多環芳炭氫化合物。這个有 藍色花瓣 厚塗粉 ê 尾蝶花星雲，差不多有 6 光年大。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230902/
影像：Lorand Fenyes
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230902.html

這張仙女座星系 ê 相片，毋若看會著恆星 tī 佗位，嘛看會著欲出世 ê 恆星會出現 tī 佗位。仙女座星系 M31 是一个 捲螺仔星系。伊遮爾大閣遮爾媠，離咱干焦 250 萬 光年 爾爾。這張足心適 ê 仙女座星系相片，是 kā 太空觀測 kah 地面觀測 tī 可見光波段以內 kah 以外 ê 影像，疊做這張--ê。可見光 看著--ê，是 M31 內底 ê 恆星。白色 kah 藍色是 Hubble 太空望遠鏡、Subaru 地面望遠鏡、kah Mayall 地面望遠鏡 ê 影像資料。紅外線 看著--ê，是 M31 內底，連鞭欲出世 ê 新恆星。In 是柑仔色--ê，是 NASA Spitzer 太空望遠鏡 ê 影像資料。紅外線會當追蹤大型 塗粉帶。塗粉帶會去予恆星加溫，伊綴 仙女座星系 ê 捲螺仔手骨咧行。這寡 塗粉 是星系內底 大量星際氣體 ê 追蹤劑。這寡星際氣體，就是未來欲 做新恆星 ê 原始材料。仙女座星系 會 tī 未來 50 億年 ê 時間內，kah 咱 銀河系 合併 做一个星系。Tī 彼進前，這寡新恆星應該會 先做出來，差不多 tī 紲落來幾若億年 ê 時間內。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20231007/
影像來源：NASA, NSF, NOAJ, Hubble, Subaru, Mayall, DSS, Spitzer
影像處理 kah 版權：Robert Gendler & Russell Croman
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap231007.html

閣有啥物所在有可能有性命？Tùi 咱人類 上重要 ê 問題，就是性命是毋是嘛會出現 tī 太陽系以外 ê 行星？2019 年 ê 時陣 tī 遙遠 ê 系外行星 K2-18b ê 大氣層內底揣著袂少水蒸氣，對人類來講實在是一个足大 ê 進步。這粒行星 kah 伊 ê 母星 K2-18，就 tī 獅仔 星座，獅仔座 方向 124 光年遠 ê 所在。這粒 系外行星 比地球大足濟--ê，質量嘛比地球較大，毋過伊 ê 軌道是 tī 伊 ê 母星 ê 合蹛區 內。雖罔講 K2-18 比咱太陽較紅，毋過伊 tī K2-18b 天頂看起來是 kah 咱 tī 地球看著 ê 太陽 平光。2019 年 ê 時陣，ùi Hubble、Spitzer、kah Kepler 太空望遠鏡 ê 觀測資料，發現講 K2-18b 大氣層內底有水。這是利用 K2-18b ùi 伊 ê 母星 面頭前行過 ê 時陣，行星大氣內底 ê 水蒸氣產生吸收線，kā 標出來才揣著--ê。到這馬 2023 年矣，紅外線 ê Webb 太空望遠鏡 ê 進一步觀測，已經揣著其他暗示有性命 ê 分子矣，嘛包括 甲烷。這張想像圖上正爿是系外行星 K2-18b kah 伊 ê 衛星 (中央彼粒)。In 做伙踅倒爿下底彼粒 紅矮星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230920/
插畫來源：Ahmad Jabakenji (ASU Lebanon, North Star Space Art)
資料：NASA, ESA, CSA, JWST
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230920.html

紅色精靈 kah 樹仔 ê 差別實在是有夠大--ê。代先，紅色精靈 是一款無固定形體 ê 爍爁，樹仔是咱 定定看會著 ê 植物。紅色精靈是 足遠--ê，tī 地球大氣層 內底。毋過樹仔是 足近--ê，才一个跤球場遠爾爾。紅色精靈 動足緊--ê，電子 ê 運動速度接近 光速。毋過樹仔動足慢--ê，伊就固定 tī 塗跤。紅色精靈 是足光--ê，光 kah 會 kā 天頂照予光。毋過樹仔是暗暗，伊 ê 光主要是反射光。紅色精靈 是一目𥍉仔就無去矣，擋無一秒鐘。毋過樹仔是 擋較久，會活幾若年。講是按呢講，毋過 這張 這個月初 tī 法國翕大西洋彼爿 ê Pyrenees 山頂 ê 雷雨，煞翕著這兩項 tī 仝一張相片內底，看起來是遮爾成。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230918/
影像：Maxime Villaeys
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230918.html

這張日食組合相片內底 ê 烏巡是啥物？是月表山脈 ê 倒影。中央彼張影像是 tī 中國 廈門 翕--ê，是月娘 chhāi tī 日頭 面頭前 正中央。是講 月球 是離 地球 傷遠 矣，才會無法就 kā 規粒日頭完全閘去。月球邊仔透出來 ê 光線，就叫做 火環。兩爿 ê 連煞影像是 日光 ùi 月球山谷透過來 ê 光。月球 tī 太陽面頭前 ùi 倒爿行到正爿，干焦月球上懸點會 kā 日光閘去。所以，烏巡就是月表 山脈烏影 去予放大、扭曲、倒反 ê 投影。較光 ê 部份就叫做 Baily 珠仔。這是 2020 年 ê 日環食，干焦 tī 地球東半球 足狹 ê 全食帶內底 ê 人看會著日環食。是講後個月會閣有一條狹狹 ê 環食帶 迒過 北美洲 kah 南美洲，閣發生 一擺 日環食。明年 4 月份 ê 時陣，北美州會有足濟所在攏看會著 日全食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230917/
影像：Wang Letian (Eyes at Night)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230917.html

In 看起來可能有成現代機器恐龍，毋過 in 其實是 leh 監看天空 會轉踅 ê 大目睭。高能立體視野望遠鏡 (H.E.S.S.) 天文台 是一組望遠鏡。中央 較大台彼台 是直徑 28 公尺大，邊仔閣有 4 台直徑 12 公尺大 ê 反射式望遠鏡 踅大台一輾。In 是設計欲偵測 一款叫做 Cherenkov 輻射 ê 奇怪藍色爍光，這是 紮電粒子 tī 空氣內底 走甲比 光速 較緊，所產生 ê 輻射。這款光輻射是 ùi 遙遠天體 發--出 ê gamma 光 挵著 地球大氣 內底分子 ê 時陣，造成 ê 紮電粒子雨。H.E.S.S. 是一台 tùi 宇宙內底 ê 足懸能量 (TeV 遮爾懸) ê 高能光子 較敏感 ê 望遠鏡。H.E.S.S. 望遠鏡 自 2003 年開始 tī Namibia 共和國 運作，伊 ê 任務是 揣 烏暗物質，到今已經揣著超過 50 粒 會發出高能輻射 ê 天體，包括 超新星殘骸 kah 內底有藏 烏洞 ê 星系核。相片是 6 月份翕--ê H.E.S.S. 望遠鏡 leh 轉踅 kah 觀測夜空 ê 縮時攝影影片。背景是咱 ê 銀河系 kah 大小麥哲倫星雲，有當時仔閣有踅地球 ê 人造衛星飛過。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230906/
影片來源 kah 版權：Jeff Dai (TWAN), H.E.S.S. Collaboration
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230906.html

這个 hŏng 讚嘆 ê 景色出現 tī 9 月 12 這工，內底有北極圈南方 ê 冰島 現代北極巨型石頭陣 ê 石頭指向天頂。Tī 地磁風暴 期間，迷人 ê 北極光 tī 烏暗 ê 夜空 leh 跳舞。這个時陣閣拄仔好拄著 火流星 爆炸，予一陣極光愛好者歡喜甲。有紮攝影器材 ê 觀星者，用敬畏 ê 心情，翕著 北方火流星 ê 影片了後，閣繼續 leh 翕相。這粒火流星上光 ê 時陣，是 kah 月圓平光。雖罔講這个火流星隨變暗去，毋過伊有留一條光爍爍 ê 尾溜，這个光巡久久攏袂退。這條敢若幽靈 ê 光巡，就 tī 60 到 90 公里懸 ê 頂層大氣出現幾若分鐘久，kah 極光 tī 天頂做伙發光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230916/
影像：Jennifer Franklin
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230916.html

金星閣轉來矣！伊這馬是天欲光進前出現--ê、光爍爍 ê 透早星。這張天文速翕相片是 9 月 12 日出進前翕--ê，是 ùi 欲飛去 墨西哥市 ê 飛龍機 倚窗仔彼爿位看出去 ê 景色，有翕著足光 ê 天體。金星就 tī 相片正爿頂懸，kah 古老 ê 月娘 做伙享受這个透早 ê 天色。Ùi 平流層 ê 角度來看，山尖 kah 雲 ê 剪影就出現 tī leh 發光 ê 東爿地平線附近。這个壯觀、長長 ê 低雲層，是 ùi 地球 ê 活火山 Popocatépetl 山 噴出來 ê 雲煙。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230915/
影像：Luis Miguel Meade Rodríguez
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230915.html

大閣媠 ê 捲螺仔星系 NGC 7331，定定 hŏng 講伊 kah 咱 銀河系 是足成--ê。NGC 7331 就 tī 北天 飛馬座 方向 差不多 5000 萬光年遠 ê 所在。伊真早就 hŏng 認為是一个捲螺仔星雲，嘛是一个足光 ê 星系。毋過伊煞無去予收 tī Charles Messier tī 18 世紀編 ê 足有名 ê 目錄內底。是講這个星系盤 tī 咱 ê 視線方向看起來是 坦倒--ê，所以利用望遠鏡長時間感光 ê 影像，看起來就感覺足有層次--ê。這款效應 tī 這張清楚 ê 影像 內底是閣較明顯，因為 tī 這个島宇宙後壁，猶有幾若个星系 tī 遐。上顯目 ê 背景星系 ê 視寸尺 差不多是 NGC 7331 ê 1/10，表示講 in ê 距離嘛差不多有 10 倍遠。In kah NGC 7331 tī 天頂排 kah 遮爾密，只是拄仔好爾爾。這組引人注目 ê 星系就 tī 銀河盤頂懸，in 嘛叫做 鹿舐星系群。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230914/
影像：Ian Gorenstein
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230914.html

Tī 光學望遠鏡下底看著--ê 星系 NGC 4632 有藏一个祕密。伊 ê 邊仔有一輾 水素 冷氣體，kah 伊 ê 捲螺仔星系盤方向差 90 度。這款南北極方向 ê 星系環叫做極環。毋過 NGC 4632 是頭一个 uì 電波 望遠鏡 巡天計畫揣著 極環 ê 星系。這張有翕著氣體環 ê 組合影像，是 kā 懸敏感度 ê ASKAP 電波望遠鏡 kah SUBARU 光學望遠鏡 ê 觀測資料 疊出來--ê 結果。利用 虛擬現實技術，天文學家會當 kā 星系盤 kah 星系環分--開。相片內底 ê 色水變化，是用來追蹤伊 ê 軌道運動。是講這款 極環 是按怎出現--ê？In 可能是星系 kah 伊 ê 星系伴 產生 引力交互作用 ê 時陣，去予 搝 出來 ê 物質。嘛有可能是 水素氣體 綴 宇宙網結構 ê 雲絲 行，煞 tī 星系邊仔吸積做星系環。有一寡 tī 遮 ê 物質會因為引力收縮，變做恆星。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230913/
影像來源：Jayanne English (U. Manitoba), Nathan Deg (Queen’s University) & WALLABY Survey, IDIA/Vislab, CSIRO/ASKAP, NAOJ/Subaru Telescope
文稿：Jayanne English (U. Manitoba)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230913.html

這張速翕是 Hubble 太空望遠鏡 翕--ê 40 億光年遠 ê 大質量星系團 Abell 370。這个星系團上顯目--ê 是 2 个巨型長株圓星系 kah 滿四界 ê 光弧。實際上，這寡較暗--ê、四散--ê 藍色光弧，kah 影像中央下底 kah 倒爿 彼寡 足明顯 ê 龍形光弧，攏是 Abell 370 後壁 ê 星系。In ê 距離是 2 倍遠。本來看袂著 ê 光，這馬是去予星系團內底 以 超大質量 ê 烏暗物質 主導 ê 重力 kā 加強、扭曲去。這款效應就叫做重力透鏡，會當提供線索，予咱會當 影--著 早期宇宙 ê 星系。這款扭曲 時空 ê 結果，就是 愛因斯坦 100 冬前預測 ê 重力 透鏡 效應。相片內底 ê 光針，是 銀河內底 ê 前景星。正爿下跤 tī 這寡恆星後壁--ê，是 Abell 370，就 tī 海怪星座，海翁座 ê 方向遐。伊是 Frontier Fields 計畫內底欲翕--ê 6 个星系團內底 上尾一个。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230912/
影像：NASA, ESA, Jennifer Lotz and the HFF Team (STScI)
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230912.html

這張相片就算是無彗星 tī 遐，嘛是足媠--ê。Tī 這張 日出 相片內底，頂懸是優雅 ê 深藍色，閣有小可仔發白光 ê 恆星，地平線附近是 hŏng 感覺爽快 ê 黃咖啡色。前景是 Slovakia 共和國 西部 ê 青色山崙，較遠 ê 是 Zadňa hura 山 kah Veľká hora 山，kah 沿路一寡小鎮。正爿 ê 金星 實在是 傷過媠，因為有大氣踅 tī 伊邊仔，成做一輾彩色 ê 大氣華。毋過閣較吸引人--ê，猶是 彗星。這張組合相片 倒爿彼粒，是昨昏早 天欲光進前翕--ê Nishimura 彗星。最近全球透早攏看會著 足光 ê 彗鬚 kah 長長 ê 離子 尾溜，予足濟透早翕 ê 全景相片攏變甲足媠--ê。明仔載，彗星 C/2023 P1 (Nishimura 彗星) 會經過伊 kah 地球上倚彼點。後擺欲閣行遮爾倚，是愛閣等 434 年矣。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230911/
影像：Petr Horálek / Institute of Physics in Opava
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230911.html

這是啥物雲？是 弧形雲 ê 其中一款雲，叫做 捲𩛩雲 (捲軸雲)。這款真罕得看著--ê 長雲，一般來講攏是出現 tī 冷鋒頭前。尤其是 向前推捒 ê 風暴 頭前若是有 下降氣流，就會造成較澹較燒熱 ê 空氣 peh 升，等伊溫度降到 露點 以下，就會堅做 雲。這个現象若是 tī 大範圍 綴 鋒面 出現，就有可能會形成 捲𩛩雲 (捲軸雲)。捲𩛩雲 (捲軸雲) 實際上可能真正有 空氣 綴 雲 ê 長水平軸 leh 踅。一般講來，科學家認為 捲𩛩雲 (捲軸雲) 袂變做 捲螺仔風。捲𩛩雲 (捲軸雲) kah 弧形雲 ê 另外一款雲，涼棚雲 (灘雲)，無仝。伊 kah 伊 ê 母雲 烏跤雲 (積雨雲) 是完全分開--ê。這張相片 是 2007 年 tī 美國 Wisconsin 州 Racine 市 翕--ê，彼陣有風暴欲來，捲𩛩雲 (捲軸雲) 就湠到足遠 ê 所在 去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230820/
影像：Megan Hanrahan (Pierre cb), Wikipedia
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230820.html

這个人是 tī 遐 leh 創啥？2012 年 ê 時陣，咱會當 tī 美國西部幾若州 kah 北太平洋 狹狹 ê 全食帶 內底，看著金環日食（日環食）。金環 日食 是月娘 離 地球 傷遠矣，煞無法度 kā 規粒太陽攏閘去，所以太陽才會 tī 月盤後壁出現一輾火環。為著欲翕著這款 無四常 ê 太陽活動，有一个骨力 ê 攝影師 ùi Arizona 州 駛車到 新墨西哥州，看會當揣著上讚 ê 翕相地點無。等伊撨好勢，食日 ùi 半公里遠 ê 山脊拄欲落去 ê 時陣，有一个人煞無拄好行到鏡頭內底。是講真感謝這位意外 ê 人客，毋過攝影師猶是毋知這位走到鏡頭內底，產生 剪影 ê 人是 siáng。這个人敢若是提一个圓圓 ê 物件，欲看日食 ê 款。這張相片 是 當地時間 2012 年 5 月 20 暗時 7:36 ê 時陣 tī Albuquerque 附近 一个公園 翕--ê。後個月，10 月 14，會有另外一个狹狹 ê 全食帶 迒 tī 北美洲 kah 南美洲 頂懸。天氣若是袂䆀，應該有機會閣看著 另外一个日環食。仝一个時間，美洲大陸頂懸若是無雲，tī 遐 ê 人攏有機會看著 日偏食。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230910/
影像：Colleen Pinski
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230910.html

Nishimura 彗星 leh 發光。講較精確 leh，是 彗星 C/2023 P1 (Nishimura 彗星) 倚近太陽 ê 時陣 leh 發光。這粒 彗星 是頂個月才發現--ê，伊已經行到地球軌道內底矣，這馬是光甲直接用目睭就看會著。後禮拜這粒彗星會行到 kah 地球 上倚 ê 所在。毋過欲行到 kah 太陽上倚 ê 所在，愛閣一禮拜，9 月 7 號彼工。科學家推測講，Nishimura 彗星 頂擺來咱 內太陽系 坐 ê 時陣，有留一寡 噴出來 ê 冰 kah 塗粉，這可能就變做 長蛇座 Sigma 流星雨，伊 ê 高峰期是發生 tī 逐年 ê 12 月。若是按呢生，這擺彗星閣轉來，就會 留閣較濟 彗星屑仔，按呢這个 流星雨 就有可能會變閣較活跳。相片內底 ê Nishimura 彗星 是 4 工前 tī 美國 新墨西哥州 Edgewood 市 翕--ê。有翕著 kah 太陽風 交互作用 產生 ê 長離子尾溜。咱會當 tī 紲落來幾若工 ê 日出進前，tiàm 東爿地平線附近，抑是 tī 後禮拜 日落了後，tiàm 西爿地平線附近 揣著 這粒彗星。伊 ê 彗鬚 會一直遮爾光，伊 ê 尾溜嘛會繼續 發光。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230909/
影像：Peter Kennett
音樂：P!SCO - 鼎鼎
聲優：阿錕
翻譯：An-Li Tsai (NSYSU)
原文：https://apod.nasa.gov/apod/ap230909.html

恆星若是死亡，就會創出星雲。咱會當 tī 飛懸懸 ê 天鵝座 內底揣著 2 个 ùi 恆星死亡了後創出來 ê 氣體塗粉雲，in 就 浮 tī 咱 銀河 盤 ê 豐富星場內底。這張 望遠鏡視野 內底，有翕著 雪文泡星雲，嘛會使叫做茶箍泡星雲（倒爿下跤）kah 月眉星雲（正爿頂懸）。2 个星雲攏是恆星性命演化到上尾階段形成--ê。月眉星雲 嘛叫做 NGC 6888。伊會生做按呢，是因為伊中心彼粒光爍爍 ê 大質量 Wolf-Rayet 星，WR 136，產生 ê 強烈恆星風，kā 伊 ê 外層氣體殼擲出來。WR 136 用足緊 ê 速度 燒伊 ê 燃料。伊 ê 性命是足短--ê，這馬已經行到上尾 ê 坎站矣，煞落來就會變做壯觀 ê 超新星 爆炸矣。雪文波星雲 是 2013 年發現--ê。伊應該是 行星形星雲，是 kah 咱太陽仝款、長歲壽 ê 低質量恆星，演化到上尾擲出來 ê 氣體殮布。落尾伊會沓沓仔演化變做低溫 ê 白矮星。2 个星雲攏 tī 5000 光年 遠 ê 所在，較大 ê 月眉星雲有 25 光年 闊。閣差不多 幾若百萬年了後，2 个星雲攏會無--去。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230904/
影像：Abdullah Al-Harbi
音樂：高小糕 GaoXiaoGao
聲優：阿錕
翻譯：An-Li Tsai (NCU)
原文：https://apod.nasa.gov/apod/ap230904.html

這个叫做 Messier 17 ê 恆星工場，是去予恆星風 kah 輻射 kā 雕出來--ê，伊就 tī 5500 光年遠 ê 人馬座 內底，遮有足濟星雲。Tī 這个距離， 1/3 度闊 ê 視野 差不多是 30 光年闊。這張清楚 ê 彩色組合影像，主要是欲翕 這寡較暗 ê 氣體塗粉雲 ê 細節，相片 ê 背景是 銀河 中央 ê 恆星。Tī M17 內底，有 ùi 宇宙雲 kah 塗粉做出來 ê 高溫大質量恆星。In 所產生 ê 恆星風 kah 高能光，沓沓仔 kā 賰 ê 星際物質 吹走，產生這款海綿質外形 kah 彎彎曲曲 ê 形體。M17 嘛叫做 Omega 星雲，抑是 天鵝星雲。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230908/
影像：Kim Quick, Terry Hancock, Tom Masterson (Grand Mesa Observatory)
音樂：P!SCO - 鼎鼎
聲優：阿錕
翻譯：An-Li Tsai (NCU)
原文：https://apod.nasa.gov/apod/ap230908.html

16 世紀 ê 葡萄牙航海家 Ferdinand Magellan kah 伊 ê 船員，tī in 頭一擺踅地球旅行 ê 時陣，有足濟時間研究南半球 ê 夜空。結果 in tī 天頂揣著 2 个霧霧、敢若雲 ê 天體。南半球 ê 觀星者 kā in 叫做 大小麥哲倫星雲，咱這馬知影講 in 是咱銀河系 ê 衛星星系。這張清楚 ê 星系肖像 翕--ê 就是 大麥哲倫星雲，伊就 tī 劍魚座 方向 16 萬光年遠 ê 所在。伊有 15 萬光年闊，是銀河系上大 ê 衛星星系，嘛是現代 上近 ê 超新星 SN 1987A in 兜。中央頂懸 ê 紅斑是 劍魚座 30，嘛叫做 蜘蛛星雲，是一个大型 恆星形成區，大細差不多有 1000 光年闊。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230907/
影像：Chris Willocks / Telescope.Live
音樂：P!SCO - 鼎鼎
聲優：阿錕
翻譯：An-Li Tsai (NCU)
原文：https://apod.nasa.gov/apod/ap230907.html

頂個月 ê 月圓是兩倍 ê 無四常。頭一个無四常 ê 理由是因為伊是 藍月。照現代 ê 定義來講，藍月 是一个 曆日月 內底第二擺月圓。2023 年有 13 擺 ê 月圓，其中一個月有 2 擺，就是 8 月 ê 時陣。頭一个月圓是 8 月 1 號，叫做 鱘龍魚月 抑是 神魚月。第二个 無四常 ê 理由是因為第二个月圓是 超級月娘。照現代 ê 定義來講，超級月娘 是月球 tī 月圓時 行到伊 kah 地球上倚附近，按呢伊 看起來就會比平常時較大粒嘛較光。這張相片內底是 2023 年 ê 超級藍月，就出現 tī 意大利 Sicily 島 Syracuse 市 歷史久長 ê 城堡 kah 燈塔 後壁。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230905/
影像：Kevin Saragozza
音樂：P!SCO - 鼎鼎
聲優：阿錕
翻譯：An-Li Tsai (NCU)
原文：https://apod.nasa.gov/apod/ap230905.html

週期性 彗星 73P，嘛叫做 Schwassmann-Wachmann 3 號彗星，已經崩 2 擺以上矣。這粒彗星是 ùi 早期太陽系留落來 ê 冰 kah 塗粉做--ê 宇宙舒芙蕾。伊 tī 1995 年 行到太陽附近 ê 時陣，頭一擺去 hŏng 看著伊 崩做幾若塊。毋過 2006 年閣轉來 ê 時陣，伊煞崩做幾若十塊，散 tī 天頂幾若度闊 ê 範圍。彗星 是磕袂著就崩去 ê 物件，熱能、重力、噴氣 造成 ê 壓力，攏有可能 tī in 倚 太陽 ê 時陣，崩做 壯觀 ê 景色。這張清楚 ê 影像是 2006 年 Hubble 太空望遠鏡 翕--ê。有紀錄著 崩做幾若十塊 ê 彗星 ê 其中一塊：碎片 B。伊後壁閣綴一大陣細塊彗星屑仔，逐塊攏有伊家己 ê 彗鬚 kah 彗尾。這張相片翕--著 ê 彗星 是 tī 離 地球 3200 萬公里遠 ê 所在，按呢相片翕--著 ê 範圍差不多有超過 3000 公里。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230903/
影像：NASA, ESA, H. Weaver (JHU / APL), M. Mutchler and Z. Levay (STScI)
音樂：P!SCO - 鼎鼎
聲優：阿錕
翻譯：An-Li Tsai (NCU)
原文：https://apod.nasa.gov/apod/ap230903.html

是啥物物件 tī 遐咧發光？這个答案 愛看你是咧講海？抑是咧講天？Tī 海 lih，這个特別 ê 藍光是 生物發出 ê 光。講較詳細咧，發光 ê 是一款 夜光蟲，伊是單細胞浮游生物，是因為去予海湧波浪拍 kah 精神起來，才會發光。In 就是一般咱咧講 ê 藍色目屎。浮游生物 用 in 發 ê 光 來阻擋 這寡 欲食 in ê 生物。這个 tī 2 月中 出現 tiàm Maldives 島 ê 現象是遮爾強烈，連天文攝影師嘛講，這是一个 青藍色 ê 仙境。毋過咱若是看 tùi 天頂去，應該會看著咱較熟似 ê 恆星 kah 星雲 leh 發光。Ùi 去予燈火照 kah 足光 ê 青色植物 後壁 peh 起來 ê 白色光帶，是有幾若十億粒 恆星 ê 銀河系 中央盤。咱閣會當 tī 天頂看著 ê 是，倒爿 ê 半人馬座 ω 星團，kah 中央彼个有名 ê 南十字 星群。相片內底有一寡發紅光 ê 星雲，包括 tī 正爿中央 較光 ê 船底座星雲，kah 正爿頂較大範圍 ê Gum 星雲。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230529/
影像：Petr Horálek / Institute of Physics in Opava, Sovena Jani
音樂：P!SCO - 鼎鼎
聲優：草莓大福
翻譯：An-Li Tsai (NCU)
原文：https://apod.nasa.gov/apod/ap230529.html

室女座星系團 佔 這規幅 望遠鏡 視野 差不多有 4 度闊。室女座星系團 tī 差不多 5000 萬光年遠 ê 所在，是 kah 咱本星系群 上倚 ê 大型星系團。室女座星系團內底特別光 ê 長株圓星系，是中央下跤 ê M87，倒爿頂懸 ê M84，kah 倒爿下跤 ê M86，in 攏是 Messier 目錄 內底 ê 天體。M84 kah M86 去 hŏng 認為是 Markarian 鍊仔 ê 一部份。鍊仔就是這張相片倒爿 排做一條 ê 彼陣星系。鍊仔中央彼搭有一對足趣味 ê 交互作用星系，NGC 4438 kah NGC 4435，in 就叫做 Markarian ê 目睭。是講 大型長株圓星系 M87 是 室女座星系團內底上顯目--ê。伊是頭一粒用咱地球 ê 事件視界望遠鏡 揣著 ê 超大質量烏洞 in 兜。

———
這是 NASA Astronomy Picture of the Day ê 台語文 podcast
原文版：https://apod.nasa.gov/
台文版：https://apod.tw/

今仔日 ê 文章：
https://apod.tw/daily/20230526/
影像：Abdullah Alharbi
音樂：P!SCO - 鼎鼎
聲優：草莓大福
翻譯：An-Li Tsai (NCU)
原文：https://apod.nasa.gov/apod/ap230526.html